Varios municipios de Biscaia puxeron en marcha un ano máis a campaña 'Nahi dudalako!', co obxectivo de animar o alumnado que cursa 4º da ESO a escoller os modelos en éuscaro en Bacharelato e Formación Profesional. A través da web da iniciativa (www.nahidudalako.eus) achegan información relativa a diferentes temas, como os centros educativos que ofrecen a oportunidade de estudar nesta lingua.

Fonte: 20 minutos

A asociación Librezale, xunto a Iametza Interaktiboa e o laboratorio de cultura dixital e tecnoloxía de TabakaleraHirikilabs, puxo en marcha 'Auzolan digitala', un proxecto que ten como obxectivo desenvolver un sistema de código aberto para o recoñecemento de voz en éuscaro.

Fonte: Diario Vasco

Segundo unha investigación, que os adestradores se comuniquen en éuscaro resulta de grande importancia para fomentar o uso desta lingua entre a mocidade. Para conseguilo, apuntan a necesidade de que os clubs xeren as condicións para que o deporte se converta nun enlace entre os hábitos lingüísticos das aulas, onde o éuscaro está moi presente, e os da rúa. 

Fonte: Noticias de Gipuzkoa

A Deputación Foral de Áraba estreará este verán, na última semana de xullo, un novo campamento de inmersión no éuscaro, para mozas e mozos de 12 e 13 anos, denominado Euskalaka, cuxo principal obxectivo será afondar nesta lingua a través da edición de vídeos e a aprendizaxe de redes sociais.

Fonte: Noticias de Álava

Catro concellos vascos (Lezo, Errenteria, Pasaia e Oiartzun) apoiarán a comisión de Éuscaro de Oarsoaldea na axuda que esta prestará ás oficinas de servizos (xestorías, inmobiliarias, seguros e administradores de terreos) para impulsar nelas a normalización da lingua vasca e aumentar a súa presenza.

Fonte: Diario Vasco

O Goberno vasco presentou a tradución ao éuscaro dos episodios relacionados coa Guerra Civil acontecidos en Euskadi escritos polo xornalista británico George Steer. A obra, traducida pola autora Koro Navarro, leva por título Gernikako arbola. Gerra modernoaren landa-azterketa bat.

Fonte: Noticias de Navarra

Trinta axentes sociais de diferentes ámbitos asinaron compromisos para impulsar a normalización do éuscaro no marco do proxecto 'Aro berriari, Klika'. Korrika e AEK, organizadores desta iniciativa, esperan que se vaian unindo máis nun futuro, para o que habilitaron unha páxina web na que se poderán ir sumando máis organizacións.

Fonte: Deia

O Concello de Donostia e a Asociación de Hostalería de Guipúscoa poñen en marcha a campaña Erraza da que ten como obxectivo que o persoal deste sector que traballa na Zona Vella da cidade aprenda éuscaro para poder atender a clientela nesta lingua.

Fonte: Noticias de Gipuzkoa

As bibliotecas públicas de Ondarroa e Lekeitio sumáronse á campaña 'Irakurri gozatu eta oparitu', que chega á súa décimo terceira edición e que ten como obxectivo fomentar a literatura en éuscaro.

Fonte: El Correo

Segundo un estudo, en Guipúscoa fálanse máis de cen linguas e habitan persoas dun total de 165 países. Ademais, resalta a importancia de recoñecer estes idiomas para que esta poboación de orixe estranxeira, que supón un 9,5 %, valore o éuscaro.

Fonte: Noticias de Gipuzkoa