O Consello Xeral de Arán creou un curso en liña dirixido a todas as persoas que queiran aprender a lingua e non poidan asistir a clases presenciais. O curso é gratuíto e pódese acceder directamente desde a páxina web www.corsi.aranes.org.

Fonte: Qué

O Boletín Oficial de Aragón publicou a listaxe dos quince membros que conformarán o Consello Superior de Linguas de Aragón. Estas persoas, elixidas polo Goberno autonómico, as Cortes e a Universidade de Zaragoza, deben ser seleccionadas entre filólogos, xuristas e destacadas personalidades da investigación lingüística.

Fonte: Aragón Digital

En virtude dun convenio, a Fundación Mintzola vai promover nos colexios de Tolosa, en colaboración cos profesores, un ambicioso proxecto piloto que se estenderá ao longo dos catro próximos cursos escolares. O obxectivo tanxible é dar cunha metodoloxía adecuada que garanta un maior e mellor uso do éuscaro entre os escolares.

Fonte: Diario Vasco

Desde a Universidade de Almería estase facendo nos últimos anos unha aposta clara pola súa internacionalización e promoción a través das novas tecnoloxías. Por iso, unha das accións que levou a cabo a Universidade foi a tradución dunha gran parte da súa web a chinés.

Fonte: Teleprensa

A Deputación de Álava destina 18.000 euros a fomentar a lectura da prensa en lingua vasca co obxectivo de acercar o éuscaro aos alaveses.

Fonte: El Correo

O pleno do Parlamento de Navarra aprobou unha moción que insta o Goberno de España a que rotule en éuscaro e en castelán as instalacións do aeroporto de Pamplona-Noáin.

Fonte: ABC

As diferenzas e disparidades na oferta de cursos de inglés nas universidades e na avaliación dos seus resultados académicos fai que sexa "cuestionable" asegurar que todos os alumnos alcancen un nivel de lingua estranxeira suficiente para un mercado laboral máis globalizado e competitivo.

Fonte: La Vanguardia

A Universidade Pompeu Fabra (UPF) de Barcelona lanzou o novo dicionario fonético en liña reSOLC-mitjansCAT para que xornalistas e asesores de medios de comunicación audiovisuais poidan consultar a pronuncia correcta das palabras en catalán.

Fonte: Europa Press

O leonés impartirase este curso no dobre de colexios que o último ano. A actividade extraescolar que recibe o nome oficial de ‘Llingua y Cultura Llïonesa’ arranca en 16 colexios da cidade de León fronte aos oito centros en que se impartiu clase no período escolar 2009/2010.

Fonte: La Crónica de León

O Goberno vasco decidiu que o éuscaro necesita unha ferramenta útil e verdadeiramente eficaz, que potencie a súa presenza en internet e a súa difusión por todo o mundo. Así que nos próximos dous anos desenvolverá o que será o primeiro tradutor público e gratuíto, dirixido tanto a administracións públicas como a estudantes e profesionais.

Fonte: El Correo