País Vasco
Preséntase o Laboratorio Cooperativo de Innovación Lingüística, un novo proxecto para a promoción do éuscaro
Innovación lingüística e promoción do éuscaro únense nun novo proxecto posto en marcha pola Deputación de Guipúscoa en colaboración coa Fundación Elhuyar, a consultoría Emun, a Asociación Langune e o Clúster de Sociolingüística. Trátase do Laboratorio Cooperativo de Innovación Lingüística co que se pretende impulsar iniciativas que supoñan unha novidade en diferentes sectores da sociedade vasca co obxectivo de que o éuscaro adquira protagonismo no actual contexto multilingüe.
Fonte: Donostitik
A corporación municipal de Deba aproba o Plan de utilización do éuscaro
O Plan de utilización do éuscaro de Deba, que terá unha vixencia de catro anos, foi aprobado por unanimidade pola corporación municipal. Este documento ten como obxectivo aumentar o emprego desta lingua no Concello para garantir os dereitos lingüísticos da cidadanía.
Fonte: Noticias de Gipuzkoa
Os fillos de inmigrantes no País Vasco optan maioritariamente polos modelos lingüísticos D e B
Segundo un informe sobre a situación educativa dos fillos de inmigrantes en Euskadi, estes optan maioritariamente polos modelos lingüísticos B e D, os que contan con maior presenza do éuscaro, en especial en Primaria, mentres que en Secundaria existe unha maior preferencia polo modelo A.
Fonte: Noticias de Gipuzkoa
O Concello de Donostia subvencionará a colocación de carteis en éuscaro
O Concello de Donostia destinará axudas por valor de 22 500 euros aos establecementos comerciais e aos locais de hostalería para a inclusión do éuscaro nos seus carteis interiores.
Fonte: Noticias de Gipuzkoa
O Concello de Bilbao impulsa a creatividade en éuscaro entre a xuventude
O Concello de Bilbao e Euskaltzaleen Topagunea organizan a XIV edición de Harrapazank, un programa que promove a cultura, a creatividade e o éuscaro entre a mocidade de 12 a 18 anos a través de obradoiros con diferentes actividades.
Fonte: Deia
Arrigorriaga pon en marcha unha campaña para fomentar a transmisión interxeracional do éuscaro
A campaña, dirixida ás familias con nenas e nenos menores de cinco anos, ten como obxectivo destacar a importancia da transmisión do éuscaro, para o cal se pon á súa disposición a través dunha web diferentes recursos como debuxos, contos etc.
Fonte: El Correo
A Deputación de Guipúscoa anima as empresas a fomentar o uso do éuscaro como estratexia empresarial
O deputado xeral Markel Olano visitou a factoría Niessen para coñecer o seu traballo a prol da igualdade lingüística no ámbito laboral. Neste acto destacou a importancia de promover o emprego do éuscaro como estratexia empresarial para avanzar na normalización desta lingua e engadir valor á actividade da propia empresa.
Fonte: Noticias de Gipuzkoa
Catro universidades do País Vasco e a Deputación de Guipúscoa asinan un acordo para fomentar o éuscaro entre o alumnado
Representantes da Universidade do País Vasco, a Universidade de Deusto, a Universidade de Mondragón e Tecnun reuníronse cun deputado provincial parar asinar un acordo de colaboración destinado a incidir nos hábitos lingüísticos e na motivación a prol do éuscaro entre o alumnado.
Fonte: DonostiTik
Nace un Trivial que busca impulsar o uso do éuscaro entre a xuventude
O Trivial en éuscaro ten como obxectivo impulsar o emprego desta lingua entre a xente nova de entre 12 e 17 anos. Trátase dun xogo interactivo de preguntas e respostas, sobre varios municipios vascos e tamén sobre o resto do mundo.
Fonte: Deia
O Concello de Éibar organiza un concurso de nanorrelatos en éuscaro
As bases deste concurso de nanorrelatos en éuscaro establecen que se debe enviar antes do 24 de febreiro unha historia, utilizando 200 caracteres, sobre un tema divertido e unha aventura inesperada.
Fonte: El Diario Vasco
Boletín
Subscríbase ao boletín
