España
Varios concellos de Biscaia comezan unha campaña para promover o éuscaro nas peixerías
Portugalete, Santurtzi e Sestao puxeron en marcha esta iniciativa que busca dar a coñecer o nome dos peixes en éuscaro a través de diversos carteis informativos, e invitar así a cidadanía a empregar o idioma no seu día a día.
Fonte: En Portugalete
O Concello de Castelló presenta unha nova campaña de promoción do valenciano
A nova campaña de promoción do valenciano posta en marcha polo Concello de Castelló ten como lema 'I avant' e o seu obxectivo é promover o uso desta lingua a través de actos e obxectos cotiáns.
Fonte: Castelló Extra
Chega unha nova edición do concurso de promoción do asturiano Xixón Fala en 3
O concurso Xixón Fala en 3, organizado polo Concello, busca promover o asturiano entre a cidadanía para o que as persoas participantes deben defender un tema determinado nesta lingua durante tres minutos empregando un rexistro culto.
Fonte: Asturies.com
Eivisa retoma o seu programa de voluntariado lingüístico
O Concello de Eivisa e o Instituto de Estudos Eivisencos renovan o programa de voluntariado lingüístico municipal co obxectivo de aumentar o uso social do catalán e crear un marco no que as persoas que non o falan poidan practicalo.
Fonte: Sóller
A Consellería navarra de Educación e a AEK asinan un convenio para mellorar a capacidade oral en éuscaro entre o alumnado
A Consellería de Educación do Goberno de Navarra e a AEK asinaron o contrato do programa educativo Solaskide por valor de 98 280 euros para fomentar a capacidade oral en éuscaro do alumnado a través de actividades de reforzo da expresión.
Fonte: Navarra.es
Ponse en marcha Astrollengua, un proxecto que combina o catalán coa astronomía
O Instituto Mallorquino de Ciencias do Espazo puxo en marcha o proxecto Astrollengua, unha iniciativa destinada ao alumnado de Secundaria co obxectivo de que coñeza termos científicos correctos en catalán ao tempo que adquire coñecementos sobre astronomía.
Fonte: Última Hora
Constitúese en Xixón o Consello Asesor da Lingua
O Consello Asesor da Lingua, un órgano de carácter municipal creado en Xixón, celebrou a súa primeira reunión na que se acordou a creación dunha comisión executiva para avaliar o plan de normalización lingüística do asturiano e deseñar actividades para desenvolver o vindeiro ano.
Fonte: El Comercio
Xixón contará cun protocolo para impulsar medidas de dignificación social do asturiano
O Concello de Xixón e a Academia da Lingua Asturiana mantiveron unha reunión na que se comprometeron a colaborar no impulso de medidas que favorezan a dignificación social do asturiano na cidade.
Fonte: La Voz de Asturias
Ponse en marcha unha campaña para reclamarlles aos gobernos que traballen pola unidade da lingua catalá
A campaña ‘Som 10 milions, som una llengua’ ten como obxectivo acabar cos intentos de fragmentación que está a sufrir o catalán, unha lingua que falan máis de 10 millóns de persoas en Andorra, España, Francia e Italia.
Fonte: Plataforma per la Llengua
O Concello de Bilbao e os euskaltegis da cidade organizan un novo programa de actividades gratuítas en éuscaro
O programa Darabilbo busca fomentar o uso do éuscaro e a súa normalización entre a sociedade a través de actividades de cultura e tempo libre, como visitas guiadas a museos, sesións de danza ou actividades gastronómicas.
Fonte: El Diario
Boletín
Subscríbase ao boletín
