Segundo unha enquisa, a porcentaxe de persoas de 16 anos ou máis que fala éuscaro en Navarra pasou do 12,9 % de 2016 ao 14,1 % en 2018. Esta é, soa ou xunto ao castelán, a primeira lingua do 9,1 % da poboación da Comunidade Foral, unha porcentaxe que se incrementa ata o 15,1 % no caso da xente nova.

Fonte: Diario de Navarra

A concentración produciuse fronte ao Tribunal Superior de Xustiza da Comunidade Valenciana para mostrar o rexeitamento ás sentenzas do Tribunal Supremo que confirman a anulación parcial do decreto sobre o uso do valenciano na Administración.

Fonte: La Vanguardia

Esta nova ordenanza establece un bilingüismo asimétrico nas relacións interadministrativas e coa cidadanía, o que significa que se respecta a vontade da persoa destinataria á hora de escoller unha ou outra lingua (éuscaro ou castelán).

Fonte: Navarra Información

Esta convocatoria anual de axudas por valor de 575 000 euros está destinada aos medios de comunicación en catalán e ten como obxectivo impulsar a presenza desta lingua nos medios do arquipélago.

Fonte: UH Noticias

O IVAP (Instituto Vasco de Administración Pública) realizou unha versión do tradutor automático neuronal Itzuli especializada na linguaxe xurídico-administrativa. Agárdase que esta nova ferramenta resulte útil para o uso e a normalización do éuscaro por parte do persoal da Administración pública.

Fonte: Gobierno Vasco

A Deputación de Zamora organiza este verán obradoiros hispano-portugueses gratuítos para nenas e nenos de entre 7 e 12 anos cos que se pretende realizar unha aproximación á lingua e á cultura portuguesas a través da literatura, a música ou a gastronomía.

Fonte: Noticias CYL

A Generalitat convoca este ano oito liñas de axudas, ás que destinará 3,66 millóns de euros, para o fomento do catalán, cunha partida de ata 1 700 000 € para subtítulos e dobraxe; o impulso do aranés, para o que irán 70 000 €;  e a difusión e a promoción da lingua de signos catalá, á que se dedicarán outros 45 000.

Fonte: Generalitat de Catalunya

A campaña #Apúntate ten como finalidade animar o alumnado a matricularse para o vindeiro curso nas materias de Lingua e Literatura Asturianas e de Galego-Asturiano.

Fonte: El Digital de Asturias

Gehiago, gehiagorekin, gehiagotan (máis, con máis xente, en máis ocasións) é o lema da vindeira edición de Euskaraldia, iniciativa de fomento do uso do éuscaro que se celebrará entre o 20 de novembro e o 4 de decembro. Como novidade deste ano crearanse espazos protexidos para o uso desta lingua (arigune) en todo tipo de entidades, empresas e asociacións.

Fonte: Gobierno Vasco

A Dirección Xeral de Política Lingüística presentou unha base de datos de discos en catalán editados no arquipélago balear entre setembro de 2018 e marzo de 2020. O obxectivo desta iniciativa é impulsar a contratación de artistas que cantan nesta lingua, así como divulgar a oferta cultural neste idioma.

Fonte: La Vanguardia