España
Convócanse axudas para a promoción do catalán e do aranés en disciplinas vinculadas coa cultura
O prazo de solicitude das axudas para a promoción das linguas catalá e aranesa en disciplinas vinculadas á cultura comeza neste mes de febreiro. Entre outras, servirán de apoio a iniciativas de proxección exterior da creación literaria a través da tradución a outras linguas, a internacionalización da produción cultural etc.
Fonte: Generalitat de Catalunya
Apróbase o proxecto de lei da función pública valenciana que esixirá o requisito lingüístico para acceder á Administración
O proxecto de lei da función pública valenciana establece, por primeira vez nesta comunidade, a esixencia, para quen queira acceder a un emprego na Administración, dunha capacitación lingüística de valenciano proporcional e adecuada ao posto que se vaia desempeñar.
Fonte: La Vanguardia
O Goberno de Cataluña pon en marcha unha iniciativa para impulsar a voz dixital en catalán
O proxecto para fomentar a voz dixital en catalán enmárcase nun plan para os vindeiros tres anos que contén unha serie de medidas para impulsar esta lingua e que está dotado dun orzamento de 1,5 millóns de euros.
Fonte: La Vanguardia
A Plataforma Vasca da Industria analiza os obxectivos de promoción do éuscaro no tecido industrial para o ano 2020
A Plataforma Vasca da Industria (Indeus) celebrou a súa asemblea co obxectivo de analizar a súa traxectoria como soporte á competitividade das empresas vascas mediante o incremento da presenza do éuscaro no ámbito industrial.
Fonte: Goberno Vasco
O éuscaro supón o 5,34 % do PIB de Guipúscoa
Segundo un informe da Asociación de Industrias da Lingua no País Vasco, Langune, o 5,34 % do PIB de Guipúscoa, é dicir, uns 1300 millóns de euros, corresponde a sectores económicos vinculados directa ou indirectamente co éuscaro, mentres que para o conxunto do País Vasco a porcentaxe se sitúa nun 4,59 %.
Fonte: Noticias de Gipuzkoa
A alcaldesa de Vic apoia a campaña que anima a falarlles en catalán ás persoas que teñan aparencia de non seren catalás
A alcaldesa de Vic e deputada no Parlamento de Cataluña, Anna Erra, defendeu que as persoas falantes de catalán se dirixan nesta lingua ás que polo seu aspecto ou acento non aparenten falala, en referencia á campaña 'No em canviïs la Llengua' (Non me cambies a lingua) lanzada hai uns meses.
Fonte: La Vanguardia
A aprendizaxe do éuscaro nos euskaltegis do País Vasco será gratuíta ata o nivel B2
O Goberno vasco, as tres deputacións forais e Eudel destinarán catro millóns de euros á aprendizaxe do éuscaro ata o nivel B2 para que sexa gratuíta en todos os euskaltegis da comunidade. Para acceder ás subvencións e conseguir a gratuidade dos cursos, o alumnado deberá cumprir dous requisitos: asistir ao 75 % das clases e superar o nivel correspondente.
Fonte: Goberno Vasco
A Comisión de Asuntos Cidadáns do Concello de Pamplona pide un pacto sobre os modelos lingüísticos das escolas infantís municipais
Esta comisión aprobou unha declaración para impulsar un pacto político dos diferentes grupos municipais para regular o modelo lingüístico das escolas infantís que dependen do Concello de Pamplona.
Fonte: Pamplona Actual
O Tribunal Superior de Xustiza do Principado de Asturias anula a ordenanza de uso do asturiano do Concello de Mieres
A sentenza do Tribunal Superior de Xustiza do Principado de Asturias indica que un concello carece de potestade para regular o uso dunha lingua que, como o asturiano, non é oficial, e situala en igualdade de condicións que o castelán, que si o é.
Fonte: La Voz de Asturias
Organizacións que traballan a prol das linguas minorizadas do Estado piden no Congreso o recoñecemento da igualdade lingüística
Representantes de organizacións que traballan en defensa do galego, o éuscaro, o aragonés, o asturiano ou o catalán presentaron o manifesto 'Igualdade lingüística: liberdade, pluralidade e democracia' para esixirlle ao Goberno que tome as medidas requiridas polo Consello de Europa en relación con estas linguas.
Fonte: La Vanguardia
Boletín
Subscríbase ao boletín
