España
O Goberno de Navarra e Euskaltzaindia renovan o seu compromiso coa normalización do éuscaro
O Goberno de Navarra e Euskaltzaindia asinaron o convenio de colaboración para o ano 2019, grazas ao que destinarán 169 000 euros á normalización, ao desenvolvemento e ao estudo do éuscaro.
Fonte: Noticias de Navarra
O 80% dos organismos deportivos biscaíños emprega o éuscaro
Un total de 35 das 44 federacións deportivas de Biscaia utiliza o éuscaro e forma parte do programa Bizkaia Kirola Ere Euskeraz (BIKEE). O obxectivo para este ano 2019 é alcanzar as 40 para aumentar a presenza desta lingua na súa actividade diaria.
Fonte: El Correo
Pamplona acollerá a festa de Sortzen a favor da educación pública en éuscaro
Sortzen celebrará en Pamplona a súa festa anual a favor da educación pública en éuscaro nesta ocasión baixo o lema 'Euskaratik guztion eskola Sortzen' (desde o éuscaro creando escola para todos e todas).
Fonte: Noticias de Navarra
O Concello de Portugalete impulsa a rotulación en éuscaro dos establecementos comerciais
O Concello de Portugalete concede desde 2013 axudas económicas aos establecementos comerciais que desexan colocar rótulos bilingües ou en éuscaro nos locais. Este ano poderán beneficiarse destas subvencións, ademais dos comercios, a hostalería e os servizos do municipio.
Fonte: En Portugalete
Preséntase unha plataforma para reclamar igualdade de dereitos das linguas cooficiais
Acció Cultural del País Valencià (ACPV), A Mesa pola Normalización Lingüística, CIEMEN, Iniciativa pol Asturianu, Kontseilua - Euskararen Gizarte Erakundeen, Nogará, Omnium Cultural e Plataforma per la Llengua son as oito entidades que se uniron para crear a Plataforma Estatal pola Pluralidade Lingüística, cuxo obxectivo é acabar cunha Administración central monolingüe e garantir a igualdade de dereitos no uso das linguas cooficiais.
Fonte: 20 minutos
Convócanse axudas para o uso e o fomento do catalán dirixidas aos sectores empresarial, asociativo e deportivo de Menorca
O Consell de Menorca convoca axudas por valor de 40 000 euros para o emprego e o fomento do catalán nos ámbitos empresarial, asociativo e deportivo da illa, co obxectivo de promover esta lingua en todos os sectores e de implicar a sociedade nas políticas de dinamización lingüística.
Fonte: Menorca
Publícanse en catalán dúas novas guías de viaxes, de Islandia e de Praga
A colección Guies Insight acaba de publicar dúas novas guías de viaxe en catalán grazas ao apoio da Dirección Xeral de Política Lingüística de Cataluña, unha sobre Islandia e outra sobre Praga, que se suman ás seis anteriores (Berlín, Lisboa, Londres, Nova York, París e Roma).
Fonte: Generalitat de Catalunya
Centos de persoas reclaman en Xixón a oficialidade da lingua asturiana
As rúas de Xixón acolleron a manifestación para reclamar a oficialidade da lingua asturiana e esixir que na vindeira lexislatura se modifique o Estatuto de Autonomía para recoller esta reivindicación.
Fonte: La Nueva España
O plan de normalización do éuscaro de Osatek busca garantir os dereitos lingüísticos da cidadanía
Desde a aprobación o pasado 3 de decembro de 2018 do Plan de normalización do uso do éuscaro de Osatek 2018-2022 avanzouse xa en varios aspectos. O obxectivo é que esta sociedade pública, dependente do Departamento vasco de Saúde, garanta os dereitos lingüísticos dos pacientes e converta o éuscaro na súa lingua de traballo.
Fonte: NoticiasPress
Preséntase un volume de Tintin traducido ao galego, o éuscaro, o valenciano, o aragonés, o aranés e o castúo
O Salón do Cómic de Barcelona acolleu a presentación das novas edicións de Las joyas de la Castafiore en galego, éuscaro, valenciano, aragonés, aranés e castúo. Coa tradución a estas linguas búscase poñer en valor a diversidade lingüística que caracteriza as obras de Hergé.
Fonte: El Independiente
Boletín
Subscríbase ao boletín
