O IVAP abriu a primeira convocatoria de 2026 para acreditar coñecementos de éuscaro entre o persoal de Osakidetza, cun prazo de inscrición aberto ata o 16 de febreiro. A convocatoria incorpora cambios nos niveis de acreditación, coa ampliación dos perfís e a súa adaptación ao marco europeo de referencia das linguas.

Fonte: SATSE

En Petrer comeza a terceira edición do programa Voluntariat pel Valencià, unha iniciativa gratuíta de Escola Valenciana que promove a práctica oral sen clases teóricas nin exames. O proxecto pon en contacto persoas que queren gañar fluidez con voluntariado que xa domina a lingua, mediante “parellas lingüísticas”. Cada parella comprométese a se xuntar unha hora á semana durante dez semanas para conversar en valenciano en situacións cotiás, fóra da aula. A proposta, que cumpre vinte anos, pretende incrementar o número de falantes ao facilitaren un uso real e continuado da lingua.

Fonte: Ayuntamiento de Petrer

Sete clubs deportivos de Hernani asinaron un convenio para deseñaren e aplicaren, durante catro anos, plans que convertan as entidades en espazos onde o éuscaro sexa a lingua principal. O Concello comprométese a apoiar o proceso con recursos e asesoramento externo, ao entender que os clubs non dispoñen de medios dabondo para o afrontaren en solitario. A medida insírese no marco do Plan de Éuscaro 2023-2027 do municipio.

Fonte: Hernaniko Udala

Segundo a Enquisa de Usos Lingüísticos da Poboación (2023), o catalán perdeu presenza social desde 2003 e deixou de ser maioritario en diferentes ámbitos, con retrocesos claros nas amizades, no fogar, no comercio, na banca e na atención sanitaria. O uso exclusivo do catalán baixou de forma marcada e medrou o peso doutras linguas, ao tempo que aumenta a identificación simultánea con catalán e castelán. A enquisa tamén amosa que só unha minoría mantén o catalán cando a outra persoa responde en castelán (13,2%), aínda que as persoas maiores o sosteñen máis ca os grupos novos. Ademais, medra a proporción de quen non pensa empregar o catalán no futuro, o que reforza a idea dun cambio de tendencia a longo prazo.

Fonte: Diari de la Llengua

A Deputación Foral de Guipúscoa cederalles a HiTZ Zentroa (EHU) e a Euskorpora corpus e contidos propios para reforzar a presenza do éuscaro nas tecnoloxías de intelixencia artificial. O convenio pretende paliar a falta de datos nesta lingua e mellorar modelos públicos e abertos, con aplicacións útiles tamén para a administración e a industria.

Fonte: Diputación Foral de Gipuzkoa

O portal Diximed incorporou unha versión en éuscaro para achegar contidos de saúde á infancia, con vocabulario básico, atlas do corpo e infografías pensadas para consultas sinxelas. A iniciativa, nacida para explicar termos médicos con claridade a persoas de 6 a 12 anos, engade 300 entradas con debuxos e gravacións, ademais dun apartado sobre a covid-19. O obxectivo desta ferramenta, impulsada pola Universidade do País Vasco e EWKE, pasa por difundir ao máximo este recurso libre, na liña doutros materiais científicos en éuscaro.

Fonte: Universidad del País Vasco

O Premio Pedro Lafuente en aragonés ten como obxectivo impulsar a creación literaria e recoñecer o labor de difusión desta lingua. O certame inclúe catro modalidades —narración curta, poesía, infancia (3-12 anos) e empresa—, ás que se poden presentar textos inéditos en aragonés ata o 2 de abril de 2026. A dotación suma 1300 euros para as categorías literarias e un recoñecemento honorífico para a modalidade empresarial.

Fonte: Ayuntamiento de Huesca

O Instituto de Estudos Cataláns (IEC) e o Congreso dos Deputados asinou un convenio de colaboración para promover o uso do catalán no ámbito xurídico, especialmente nas iniciativas lexislativas. O acordo establece un marco de colaboración para traducir e publicar en catalán as leis aprobadas no Congreso e garantir así que esta lingua sexa usada de maneira normalizada en todos os ámbitos xurídicos.

Fonte: Institut d'Estudis Catalans

DeepL lanzou recentemente a incorporación do catalán, o éuscaro, o galego e o aragonés á súa plataforma de tradución automática, co que responde así á necesidade de mellorar a comunicación profesional en contornos onde estas linguas se usan regularmente. A nova funcionalidade busca facilitar a interacción nas empresas e administracións, e mellorar a axilidade na atención ao cliente, a documentación e as operacións diarias. Esta ampliación forma parte dunha estratexia máis ampla de DeepL para ampliar a súa oferta lingüística e mellorar as ferramentas de automatización e integración de tradución.

Fonte: What's New

Òmnium Cultural, xunto con Pimec, UEI-Foment del Treball e os sindicatos UGT e CC. OO., asinou un convenio para ofrecer clases de catalán en catro empresas como parte do proxecto Vincles. O obxectivo é promover o uso do catalán no ámbito laboral, creando espazos de socialización na lingua no traballo. O proxecto, que se comezará a implementar en abril, permitirá mellorar a integración lingüística dos traballadores e fomentar a cohesión social e laboral.

Fonte: Diari de la Llengua