O Goberno de España creará o Observatorio Global do Español, que terá a súa sede na Rioxa, un centro de análise e prospectiva que fomentará o coñecemento e o prestixio desta lingua, así como das culturas hispánicas no proceso de transformación dixital.

Fonte: Fundéu

Baixo o lema «Ensenyants pel valencià», unha nova campaña insta as institucións públicas a facer un esforzo lexislativo e económico  para deter o retroceso do valenciano no sistema educativo. Todas as persoas que o desexen poden apoiar esta iniciativa a través da web www.ensenyantspelvalencia.org.

Fonte: Plataforma per la Llengua

A nova lei sobre o uso e a aprendizaxe das linguas oficiais na educación non universitaria axústase, de acordo co ditame do Consello de Garantías Estatutarias, á Constitución e ao Estatuto.

Fonte: El Periódico

Na Administración xeral do País Vasco, máis do 90 % do persoal interino acreditou o perfil lingüístico do seu posto, en función das características do servizo e o traballo que realizan,  o que garante a correcta execución en éuscaro das súas funcións.

Fonte: El Diario

Esta convocatoria, á que se destinaron 300 000 euros, está dirixida ás persoas adultas que queiran aprender éuscaro. As subvencións concederanse ás modalidades de internado, cursos extensivos e intensivos, autoaprendizaxe e cursos específicos.

Fonte: Gobierno de Navarra

O documental Fálame sempre versa sobre a lingua galega no territorio do Bierzo e está dirixido por Umberto Corral. Trátase dun proxecto colectivo elaborado por un equipo pequeno que se desprazou por varias localidades da zona para coñecer a súa situación lingüística.  

Fonte: El Bierzo Digital

O proxecto Anima-Euskera é unha homenaxe audiovisual e ilustrada a cinco personaxes que mantiveron vivo o éuscaro e a cultura en Navarra: Perpetua Saragüeta, Mariano Izeta, Julia Fernández Zabaleta, Ceferina Fontellas e Juan de Amendux.

Fonte: Diario de Navarra

Ao abeiro dunha campaña de promoción lingüística que ten como lema «En valencià és més dolç», o Concello de Xàtiva repartirá entre os establecementos hostaleiros do municipio máis de 170 000 sobres de azucre con frases feitas e refráns en valenciano.

Fonte: El Periòdic

O Plan estratéxico do éuscaro é produto do compromiso da Federación Guipuscoana de Fútbol que, consciente da importancia do deporte para a transmisión da lingua, quere usar o seu liderado e o seu papel como referente para fomentar o seu uso nas relacións internas e externas, nos partidos e nos adestramentos.

Fonte: Noticias de Gipuzkoa

O Plan de fortalecemento do catalán no sistema universitario foi asinado por todas as universidades públicas e privadas, agás a Abat Oliba. O obxectivo deste plan é que en 2025 nas universidades o 80 % das clases se imparta nesta lingua.

Fonte: El País