O centro de investigación Vicomtech-Ik4, Fundación Elhuyar e os grupos Ixa e Aholab da Universidade do País Vasco deron a coñecer en San Sebastián o experto virtual en ciencia que fala éuscaro AnHitz, impulsado en colaboración co Goberno vasco.
Nunha rolda de prensa de San Sebastián, o viceconselleiro de Política Lingüística do Goberno vasco, Patxi Baztarrika, explicou que este avatar é un prototipo desenvolvido nun proxecto de investigación bautizado co mesmo nome (AnHitz). Ademais, manifestou que o obxecto do proxecto é a investigación e o desenvolvemento de tecnoloxías lingüísticas en éuscaro para a intercomunicación entre persoas e dispositivos electrónicos.

Fonte: Europa Press

O presidente do Fomento do Turismo e director xeral de Air Berlin para España e Portugual, Álvaro Middelman, lanzou unha acendida proclama en defensa do uso e protección do idioma castelán en Baleares.

Fonte: Diario de Mallorca

O intento do conselleiro Alejandro Font de Mora para manter en pé Educación para a Cidadanía en inglés sumou un novo fracaso: o Tribunal Superior de Xustiza (TSX) valenciano suspendeu cautelarmente a figura do tradutor. A súa presenza, imposta aos centros polo Goberno de Francisco Camps, "pode causar prexuízos irreparables para o profesor titular da materia, pois queda privado, aínda cando sexa parcialmente, das súas competencias esenciais", sinala o auto en resposta ao recurso interposto por CCOO-PV.

Fonte: El País

Os novos profesores que accedan a unha praza como docente deberán acreditar suficientes coñecementos de inglés como para poder impartir unha materia completa nesta lingua. Os plans de escola plurilingüe que está perfilando o Goberno valenciano requiren que os docentes "teñan suficiente capacitación en inglés e, polo tanto, o sistema de selección do profesorado deberá ter en conta esta circunstancia".

Fonte: Las Provincias

A concelleira de Cultura, Bibiana Martínez, e a responsable do Servizo de Normalización Lingüística de Cangas del Narcea, Mónica Rodríguez Riesgo, presentaron unha campaña de difusión da lingua asturiana destinada aos nenos. a iniciativa, que conta cun orzamento de 800 euros, consiste na publicación de sete carteis -sobre a escola, o baño, o patio, o comedor, o corpo humano, as figuras xeométricas e as cores- que se repartirán por todas as escolas, ludotecas e centros de saúde do concello, así como no hospital comarcal.

Fonte: El Comercio Digital

A Asociación Berciana da Lingua Xarmenta entregoulles o sábado 17 de xaneiro os galardóns da IV edición dos seus premios anuais á gaiteira Susana Seivane, ó grupo de música folk Aira da Pedra, e á Escola de Gaitas de Villafranca del Bierzo pola súa promoción da lingua e a cultura galega.

Fonte: Galicia Hoxe

Euskadi encara unha década na que segundo o propio Consello Escolar haberá un déficit de centenares de docentes nas escolas. O Goberno vasco xa moveu ficha e facilitou as vías de acceso para obter os certificados oficiais de dominio do éuscaro.

Fonte: 20minutos

A Federació d'Associacions per la Llengua-Escola Valenciana (FEV), integrada na Plataforma per l'Ensenyament Públic, sentarase na mesa de negociacións cos responsables da Consellería de Educación para negociar un plan consensuado de ensino trilingüe.

Fonte: El País

O conselleiro de Educación, Alejandro Font de Mora, presentou "El món dels signes", un material multimedia que ten por obxecto fomentar a aprendizaxe do valenciano entre as persoas xordas, priorizando os contidos visuais, como imaxes, debuxos, iconas e vídeos signados.

Fonte: Panorama Actual

A Federació Escola Valenciana lamentou que a secretaria autonómica de Educación, Concha Gómez, "adiara a negociación do Plan pola escola plurilingüe e a retirada da orde de Educación para a Cidadanía a futuras reunións".

Fonte: Levante