España
A Universidade Politécnica de Valencia organiza titorías de valenciano para a formación lingüística do persoal docente e investigador
A Universidade Politécnica de Valencia, a través do Servizo de Promoción e Normalización Lingüística, ofrece de novembro de 2025 a maio de 2026 titorías individualizadas en liña para o PDI co obxectivo de mellorar o uso oral e escrito do valenciano, a competencia comunicativa e a docencia nesta lingua. As sesións, semanais e adaptadas ao horario das persoas interesadas, desenvolveranse por Teams. Haberá dúas modalidades: unha centrada nos contidos lingüísticos segundo o nivel (A2-C2) e outra orientada á mellora da comunicación, dispoñible a partir do nivel B2.
Ponse en marcha en Lasarte-Oria un proceso estratéxico para fomentar o éuscaro a través da participación cidadá
O Concello de Lasarte-Oria presentou AROA, unha estratexia para reforzar o éuscaro no municipio mediante diagnóstico, participación cidadá e deseño conxunto de accións. A iniciativa, que se desenvolverá entre outubro de 2025 e a primavera de 2026, terá dúas fases: análise da situación lingüística e elaboración dun plan con obxectivos, eixes e mecanismos de seguimento.
Fonte: Ayuntamiento de Lasarte-Oria
Preséntase unha nova edición de Sormene, o festival de creación cultural en éuscaro
Galdakao acollerá do 4 ao 12 de outubro a oitava edición de Sormene, festival de creación cultural en éuscaro que combina espectáculos, coloquios e talleres para todas as idades. Baixo o lema «Garai eta gizarte likidoak», a programación, con sete propostas en éuscaro, busca reforzar a transmisión cultural e achegar a creación vasca a novos públicos.
Fonte: Radio Popular
Créase un órgano colexiado para a análise, o impulso e a coordinación do uso das linguas oficiais na Administración Xeral do Estado
O Ministerio de Política Territorial e Memoria Democrática vén de crear, mediante o Real Decreto 798/2025, o Consello das Linguas Oficiais, órgano colexiado encargado de analizar e coordinar o uso das linguas cooficiais na Administración do Estado. O decreto establece tamén a Oficina para as Linguas Oficiais, concibida como unidade permanente de apoio e promoción, que asumirá funcións de estudo, planificación, asesoramento e seguimento da presenza destes idiomas na Administración.
Fonte: Consello da Cultura Galega
Segundo unha enquisa, case unha cuarta parte do persoal de bares e restaurantes de Barcelona non entende o catalán
Un informe sobre o sector da restauración en Barcelona revela que só o 52,4 % do persoal fala catalán e que un 24,2 % nin sequera o entende, cifras que empeoran respecto ao ano anterior. Ante estes datos, o Concello comprometeuse a reforzar a inspección e mellorar a aplicación da normativa lingüística para frear a regresión do catalán nos establecementos.
Fonte: Diari de la Llengua
O Concello de Bilbao impulsa o uso do éuscaro no ámbito dixital entre a mocidade
O Concello de Bilbao acollerá o 1 de outubro a primeira edición de XARE, encontro que reunirá 300 estudantes de bacharelato para promover a creación dixital en éuscaro e dar a coñecer o ecosistema tecnolóxico e cultural euscaldún. A iniciativa busca que a mocidade pase de ser consumidora a creadora de contidos e ferramentas.
Fonte: Bilboko Udala
O Concello de Vitoria-Gasteiz incrementa o orzamento para proxectos de promoción do uso do éuscaro
A Xunta de Goberno Local aprobou ampliar en 30 000 euros a convocatoria de subvencións para proxectos de promoción do éuscaro, que ascende así a 199 000 euros, 103 000 máis ca no ano anterior. O principal incremento destínase ás AMPA pero a convocatoria abrangue tamén proxectos en deporte e lecer, medios de comunicación e accións culturais ligadas ao Día Internacional do Éuscaro.
Convócase unha nova edición do Premio Morales para a promoción da lingua galega no Bierzo e na Seabra
A Xunta de Galicia e Edicións Positivas convocan a VI edición do Premio Morales cuxo obxectivo é promover o galego no Bierzo e na Seabra e que está dirixido ao alumnado incluído no programa de fomento da lingua nestas zonas. O certame presenta dúas categorías: unha para infantil e primaria e outra secundaria e bacharelato, ambas baseadas nun poema de Antonio Fernández Morales.
Fonte: Consello da Cultura Galega
A Coordinadora de Asociacións pola Lingua Catalá comeza unha campaña para chegar aos 300 grupos de conversa para practicar o catalán
A campaña busca chegar a 300 grupos Xerrem de conversa en catalán, como vía de reforzar o uso social da lingua e fomentar a cohesión. Actualmente existen arredor de 230 grupos de distintos niveis, polo que fai un chamamento a voluntariado, persoas colaboradoras... para acadar este obxectivo.
Fonte: Diari de la Llengua
O Congreso estuda unha reforma que obriga as grandes empresas a ofrecer atención en galego, catalán e éuscaro
O Congreso analizará unha reforma legal que obrigará as grandes empresas e as que presten servizos de interese xeral a ofrecer atención en todas as linguas cooficiais. A medida, que afecta sectores como enerxía, telecomunicacións ou transporte, inclúe tamén a prohibición de chamadas comerciais non desexadas e novas garantías para o consumo en liña.
Fonte: Capital
Boletín
Subscríbase ao boletín
