O Concello de Azkoitia concederá como máximo a cada empresa 2000 euros anuais, que se complementarán coa subvención que reciban do Goberno vasco, para desenvolver plans de éuscaro. Entre os requisitos para solicitar a axuda figuran dispoñer de domicilio social e fiscal en Azkoitia e que o plan estea deseñando ou que se estea a desenvolver no exercicio en que se concede esta.

Fonte: Diario Vasco

A Xunta de Goberno local de Bilbao aprobou un novo plan de normalización do éuscaro, cuxa vixencia se estenderá ata 2022, co obxectivo de fomentar o uso desta lingua entre o persoal do Consistorio e que se centrará en dous eixes de actuación: o servizo á cidadanía e o traballo interno do funcionariado.

Fonte: El Correo

A Asociación de Publicacións Periódicas en Catalán (APPEC) lanzou a campaña “Sigues lliure, llegeix” co obxectivo de impulsar a lectura de revistas nesta lingua, así como combater a manipulación informativa e as noticias faltas.

Fonte: Generalitat de Catalunya

Turismo de Aragón, coa colaboración da Dirección Xeral de Política Lingüística, impulsou, no marco do proxecto Linguatec, Aragonario, un dicionario en liña castelán-aragonés. Trátase dunha ferramenta sinxela que, ademais de traducir palabras dunha lingua a outra, ofrece información gramatical complementaria, así como enlaces de interese sobre as linguas desta comunidade.

Fonte: AraInfo

O Goberno de Navarra destinará 40 000 euros a axudas para a promoción, difusión e normalización do éuscaro no ámbito das tecnoloxías da información e a comunicación. Con esta convocatoria preténdese incentivar a creación ou a adaptación a esta lingua de sitios web, aplicacións e programas informáticos.

Fonte: Diario de Navarra

O portal oficial de Turismo de Euskadi conta cunha nova sección con propostas para Semana Santa que se poderá consultar en cinco idiomas: éuscaro, castelán, inglés, francés e alemán.  

Fonte: La Vanguardia

O Instituto Valenciano de Arte Moderna (IVAM) e a Academia Valenciana da Lingua (AVL) colaborarán para publicar en valenciano os catálogos de arte do IVAM, coincidindo co Día do Libro.

Fonte: El Periodic

O Goberno vasco, o Goberno de Navarra e a Oficina Pública da Lingua Vasca continuarán a colaborar en materia de política lingüística. As liñas previstas para 2019 centraranse no ensino de éuscaro a adultos, a certificación de competencias lingüísticas, e a promoción do seu emprego e a investigación sobre esta.

Fonte: El Diario

A Corporación Catalá de Medios Audiovisuais comprometeuse a incrementar a presenza do aranés e os contidos relacionados co Val de Aran nos medios públicos, a través do reforzo da información, da dobraxe de programación infantil ou de espazos web específicos.

Fonte: Generalitat de Cataluña

O concurso de microrrelatos improvisados en asturiano “Entaína a escribir”, que se enmarca na celebración da Semana das Letras Asturianas, está destinado a persoas de 14 a 35 anos, que deberán redactar nun tempo máximo de 20 minutos un microrrelato nesta lingua.

Fonte: La vanguardia