A plataforma Kontseilua e os sindicatos ELA e LAB pídenlle ao empresariado do País Vasco e de Navarra que nos acordos interprofesionais se pacte a negociación de plans para o uso do éuscaro nas compañías que teñan máis de 50 traballadores/as. Así mesmo, demándanlles aos gobernos de ambas as comunidades que apoien a medida a través de recursos económicos.

Fonte: Noticias de Gipuzkoa

Froito dun pacto entre ERC, PSOE e Unidas Podemos, na futura lei educativa eliminarase a referencia expresa a que o castelán sexa lingua vehicular, para blindar a inmersión lingüística en Cataluña, e obrigará a que o alumnado teña competencias en catalán e castelán.

Fonte: El Periódico

O Parlamento de Navarra rexeitou unha proposta para garantir que o coñecemento do éuscaro se valore como mérito nas prazas que se cubran a través de concurso e concurso-oposición.

Fonte: El Confidencial Digital

A directora xeral de Política Lingüística deu a coñecer os resultados das análises sobre a situación lingüística do comercio en localidades estudadas en 2019 e as liñas xerais dos plans locais que se presentarán progresivamente nas vindeiras semanas.   

Fonte: Generalitat de Catalunya

As axudas para o fomento do uso do catalán, convocadas en xuño, repartirán 225 000 euros entre proxectos de voluntariado lingüístico, actividades formativas para colectivos específicos, de lecer, de integración lingüística e de sensibilización.

Fonte: La Vanguardia

O Instituto de Estudios Baleáricos vai poñer en funcionamento o Centro de Catalán Virtual, unha iniciativa que ten como obxectivo garantir que quen o desexe poida preparar un nivel de catalán ou perfeccionar o que xa ten. Incluirá recursos e ligazóns para a aprendizaxe desta lingua, así como un equipo de asesoramento para responder dúbidas e preguntas.

Fonte: 20minutos

O actual presidente do Principado, Adrián Barbón, parecía disposto a abrir o debate sobre a oficialidade do asturiano, pero a irrupción do coronavirus sacou da axenda política o tema da reforma do Estatuto de Autonomía para facela posible.

Fonte: Asturies.com

O Goberno vasco implantará a gratuidade da matrícula para o alumnado de entre 16 e 30 anos que acredite o nivel C1 de éuscaro. O obxectivo desta iniciativa é axudar a que a mocidade adquira unha capacitación lingüística máis elevada para que poida desenvolver a súa carreira profesional nesta lingua.

Fonte: Noticias de Gipuzkoa

Co lema Euskaraz, talentua gara!, organizarase unha campaña de identificación e difusión de boas prácticas, con charlas para responsables dos centros de FP e almorzos de traballo con responsables dos centros de traballo co obxectivo de reflexionar sobre o uso e as funcións das linguas e amosar o valor engadido que ofrece o éuscaro no mundo laboral.

Fonte: Gobierno Vasco

A Plataforma per la Llengua presentou nas Illas Baleares o Selo de Produto Lingüisticamente Responsable para implantar nas empresas do arquipélago co obxectivo de identificar os produtos etiquetados en catalán e impulsar o seu consumo.

Fonte: La Vanguardia