Os concellos de Buruntzaldea (Andoain, Astigarraga, Hernani, Lasarte-Oria, Urnieta eta Usurbil) asinaron en 2002 un convenio para traballar conxuntamente programas de éuscaro. En base a ese convenio, encóntrase o programa Proposta para a mellora da situación do éuscaro despois do Ensino Secundario Obrigatorio de 2008-2009.

Fonte: Diario Vasco

Incrementar nun 3 % (do 48 % ao 51 %) as matriculacións escolares en modelos de éuscaro para o ano 2012 é unha das metas do Plan estratéxico de Euskarabidea (2009-2012), cuxo borrador se presenta ante o Consello Navarro do Éuscaro. Este documento recolle así mesmo aumentar un 115 % a dotación económica para prestixiar o éuscaro e facelo atractivo.

Fonte: Noticias de Navarra

Os tradutores automáticos da web gencat da Generalitat catalá atenderon oito millóns de peticións en 2008, un número de consultas que pon de relevo a aposta da Secretaría de Política Lingüística para facilitar o coñecemento e o uso do catalán, segundo o seu secretario, Bernat Joan.

Fonte: ADN

Do 15 ao 17 de xuño, Linguamón acollerá a II Asemblea Xeral da Rede Europea para a Diversidade Lingüística (NPLD, nas súas siglas en inglés), unha rede formada con distintas finalidades: promover as linguas faladas na Unión Europea, independentemente do seu grao de oficialidade ou do seu peso demográfico ou político, identificar as boas prácticas na xestión do multilingüismo e asesorar a nivel europeo en materia de políticas lingüísticas dirixidas a todas as comunidades de fala da Unión.

Fonte: Linguamón

O 66,5 % da poboación cre que o ensino en éuscaro debería ofertarse en toda Navarra, mentres que o 14,2 % opina que debería reducirse á zona vascófona e o 8,7 % só ás zonas vascófona e mixta. Respecto aos modelos educativos, dous terzos das familias enquisadas matricularían o seu fillo en modelos con presenza do éuscaro (D, B e A), e destes o 26,3 % elixiría o D (integramente en éuscaro, agás a materia de lingua castelá).

Fonte: Noticias de Navarra

A Deputación Foral de Biscaia introduciu o éuscaro no desenvolvemento dun proxecto europeo para a formación no uso da devandita lingua dos membros dos servizos de emerxencia, sobre todo, os operadores das centrais de comunicacións (SOS Deiak, Bombeiros, Ertzaintza...).

Fonte: ADN

A nova base de datos de dereito e lexislación lingüísticos xa se pode consultar en internet (http://www.gencat.cat/llengua/bdjuridica). Esta base contén leis, disposicións, xurisprudencia, doutrina, bibliografía e outros documentos sobre dereito e lexislación lingüísticos, basicamente de Cataluña e España.

Fonte: Generalitat de Catalunya

A Fundación da Confederación Estatal de Persoas Xordas e a Obra Social Caja Madrid asinaron un convenio de colaboración para a edición de materiais didácticos dirixidos ao ensino da lingua de signos española (LSE) como segunda lingua entre nenos e mozos oíntes.

Fonte: Europa Press

A maioría dos habitantes de Aranguren, Galar, Noáin, Mañeru, Cirauqui, Villatuerta, Artazu, Belascoáin e Guirguillano consideran importante abandonar a zona lingüística non vascófona de Navarra para incorporarse á zona mixta. Así o reflicte a enquisa elaborada polo Departamento de Educación sobre a situación do éuscaro na Comunidade Foral en 2008.

Fonte: Diario de Noticias

Os decretos aprobados polo anterior Departamento de Educación vasco que fixaban o éuscaro como lingua principal nas etapas de Infantil e Bacharelato teñen os seus días contados. Xa o advertiu o novo Goberno autónomo e o Tribunal Superior vasco estreitou aínda máis o cerco ao suspender de maneira cautelar a aplicación de ambos nos artigos que fixan a lingua vasca como a vehicular na escola.

Fonte: El País