España
Un milleiro de persoas reivindica no Val de Arán o uso do aranés
'Aran per sa lengua' (Arán pola súa lingua), a carreira popular organizada polo colectivo de Lenga Viua, reuniu a un milleiro de persoas para percorrer os lugares do Val de Arán e reivindicar así o uso social da lingua aranesa.
Fonte: La Vanguardia
Alboraia é o primeiro concello que elimina a súa oficina de promoción do valenciano
O Concello de Alboraia decidiu eliminar a oficina para a promoción do uso do valenciano e convértese así no primeiro municipio da Comunidade Valenciana en facer desaparecer este órgano, segundo denunciaron técnicos lingüísticos municipais de varias localidades.
Fonte: ADN
O Concello de Amorebieta elaborará unha ordenanza do éuscaro
O colectivo Euskal Herria Euskaraz solicitou no último pleno, co aval de 800 sinaturas, a aprobación dunha ordenanza do éuscaro. A concelleira de Cultura e Éuscaro, Sara Chamizo, adiantou que o consistorio se atopa traballando nela e animou o colectivo a presentar propostas para ser valoradas.
Fonte: El Correo Digital
O catalán é a décimo cuarta lingua máis usada en Google Books
Despois de dous anos e medio do acordo entre Google e a Biblioteca de Cataluña, dixitalizáronse 35.000 libros do máximo centro bibliográfico catalán. Segundo Luis Collado, responsable de Google na península ibérica, o catalán xa é agora o décimo cuarto idioma máis usado en Google Books.
Fonte: Avui
CiU insta o Goberno a que garanta o uso das linguas cooficiais en todas as institucións da UE
O voceiro de Asuntos Exteriores de CiU no Congreso, Jordi Xuclà, reclamoulle ao Goberno que traballe no seo da Unión Europea para garantir o uso do catalán, éuscaro e galego en todas as institucións europeas. Na actualidade, aínda non é posible no Tribunal de Contas da UE.
Fonte: Europa Press
O Colexio de Periodistas de Cataluña pídelle a RTVE que non suprima o informativo vespertino en catalán
O decano do Colexio de Periodistas de Cataluña (CPC), Josep Carles Rius, envioulle unha carta ao presidente de Radio Televisión Española (RTVE), Luís Fernández, para pedirlle que non se suprima a desconexión de 20 minutos en catalán do informativo vespertino durante o mes de agosto por vacacións do persoal técnico.
Fonte: El Debat
A Universidade Nacional de Educación a Distancia ofertará entre as súas linguas a aprendizaxe de chinés
O Centro Universitario de Idiomas a Distancia (CUID), asociado á UNED (Universidade Nacional de Educación a Distancia), impartirá no vindeiro curso 2009/2010, un total de seis idiomas. Neste novo ano escolar amplíase a oferta de idiomas en tres máis: o francés, o chinés e o portugués. Ademais poderanse estudar as linguas xa impartidas ata este momento, como son o inglés, o galego e o alemán.
Fonte: La Voz de Galicia
O Concello de San Sebastián reedita 30.000 exemplares do dicionario de peto de éuscaro para turistas
O Padroado Municipal de Éuscaro de San Sebastián reeditou 30.000 exemplares do dicionario de peto no que se traducen a sete idiomas "palabras e frases elementais" en éuscaro tras "a grande acollida que tivo o pasado verán".
Fonte: Europa Press
Aragón reduce a «lingua histórica» a condición do catalán da Franxa
A pesar de ser recoñecidas como «linguas propias e históricas» da comunidade, o catalán e o aragonés non serán cooficiais nin será obrigatoria a súa aprendizaxe na escola. Que as linguas minoritarias de Aragón se regulasen administrativamente era unha das aspiracións do presidente de Aragón, o socialista Marcelino Iglesias, quen, ademais, é falante de catalán.
Fonte: El Periódico
A metade dos menores de 30 anos en Biscaia é bilingüe
A última enquisa sociolingüística revela que máis do 30 % dos habitantes de Biscaia é quen de expresarse tanto en éuscaro como en castelán. En 25 anos produciuse un incremento exponencial no número de persoas que dominan ambas as linguas. En 1981 só o 15,2 % dominaba os dous idiomas mentres que en 2006 a porcentaxe aumentou ata o 31,3 %.
Fonte: Deia
Boletín
Subscríbase ao boletín
