O Centro de Investigación en Sociolingüística e Comunicación da Universidade de Barcelona analizou a situación do catalán eu Europa. Fíxoo a través dun artigo presentado co apoio da Dirección Xeral de Política Lingüística, que conclúe que o catalán é unha lingua media de Europa que presenta importantes elementos de minorización.

Fonte: El Confidencial Autonómico

Kontseilua, a coordinadora de asociacións en favor do éuscaro, presentou quince medidas en materia lingüística para a próxima lexislatura en Navarra. Estas medidas diríxense a conseguir a oficialidade do éuscaro en toda Navarra: Administración Pública, sistema educativo, medios de comunicación etc.

Fonte: Noticias de Navarra

O Consell de Mallorca publicou a convocatoria de axudas para prensa escrita ou dixital en lingua catalá do 2019, cunha dotación total de 38 000 euros. O obxecto da convocatoria é a adquisición de equipamentos e materiais necesarios para desenvolver traballos periodísticos.

Fonte: La Vanguardia

O Concello de Pamplona e a Real Academia da Lingua Vasca (Euskaltzaindia) asinaron un convenio para a concesión dunha subvención de 12 000 euros para a promoción do éuscaro, acordo que estará vixente ata o 31 de decembro deste ano.

Fonte: Pamplona Actual

A iniciativa AragON, como parte do programa europeo Poctefa Linguatec e do programa Agora por l’aragonés, puxo en marcha un portal web que pon a disposición de interesados e interesadas ferramentas e recursos en liña sobre a lingua aragonesa. Aquí pódese atopar dende un dicionario até un tradutor en liña, así como información sobre probas de nivel e recursos educativos para docentes e alumnado.

Fonte: Aragón hoy
 

O novo curso, denominado Ep! Escolta i Parla, foi creado pola Dirección Xeral de Política Lingüística, xunto co Consorcio para a Normalización Lingüística, e está dirixido a persoas que non poden utilizar a lingua escrita como base da súa aprendizaxe. A finalidade é dar resposta ao incremento de persoas non alfabetizadas ou con dificultades de aprendizaxe que queren aprender catalán.

Fonte: Generalitat de Cataluya

En 2018 presentáronse 333 teses na Universidade do País Vasco, 33 das cales estaban en éuscaro. Delas, 17 obtiveron a cualificación internacional, o dobre que en 2017. Para promover a investigación nesta lingua, entréganse os Premios Koldo Mitxelena de Teses en Éuscaro, que este ano chegan á súa cuarta edición.

Fonte: El Correo

O Departamento de Cultura da Generalitat de Cataluña abriu o prazo de solicitude das axudas para a promoción do catalán por parte de asociacións sen ánimo de lucro. Cun importe total de 710 000 euros, están destinadas tamén ao desenvolvemento de proxectos que incorporen o catalán en produtos tecnolóxicos e á tradución de obras non literarias ao catalán.

Fonte: Generalitat de Catalunya

O emprego da lingua valenciana, segundo a última Enquisa do Uso Social do Valenciano da Consellería de Educación, vai a máis nas redes sociais, coa provincia de Castelló á fronte deste uso na última década cunha porcentaxe do 51 %. Os datos revelan ademais que o 37,7% de castellonencos se comunica en castelán en Facebook, Twitter e Whatsapp, un 3,6 % noutras linguas e a un 7,3 % élle indistinto.

Fonte: El Periódico Mediterráneo

Co gallo da celebración do Día das Letras Asturianas, Oviedo acolleu unha manifestación convocada pola Xunta pola Defensa da Lingua a prol do asturiano á que acudiron centos de persoas.

Fonte: La Nueva España