España
O Goberno vasco aproba un decreto sobre o uso institucional e administrativo das linguas oficiais nos concellos
O Decreto sobre a normalización do uso institucional e administrativo das dúas linguas oficiais nas institucións locais de Euskadi recoñece e reforza a autonomía municipal para decidir, mediante ordenanza, regulamento ou plan, as directrices e os criterios de utilización, oral e escrita, de éuscaro e castelán.
Fonte: Naiz
A televisión pública catalá estrea en xaneiro un novo programa sobre lingua
O novo programa de TV-3 El llenguado estará centrado na lingua pero con moitos toques de humor. Nel falarase sobre o catalán dunha forma distendida e pouco académica, combinando a divulgación e o entretemento.
Fonte: El Periódico
O Ministerio de Educación publica un informe sobre a ensinanza de linguas cooficiais, rexionais e minoritarias en España
O informe Eurydice analiza a ensinanza das linguas cooficiais, rexionais e minoritarias nas administracións educativas. En concreto, fálase da situación, na educación infantil e primaria, de galego, catalán, éuscaro, valenciano e aragonés.
Fonte: Lenguas de Aragón
Os concellos da comarca de L’Horta traballarán conxuntamente para ofrecer unha plataforma electrónica en valenciano
Os municipios valencianos de L’Horta traballan en conxunto para traducir a interface de Sedipualb@, o software da Deputación de Albacete, á lingua valenciana ante as esixencias da Lei 39/2015, que dispón que todos os concellos de España deben implantar a administración electrónica para o ano 2020.
Fonte: Levante EMV
O número de alumnos do Bierzo e Sanabria que estudan galego increméntase por terceiro ano consecutivo
O número de alumnos do Bierzo e Sanabria que estudan galego vén de incrementarse por terceiro ano consecutivo. Concretamente, 34 alumnos incorporáronse no ano académico en curso ao Programa de promoción da lingua galega no Bierzo e en Sanabria.
Fonte: O Portal da Lingua Galega
O municipio castellonenco de Vila-real convoca axudas para a promoción do valenciano destinadas a asociacións sen ánimo de lucro
As axudas, convocadas pola Concellería de Normalización Lingüística, están dirixidas á promoción de actividades que fomenten o uso do valenciano en rótulos, documentación, actuacións musicais e teatrais, así como ao emprego deste como lingua vehicular para diversos espazos nos que as asociacións poidan estar traballando.
Fonte: El Periódico Mediterráneo
Solicitan o recoñecemento da especialidade docente de asturiano como unha necesidade para o profesorado desta lingua
Iniciativa polo Asturiano solicítalles aos deputados de Asturias que acheguen esta necesidade ao Goberno central para así recoñecer e mellorar as condicións dos docentes de lingua asturiana ao considerar que se atopan nunha situación de desigualdade respecto a mestres e mestras doutras materias.
Fonte: La Voz de Asturias
O Parlamento de Navarra rexeita unha moción para retirar de uso varios libros de texto en éuscaro
O Pleno do Parlamento votou finalmente en contra de retirar de uso, así como dos programas de gratuidade, varios modelos de libros de texto que, segundo un informe de 2009, non concordan coa realidade institucional de Navarra.
Fonte: Navarra Información
Comeza a segunda fase de “Erraza da”, unha iniciativa para dinamizar o uso do éuscaro na hostalería da zona vella de Donostia
Despois da boa acollida da primeira edición da iniciativa “Erraza da”, o 9 de decembro comezará a segunda fase do programa, que contará cun novo dicionario, prolongación do primeiro, con vocabulario de uso frecuente para o sector da hostalería.
Fonte: DonostiaEuskaraz
O Consello do Audiovisual de Cataluña demanda máis contidos en catalán nas plataformas audiovisuais baixo demanda
O Consello Audiovisual de Cataluña solicitou incluír na directiva audiovisual europea novas medidas que impliquen máis producións en catalán nos catálogos das plataformas de vídeo baixo demanda, como Netflix ou HBO.
Fonte: La Vanguardia
Boletín
Subscríbase ao boletín
