O Goberno vasco, as tres deputacións forais vascas, os concellos de Vitoria-Gasteiz, Bilbao e San Sebastián, EUDEL e UEMA acordaron unha declaración institucional con motivo do Día Internacional do Éuscaro, que se celebra o 3 de decembro, na que destacan a necesidade de gañar espazos para o uso desta lingua en ámbitos informais.

Fonte: Gobierno Vasco

Sortearanse seis premios de 100 euros entre comerciantes e cidadáns que realicen as súas compras en éuscaro nos vindeiros días, para o cal deberán enviarse fotos do vendedor e o comprador por Whatsapp antes do 10 de decembro.

Fonte: El Diario Vasco

Este acordo ten como obxectivos fomentar un uso correcto do español na intelixencia artificial e garantir a unidade desta lingua con todas as súas variedades. A iniciativa enmárcase no proxecto LEIA que naceu para normativizar o bo uso do idioma nas máquinas.

Fonte: Real Academia Española

A Deputación Foral de Biscaia puxo en marcha 'Ondarea, Berbetan', unha iniciativa que ten como obxectivo visibilizar a presenza do éuscaro nos museos forais mediante uns soportes físicos que mostrarán un alfabeto nesta lingua con termos que identifican cada museo. Ademais, as persoas visitantes disporán dun pequeno dicionario con estas palabras acompañadas do seu significado en castelán, inglés e francés.

Fonte: El Diario

O Instituto de Estudos Cataláns incorporou neste ano 2021 á versión dixital do seu dicionario cen palabras e modificou outras 239. O ámbito da saúde é un dos que máis novidades achega a causa da pandemia, aínda que non é o único.

Fonte: La Vanguardia

A Eurorrexión Pireneos Mediterránea creou un grupo de linguas para impulsar o catalán e o occitano, que son as linguas propias dos territorios que engloba, isto é, Cataluña, Baleares e Occitania. Este grupo porá en marcha dous proxectos piloto: un para fomentar o seu uso entre a mocidade nas redes sociais e outro para intercambiar experiencias no ensino para adultos.  

Fonte: Generalitat de Catalunya

A iniciativa Arnas Dezagun ten como obxectivo denunciar a dispersión do alumnado falante de éuscaro, así como pedirlles ás Administracións e aos centros educativos que se garantan espazos vitais cómodos para comunicarse nesta lingua.  

Fonte: Naiz

O Concello de Palma repartiu entre o seu funcionariado un resumo da normativa lingüística municipal. Nesta establécese que deben usar o catalán na tramitación de documentos e na relación coa cidadanía, coa que só empregarán o castelán se piden atención nesta lingua.  

Fonte: Faro de Vigo

A campaña «Creixent al caliu» pon a disposición das escolas infantís de Valencia material didáctico e un programa de actividades para a promoción do uso do valenciano como lingua transversal co obxectivo de sensibilizar as familias e a sociedade en xeral sobre a importancia da transmisión desta lingua.

Fonte: 20minutos

A terceira edición de Euskaraldia, cuxa prioridade será dotar a cidadanía de recursos máis eficaces para cambiar os seus hábitos lingüísticos, celebrarase o vindeiro ano baixo o lema «Hitzez ekiteko garaia» (tempo de actuar coa palabra).

Fonte: El Diario Vasco