España
Cruz Vermella ofrece clases de valenciano para estranxeiros
A elevada demanda por parte da poboación estranxeira fixo que Cruz Vermella, en colaboración coa Academia Valenciana da Lingua, incremente o número de clases de valenciano destinadas especialmente a este colectivo en toda a provincia de Castellón.
Fonte: Las Provincias
YouTube estuda poder incorporar o catalán
A responsable en España de YouTube, María Ferreras, explicou que a compañía pensa na incorporación do catalán a este sitio web de vídeos, aínda que non quixo avanzar unha data.
Fonte: La Vanguardia
A Fundación PuntCAT presentou a campaña "Navega en catalán"
A Fundación puntCAT presentou o 23 de abril a campaña "Navega en catalán" co obxectivo de explicar os beneficios de configurar os navegadores co catalán como lingua predeterminada e describir os pasos para poder facelo en só 30 segundos.
Fonte: Asociación Puntogal
O comisario de Multilingüismo da UE aposta por que os europeos "aprendan idiomas diferentes" e "non só o inglés"
O comisario de Multilingüismo da Unión Europea, Leonard Orban, considera que os europeos "deben aprender idiomas diferentes" e "non só o inglés", ao existir dentro da comunidade "unha riqueza enorme" de linguas que "deberían ser aprendidas". Orban pronunciouse así nunha rolda de prensa que ofreceu en Pamplona, con motivo da súa visita a Navarra.
Fonte: Europa Press
A Consellería de Cultura do Principado de Asturias anuncia unha nova Unidade de Tradución ao asturiano
A Consellería de Cultura do Goberno do Principado de Asturias anunciou a creación dunha Unidade de Tradución ao asturiano e ao castelán de textos oficiais e administrativos, compromiso que o Executivo autonómico xa expresara en anteriores ocasións.
Fonte: La Nueva España
Máis de 2.000 persoas asisten ao XXI Concerto pola Oficialidade do asturiano
Poucos días despois da celebración do XXI Concerto pola Oficialidade, os organizadores fan balance do resultado de asistencia, que consideran un éxito, pois calculan que asistiron máis de 2000 persoas.
Fonte: Asturnews
O Goberno catalán crea unha web para a integración dos inmigrantes dispoñible en dez linguas
A Generalitat de Catalunya puxo en funcionamento un portal en internet para facilitar a integración dos inmigrantes, que inclúe información básica sobre a sociedade catalá e a súa lexislación, traducida a dez linguas diferentes.
Fonte: 20 minutos
O 65,7% dos castelanfalantes do País Vasco intentou aprender éuscaro e menos do 10% di non interesarse por esta lingua
O 65,70 % dos cidadáns vascos castelanfalantes intentou aprender éuscaro nalgunha ocasión e o 55 % séntese "próximo ao mundo do éuscaro", mentres que menos do 10 % asegura que non lle interesa, segundo recolle o estudo 'Tópicos, prexuízos e actitudes da poboación castelanfalante ante o éuscaro' realizado por Unesco Etxea para a Viceconsellería de Política Lingüística do Goberno vasco.
Fonte: Europa Press
O Goberno vasco edita en éuscaro 21 dicionarios terminolóxicos
O Goberno vasco editou 21 dicionarios terminolóxicos en éuscaro, agrupados en seis materias: comercio e consumo, formación profesional e universitaria, novas tecnoloxías, Administración pública, abreviaturas, siglas e símbolos e medio natural.
Fonte: El País
O Principado de Asturias destina 800.500 euros a unha convocatoria de subvencións para a normalización do asturiano
O Consello de Goberno do Principado de Asturias autorizou unha partida de 800.500 euros para financiar a convocatoria pública para a concesión de subvencións para a normalización social do asturiano.
Fonte: Asturies.com
Boletín
Subscríbase ao boletín
