España
O Goberno do Principado introducirá o ensino do asturiano e o eonaviego nas escolas oficiais de idiomas
A partir do curso 2025-2026 as escolas oficiais de idiomas de Asturias ensinarán asturiano e eonaviego. Quen se apunte a estas linguas recibirá unha certificación propia, xa que non son oficiais.
Fonte: Principado de Asturias
A Deputación de Valencia convoca subvencións para concellos que premien o uso do valenciano no comercio
Os concellos da provincia de Valencia que presenten a súa solicitude á campaña «Som de barri, de ciutat, de botiga i de mercat» poderán recibir axudas para organizar premios ao uso do valenciano no comercio local.
Fonte: Diputació de València
Increméntanse as actuacións en catalán na quenda de oficio
No marco dunha xornada organizada polo Consello da Avogacía Catalá, déronse a coñecer datos sobre o uso do catalán no ámbito da xustiza, como o incremento de actuacións na quenda de oficio nesta lingua nun 68,9 % nos dous últimos anos.
Preséntase un novo tradutor de éuscaro baseado na intelixencia artificial
O Goberno vasco e Red Hat presentaron Itzuli, un proxecto que aproveita as vantaxes da intelixencia artificial para ofrecer servizos de tradución (do éuscaro ao español, francés e inglés), transcrición (voz a texto en éuscaro e español) e síntese (texto a voz en éuscaro, español, francés e inglés).
Fonte: Computing
A segunda fase do proxecto LEIA centrarase na creación de ferramentas para a proxección do español no ámbito da IA
A RAE está inmersa na segunda fase do proxecto LEIA na que se desenvolverán ferramentas, tecnoloxías e aplicacións para a proxección e o uso do español no ámbito da intelixencia artificial que se traducirá na creación dun observatorio de neoloxismos, tecnicismos, termos e variacións do español, e doutras ferramentas, como reposta a consultas lingüísticas, entre moitas outras.
Fonte: Real Academia Española
O Goberno vasco crea unha plataforma dixital para o ensino e a aprendizaxe do éuscaro
A plataforma dixital Ingura ofrecerá a posibilidade de aprender éuscaro desde calquera dispositivo, en calquera momento e lugar, de forma cómoda e flexible a través de exercicios baseados en vídeos. Así mesmo, permitirá un modelo titorizado moderno adaptado ás necesidades de aprendizaxe actuais.
Fonte: Gobierno Vasco
A Generalitat de Cataluña abre o prazo de solicitude de axudas para a incorporación do catalán en produtos tecnolóxicos
Estas axudas, destinadas a empresas para a incorporación do catalán en produtos tecnolóxicos de diferentes ámbitos, teñen como obxectivo aumentar a oferta nesta lingua.
Fonte: Generalitat de Catalunya
Organízanse colonias de verán para nenas e nenos do tres territorios onde se fala éuscaro
Os Gobernos vasco e navarro e o Organismo Público do Éuscaro organizan colonias de verán para nenas e nenos de entre 9 e 15 anos de todos os territorios onde se fala esta lingua. O obxectivo desta iniciativa é que utilicen o éuscaro na comunicación diaria fóra do ámbito escolar e en contextos lúdicos.
Fonte: Gobierno Vasco
Ponse en marcha unha campaña para incrementar as matrículas en Filoloxía Catalá
Baixo o lema «Pren la paraula. Tria Filologia Catalana», esta campaña busca promocionar os estudos de Filoloxía Catalá ante a crecente necesidade de profesionais neste ámbito, debido ás xubilacións das primeiras promocións e aos cambios sociodemográficos dos últimos anos.
Fonte: Generalitat de Catalunya
A Universidade de Zaragoza presenta unha investigación sobre o uso da lingua aragonesa
Para a realización desta investigación tomáronse como base máis 1000 enquisas realizadas en 2023 en 60 municipios da provincia de Huesca e do norte da de Zaragoza. Trátase do primeiro estudo de carácter sociolóxico centrado no uso do aragonés.
Fonte: Ronda Somontano
Boletín
Subscríbase ao boletín
