España
As entidades vinculadas ao fomento da lingua catalá ven na crise da COVID-19 unha oportunidade para o tránsito ao formato dixital
A conselleira de Cultura da Generalitat mantivo unha reunión telemática con representantes das entidades relacionadas co fomento da lingua catalá na que estas expresaron a súa visión sobre a situación que están a vivir pola crise provocada pola COVID-19.
Fonte: Generalitat de Catalunya
O Goberno de Cataluña comprométese a mellorar a incorporación da lingua de signos catalá nas comunicacións coa Administración
A conselleira de Cultura mantivo unha reunión telemática con representantes da Federación de Persoas Xordas de Cataluña na que se comprometeu a ampliar a atención en lingua de signos catalá nas xestións coa Generalitat a través das novas tecnoloxías.
Fonte: La Vanguardia
Dúas profesoras de centros de Xàbia poñen en marcha unha iniciativa lingüística para o confinamento
‘Reto de palabras’ é o nome desta iniciativa que intenta buscar palabras distintas que nomean unha mesma cousa. Este reto, posto en marcha nas redes sociais por dúas profesoras de Xàbia, ten como obxectivo amosar a riqueza lingüística do valenciano e axudar a pasar o tempo de lecer dun xeito diferente durante o confinamento.
Fonte: Xàbia.com
Udaltop, o encontro de servizos municipais de éuscaro, pon o foco este ano no ámbito socioeconómico
Udaltop, o encontro de servizos municipais de éuscaro, chega á súa duodécima edición, que estará dedicada impulsar o uso desta lingua no ámbito socioeconómico. A emerxencia sanitaria provocada pola COVID-19 obrigará a adaptar a xornada de 2020 que se celebrará o 14 de maio e que se realizará por vía telemática.
Fonte: Gobierno Vasco
Aula Mestra, espazo virtual para o ensino e a aprendizaxe de catalán, incrementa o seu número de usuarios na etapa de confinamento
O espazo virtual de aprendizaxe e ensino da lingua catalá Aula Mestra, destinado a docentes e estudantes de todo o mundo, aumentou notablemente a súa actividade no período de confinamento, con 113 novos cursos, que alcanzan así a cifra de 229, e 1000 usuarios máis que se suman aos 30 000 que xa tiña.
Fonte: Generalitat de Catalunya
Amplíase a consulta en liña de obras do Centro de Documentación da Dirección Xeral de Política Lingüística da Generalitat de Cataluña
O Departamento de Cultura adaptou a web do Centro de Documentación para facilitar a consulta en liña de obras de carácter sociolingüístico, así como outros recursos como artigos, revistas sobre lingua, noticias lingüísticas etc.
Fonte: Generalitat de Catalunya
Ponse en marcha nas redes sociais unha mobilización para pedir a oficialidade do asturiano
A Xunta pola Defensa de la Llingua Asturiana organizou para o 8 de maio unha campaña nas redes sociais co obxectivo de que a xente publique frases a favor da oficialidade do asturiano co cancelo #Oficialidá.
Fonte: 20minutos
Ponse en marcha en Castelló o voluntariado lingüístico en liña para conversar en valenciano
O Concello de Castelló e Escola Valenciana poñen en marcha o voluntariado lingüístico en liña, unha iniciativa que ten como obxectivo poñer en contacto a través da rede as persoas participantes para que poidan practicar valenciano sen saír da casa.
Fonte: El Periòdic
Segundo un estudo do Concello de Pamplona, o 36 % das persoas enquisadas aposta por modelos con éuscaro nas escolas infantís de 0 a 3 anos
O Concello de Pamplona realizou un estudo lingüístico que pon de manifesto que o 13 % das persoas enquisadas elixiría un modelo en éuscaro na educación infantil de 0 a 3 anos; o 10 %, éuscaro con inglés; o 8 %, castelán con éuscaro; e o 5 %, un modelo trilingüe con inglés.
Fonte: Noticias de Navarra
O centro educativo de Treviño podería incluír a materia de éuscaro
O alcalde de Treviño avanzou que aspira a poder incluír a materia de éuscaro no colexio do municipio e avanzar así na normalización desta lingua no enclave, onde xa levan a cabo outras iniciativas para fomentar o seu uso entre a veciñanza.
Fonte: Diario de Burgos
Boletín
Subscríbase ao boletín
