España
A Deputación de Áraba organizará un novo campamento de verán de inmersión en éuscaro
A Deputación Foral de Áraba estreará este verán, na última semana de xullo, un novo campamento de inmersión no éuscaro, para mozas e mozos de 12 e 13 anos, denominado Euskalaka, cuxo principal obxectivo será afondar nesta lingua a través da edición de vídeos e a aprendizaxe de redes sociais.
Fonte: Noticias de Álava
Unha manifestación pola oficialidade do asturiano percorrerá as rúas de Xixón o 6 de abril
O día 6 de abril Xixón acollerá unha manifestación de apoio á oficialidade do asturiano. Por este motivo, a Xunta pola Defensa de la Llingua puxo en marcha un reto (#OficialidaChallenge) para que as redes sociais se enchan de vídeos de apoio á participación na marcha.
Fonte: La Nueva España
A Comisión de Éuscaro de Oarsoaldea apoiará as oficinas de servizos para que traballen nesta lingua
Catro concellos vascos (Lezo, Errenteria, Pasaia e Oiartzun) apoiarán a comisión de Éuscaro de Oarsoaldea na axuda que esta prestará ás oficinas de servizos (xestorías, inmobiliarias, seguros e administradores de terreos) para impulsar nelas a normalización da lingua vasca e aumentar a súa presenza.
Fonte: Diario Vasco
Preséntase un proxecto de lei de igualdade lingüística para evitar a discriminación polo emprego do valenciano
Acció Cultural del País Valencià (ACPV) presentou un proxecto de lei de igualdade lingüística que ten como obxectivo garantir a "non discriminación" polo emprego de calquera das dúas lingua oficiais na Comunidade Valenciana e evitar a falta de uso e a subordinación do valenciano.
Fonte: 20 minutos
Edítase a tradución ao éuscaro dos escritos de George Steer sobre a Guerra Civil no País Vasco
O Goberno vasco presentou a tradución ao éuscaro dos episodios relacionados coa Guerra Civil acontecidos en Euskadi escritos polo xornalista británico George Steer. A obra, traducida pola autora Koro Navarro, leva por título Gernikako arbola. Gerra modernoaren landa-azterketa bat.
Fonte: Noticias de Navarra
O Concello de Xixón organiza un obradoiro de lingua asturiana destinado ás empresas
A Oficina de Normalización Lingüística de Xixón considera o sector socioeconómico fundamental para a sociedade actual, polo que vai organizar ao longo de 2019 varias actuacións destinadas ao impulso do uso do asturiano nas empresas. A primeira delas será un obradoiro de carácter práctico sobre o emprego desta lingua, no que se lles proporcionará ás empresas as ferramentas necesarias para que a utilicen na súa actividade diaria.
Fonte: InfoAsturies
A Real Academia Española recibirá do Ministerio de Ciencia, Innovación e Universidades cinco millóns de euros para a súa modernización
O Goberno español vai destinar cinco millóns de euros á Real Academia Española para a modernización da institución, así como para velar polo uso correcto do castelán na era dixital ou elaborar dicionarios.
Fonte: La Vanguardia
O Concello de Pamplona fomenta a lectura en éuscaro
O Concello de Pamplona e mais as bibliotecas públicas da cidade participan no programa de fomento da lectura en éuscaro “Irakurri, gozatu eta oparitu”, impulsada pola asociación Euskaltzaleen Topagunea.
Fonte: Pamplona Actual
Un total de 30 axentes sociais asina compromisos para impulsar a normalización do éuscaro
Trinta axentes sociais de diferentes ámbitos asinaron compromisos para impulsar a normalización do éuscaro no marco do proxecto 'Aro berriari, Klika'. Korrika e AEK, organizadores desta iniciativa, esperan que se vaian unindo máis nun futuro, para o que habilitaron unha páxina web na que se poderán ir sumando máis organizacións.
Fonte: Deia
O proxecto 'Som poesia' promove a lingua catalá nas Illas Baleares
A cidade de Palma de Mallorca acollerá o proxecto 'Som poesia' que conta coa colaboración da área de Cultura, Patrimonio, Memoria Histórica e Política Lingüística e que ten como obxectivo promover a lingua catalá a través da poesía.
Fonte: 20 minutos
Boletín
Subscríbase ao boletín
