País Vasco
Institucións do País Vasco subscriben unha declaración con motivo do Día Internacional do Éuscaro
Representantes das institucións vascas subscribiron unha declaración, co gallo da celebración o vindeiro 3 de decembro do Día Internacional do Éuscaro, que leva por título ‘O éuscaro necesítanos en actitude activa e predisposta. Porque todos os días son euskaraldia’ coa que fan un chamamento á cidadanía para que se implique no impulso desta lingua.
Fonte: Gobierno Vasco
O Goberno vasco aproba unha subvención de 68 000 euros para a Mancomunidade de Municipios Euscaldúns
A Mancomunidade de Municipios Euscaldúns, coa axuda de 68 000 euros do Goberno vasco, impulsará catro proxectos de fomento do éuscaro promovidos polo programa anual desta mancomunidade.
Fonte: 20 minutos
O Concello guipuscoano de Pasaia pon en marcha unha campaña para promover a lectura en éuscaro
O Concello de Pasaia impulsa unha campaña de lectura en éuscaro ('Orriz orri Euskara erabili, orriz orri Euskara igorri') grazas á que farán descontos para adquirir libros escritos en éuscaro. Ademais organizaranse uns actos especiais dirixidos a persoas de diferentes idades.
Fonte: El Diario Vasco
Increméntanse nun 37,5 % as axudas destinadas á aprendizaxe de éuscaro para as persoas adultas
O Goberno vasco pretende que a ensinanza do éuscaro sexa gratuíta ata o nivel B2 en 2020. Para iso, o Departamento de Cultura incrementará nun 37,5 % as axudas no próximo ano ata acadar os 2,47 millóns de euros.
Fonte: El Mundo
A Deputación de Áraba e Laneki crean un soporte de escritorio para impulsar o uso do éuscaro no ámbito laboral
A Deputación Foral de Áraba e Laneki, a asociación para o fomento e a mellora da formación profesional, lanzan Baigare, un soporte que poderá colocarse nas recepcións e mostradores dos negocios, co obxectivo de que a clientela saiba que pode ser atendida en éuscaro dende o primeiro momento.
Fonte: 20 minutos
Ikastolen Elkartea e AEK preparan unhas unidades divulgativas sobre a iniciativa Euskaraldia
Os colectivos Ikastolen EIkartea e AEK elaboraron unhas unidades didácticas sobre Euskaraldia co obxectivo de proporcionarlles máis información sobre esta iniciativa aos estudantes de ambas as organizacións. Pola súa banda, o colectivo Irrien Lagunak publicou un número especial da revista Irria dedicado á práctica social que se desenvolverá entre o 23 de novembro e o 3 de decembro.
Fonte: eitb
A Real Academia da Lingua Vasca recibe o Premio Ondarea polo seu labor de conservación e difusión do éuscaro
A Deputación de Guipúscoa faralle entrega, o vindeiro 16 de novembro, á Real Academia da Lingua Vasca do III Premio Ondarea, co que se recoñece o seu traballo a prol da conservación e a difusión do éuscaro.
Fonte: Diario Vasco
A Deputación de Áraba organiza os Premios Lazarraga que recoñecen o traballo a prol do éuscaro no ámbito empresarial
O vindeiro 15 de novembro a Deputación de Áraba entregará os Premios Lazarraga cuxo obxectivo é recoñecer o labor de organizacións e persoas que traballan pola normalización do éuscaro no ámbito socioeconómico.
Fonte: Gasteiz Hoy
O Concello de Getxo pon en marcha un plan para fomentar o uso do éuscaro
O Concello de Getxo elaborou un plan para fomentar o éuscaro, no que se recollen 140 medidas para pór en práctica en diferentes áreas, como cultura, comercio, hostelería, administración e novas tecnoloxías.
Fonte: Deia
O Tribunal Constitucional avala que o estado fixe un tratamento similar para o castelán e o éuscaro no ámbito educativo
O Tribunal Constitucional desestimou un conflito de competencias presentado polo Goberno vasco contra a LOMCE que consideraba que o Estado invadía competencias en materia educativa ao impoñer un "tratamento análogo" entre éuscaro e castelán na Educación Primaria
Fonte: Noticias de Gipuzkoa
Boletín
Subscríbase ao boletín
