País Vasco
O Goberno vasco crea un premio para recoñecer o labor de persoas que traballan a prol da normalización do éuscaro
O premio Kiroletik Bagoaz Euskaraz ten como obxectivo recoñecer as iniciativas a favor do éuscaro impulsadas no ámbito deportivo por asociacións e particulares. Na súa primeira edición o galardón vai para o psicólogo Aritz Olagoi.
Fonte: Gobierno Vasco
Convócase unha nova bolsa para impulsar a creación literaria en éuscaro
O Goberno vasco e a Fundación BBVA asinaron un convenio de colaboración para crear a Bolsa Xabier Lete cuxo obxectivo é promover a creación literaria en éuscaro. Outorgaranse 70 000 euros para que escritoras e escritores poidan dedicar un ano ao seu proxecto literario.
Fonte: Gobierno Vasco
O Concello de Durango organiza cursos de acollida lingüística para persoas migrantes
Os cursos AISA de acollida lingüística para persoas inmigrantes maiores de 16 anos teñen como obxectivo iniciarse na aprendizaxe do éuscaro. A súa duración é de 60 horas e son de balde.
Fonte: Durangon
O Concello de Sestao organiza actividades de fomento do éuscaro fóra do horario escolar
A iniciativa, que se desenvolve ao abeiro dos programas Berbontzi e MintzaOn, está dirixida a alumnado de primaria. O obxectivo é que nenos/as e adolescentes dispoñan de posibilidades de usar o éuscaro e relacionarse nesta lingua fóra do ámbito escolar.
Fonte: Tele 7
Preséntase en Durango un decálogo para fomentar o éuscaro nas empresas do municipio
O Concello de Durango, Dendak Bai e Landue presentaron un decálogo para incrementar o uso do éuscaro nos establecementos comerciais e hostaleiros, así como nas empresas de servizos.
Fonte: Ayuntamiento de Durango
O Goberno vasco aproba un acordo para garantir os dereitos lingüísticos da cidadanía
O acordo que asinarán o Servizo de Garantía dos Dereitos Lingüísticos e o Ararteko (o valedor do pobo do País Vasco) terá unha vixencia de catro anos e o seu obxectivo será definir a colaboración na protección da cidadanía fronte á discriminación lingüística e protexer os seus dereitos neste eido.
Fonte: Gobierno Vasco
Zineuskadi 2024 convoca axudas para a dobraxe de películas ao éuscaro
O programa de axudas Zinema Euskaraz, cuxa convocatoria está aberta a novas solicitudes ata o 31 de decembro, cobre o 100 % dos gastos de dobraxe dos filmes ao éuscaro.
Fonte: Cine y Tele
A Deputación Foral de Guipúscoa premia tres entidades polo seu compromiso co fomento do éuscaro no ámbito socioeconómico
No acto de recoñecemento da iniciativa «LH Duala Euskaraz» (FP Dual en éuscaro), premiáronse tres entidades que levan a cabo a formación profesional e a inserción laboral do alumnado en éuscaro: Copreci, Aita Menni e Elkarmedia.
Fonte: Diputación Foral de Gipuzkoa
A Universidade do País Vasco desenvolve o maior modelo de linguaxe para o éuscaro
Latxa é o nome do gran modelo de linguaxe para o éuscaro creado por HiTZ, Centro Vasco de Tecnoloxía da Linguaxe da Universidade do País Vasco. O seu obxectivo é fomentar o desenvolvemento de investigacións, innovacións e produtos que funcionan con esta lingua.
Fonte: Universidad del País Vasco
O Goberno vasco aproba o novo plan de éuscaro para os vindeiros dez anos
O novo plan, denominado Aroa. Marco estratégico para la revitalización del euskera y empoderamiento de las personas vascohablantes, ten como obxectivo responder aos cambios sociais e fortalecer unha comunidade de falantes de éuscaro activa e apoderada.
Fonte: Gobierno Vasco
Boletín
Subscríbase ao boletín
