Desde hai case un ano, o Tribunal Supremo está pendente de admitir a trámite ou rexeitar a interposición dun recurso de casación presentado pola Asociación Galega pola Liberdade do Idioma (AGLI, nas súas siglas en castelán) contra unha resolución do Tribunal Superior de Xustiza que avalaba o Decreto 124/2007 do galego no ensino.

Fonte: A Nosa Terra

O Círculo Balear celebrou desde as 10.30 horas unha mesa informativa na confluencia da rúa Sant Miquel de Palma coa Praza de España e a rúa Olmos, no marco da campaña que vén desenvolvendo en favor dos dereitos lingüísticos individuais: "Libre elección de lingua. Bilingüismo en liberdade".

Fonte: El Mundo

O pasado 19 de novembro, un informe encargado pola Deputación de Álava a varios expertos determinou a falsidade dos grafitos escritos en cerámicas dos séculos III, IV e V descubertos no xacemento romano de Iruña-Veleia nos anos 2005 e 2006. Estes descubrimentos cualificáronse no seu día de «históricos», posto que, entre outras cousas, adiantaban ao século III a aparición do éuscaro e a entrada do cristianismo.

Fonte: La Voz de Galicia

A normalización lingüística chegou aos reloxos. Desde hoxe responder a unha inocente petición sobre a hora que é pode sorprender ao máis purista dos filólogos cataláns: "són tres quarts i mig de cinc". Iso supoñendo que no pulso se leve o Horacat, o primeiro reloxo dixital que mostra a hora en catalán e que permite ler un texto coa fórmula lingüística para ditar a hora con corrección.

Fonte: La Vanguardia

O Bloque por Asturies acolleu con agrado a campaña publicitaria que a entidade bancaria Caxastur está a realizar en Cataluña e en catalán, promoción que conta coa imaxe do futbolista asturiano Luis Enrique. Non obstante, a este partido sorpréndelle que unha entidade que se financia maioritariamente cos ingresos do pobo asturiano, e que na súa cúpula directiva ten a representación de partidos políticos de Asturias, faga gala de sensibilidade lingüística cos habitantes de Cataluña, pero non así cos da súa comunidade, o que provoca unha situación discriminatoria no que se refire aos dereitos lingüísticos das persoas dos diferentes territorios do Estado español.

Fonte: Asturnews

A corporación municipal de Ermua aproba a ampliación do tempo de aplicación do Plan de éuscaro de Ermua ata 2012. O concelleiro do Departamento de Éuscaro, José Luís Clemente, explicou en sesión plenaria que «se ben aprobamos en pleno, no seu momento, que este plan se desenvolvese ata o 2009, cremos que os obxectivos establecidos son o suficientemente ambiciosos como para requirir maior tempo para a súa execución».

Fonte: El Correo Digital

O Principado de Asturias a través da Dirección Xeral de Política Lingüística porá en marcha a Oficina de Tradución Simultánea do Asturiano. O anuncio realizouno a nova conselleira de Cultura, Mercedes Álvarez, durante a presentación dos orzamentos da súa área na Xunta xeral.

Fonte: El Comercio Digital

Transcorrido máis dun ano desde a aprobación da lei que recoñeceu en España a lingua de signos e os medios de apoio á comunicación oral, a Dirección Xeral de Discapacidade convocou a Confederación Estatal de Persoas Xordas para que forme parte dunha comisión de seguimento que deberá supervisar o cumprimento da lei.

Fonte: Diario Signo

O conselleiro de Saúde, Vicenç Thomàs, asegurou que non retirará o decreto que estipula o coñecemento do catalán entre os profesionais da sanidade pública en Baleares, algo polo que o PP o acusou de dar prioridade á lingua sobre a asistencia sanitaria.

Fonte: Diario de Mallorca

Patxi Baztarrika e Erramun Osa, de Política Lingüística do Goberno vasco, presentaron o martes día 9 de decembro no Palacio de Congresos do Kursaal a representantes do ámbito político, social e cultural de Guipúscoa os pasos que se deron ata o momento no proceso de reflexión Euskara 21, que quere poñer unhas bases para a política lingüística deste novo século.

Fonte: Diario Vasco