BNG, Compromís, PNV, EH Bildu, JxCat, PDCAT, ERC, CUP, Más Madrid e Podemos rexistraron unha proposición non de lei no Congreso coa que se pretende acabar coas discriminación lingüística e garantir a pluralidade de linguas no Estado español e que recolle parte do manifesto ‘Liberdade, igualdade, democracia’ presentado por entidades de defensa das linguas cooficiais.  

Fonte: Nós Diario

Ademais de palabras relacionadas coa pandemia do coronavirus, o Dicionario da lingua española recolle outras como "trol", "nacho", "finde", "gastrobar" ou "fascistoide". Trátase dunha actualización que suma máis de 2500 novidades, tanto emendas como incorporacións, que xa están incluídas na súa edición dixital.

Fonte: Faro de Vigo

BNG, ERC, Junts e Bildu presentaron conxuntamente no Congreso unha emenda aos orzamentos xerais de 2021 para solicitar que Facenda traspase 10 millóns de euros a RTVE para que merque filmes, series e documentais en galego, catalán e éuscaro, co obxectivo de promover a produción audiovisual nas linguas oficiais minorizadas.

Fonte: Galicia Confidencial

Arredor de 147 000 persoas participarán na edición deste ano de Euskaraldia, unha iniciativa que ten como obxectivo mudar os hábitos lingüísticos e impulsar o emprego do éuscaro e que se celebra en todos os territorios onde se fala esta lingua: País Vasco, Navarra e Iparralde.

Fonte: Noticias de Navarra

O Sistema de Indicadores do Éuscaro (EAS), impulsado polos gobernos vasco e navarro, Euskararen Erakunde Publikoa e as tres deputacións forais vascas, acaba de renovar a súa web para que as persoas usuarias poidan consultar os datos dun xeito máis sinxelo, así como outros contidos, como vídeos, documentos, noticias etc.

Fonte: 20minutos

Quince organizacións xuvenís dos territorios de fala catalá impulsaron un acordo, que difundiron polas redes sociais co cancelo #FemHoEnCatalà, en defensa do catalán como lingua de acollida e cohesión social, así como o seu ensino nas aulas e o fomento da súa investigación e coñecemento.

Fonte: Generalitat de Catalunya

A plataforma Kontseilua e os sindicatos ELA e LAB pídenlle ao empresariado do País Vasco e de Navarra que nos acordos interprofesionais se pacte a negociación de plans para o uso do éuscaro nas compañías que teñan máis de 50 traballadores/as. Así mesmo, demándanlles aos gobernos de ambas as comunidades que apoien a medida a través de recursos económicos.

Fonte: Noticias de Gipuzkoa

Froito dun pacto entre ERC, PSOE e Unidas Podemos, na futura lei educativa eliminarase a referencia expresa a que o castelán sexa lingua vehicular, para blindar a inmersión lingüística en Cataluña, e obrigará a que o alumnado teña competencias en catalán e castelán.

Fonte: El Periódico

O Viquimarató de la Llengua Catalana celebrarase entre o 6 e o 13 de novembro e, a causa da pandemia, desenvolverase en liña co cancelo #ViquiLlengua7x7. Ademais, a novidade desta sétima edición é que, por vez primeira, participarán os sete territorios de fala catalá.  

Fonte: Generalitat de Catalunya

O acordo de colaboración asinado entre RTVE e o Instituto Cervantes ten como obxectivo promover e difundir a lingua e a cultura españolas a través dun incremento da información no ente público sobre este idioma.

Fonte: La Vanguardia