A emisora en asturiano Radio Sele viuse obrigada a desmontar a súa antena e deixar de emitir tras recibir unha orde do director provincial da Xefatura de Comunicacións, que pertence ao Ministerio de Industria, Turismo e Comercio de España. Con esta decisión, o Goberno central pecha a única radio que usa o asturiano no 100% das súas emisións.

Fonte: Asturnews

A promoción e o uso do valenciano perden activos nos orzamentos da Generalitat de 2012, ao verse reducidas as axudas nun 10,62 %. Isto, sumado aos dous exercicios anteriores de recortes, significa que a promoción do valenciano acumula un descenso do 40,81 % nos últimos tres anos.

Fonte: El País

Para prestar un mellor servizo aos turistas con discapacidade auditiva que visitan Santander ou Cantabria, o Concello colaborará coa Asociación de Guías Turísticos Oficiais de Santander e Cantabria na organización dun curso de lingua de signos que ten como obxectivo ampliar a formación destes profesionais.

Fonte: Diario Montañés

O Consello de Goberno deu o visto e prace a un convenio entre a Consellería de Educación, Formación e Emprego e o Ministerio de Educación para a mellora da aprendizaxe de linguas estranxeiras. O acordo, que supón un investimento de 895 142 euros, permitirá mellorar o ensino doutro idioma e reforzar as competencias lingüísticas de alumnos e profesores da rexión.

Fonte: Europa Press

A Sección de Lingua Castelá creada no Departamento de Educación terá como obxectivo fundamental impulsar entre os alumnos a mellora da comprensión lectora e da competencia comunicativa oral e escrita nesta lingua, para o que se elaborarán novos materiais didácticos en distintos formatos.

Fonte: Xornal de Galicia

O Goberno permitirá a libre elección de lingua en Educación Infantil e Primaria a partir do próximo curso escolar, e ampliarao a Secundaria cando eliminen a débeda de 35 millóns de euros coa que conta actualmente o Departamento de Educación, Cultura e Universidades.

Fonte: Diario de Ibiza

O mércores día 9 de novembro de 2011 sae, a través de internet, Ciencies. Cartafueyos asturianos de Ciencia y Teunoloxía, unha revista de formato dixital e periodicidade anual, dedicada á divulgación do coñecemento científico e tecnolóxico, e editada integramente en lingua asturiana.

Fonte: 20 minutos

O conselleiro de Cultura da Junta de Andalucía, Paulino Plata, presentou en Atarfe (Granada) a obra Unha viaxe pola historia e lendas do mundo, primeira crónica da humanidade realizada tanto en versión escrita coma en lingua de signos española.

Fonte: El Ideal

Creouse un espazo neste centro comercial para ofertar películas dobradas ao asturiano. Nel pódense atopar copias de As viaxes de Gulliver e O terceiro home, ás que se unirán copias de McLintock e unha edición especial de A noite dos mortos viventes. O éxito de vendas “levou a que en pouco máis de dous meses fixeran falta neste establecemento tres remesas de películas”.

Fonte: Asturnews

Os medios de comunicación en éuscaro de Navarra e Topagunea, federación de asociacións a favor do éuscaro, denuncian os recortes aos que novamente os somete Euskarabidea, Instituto Navarro do Éuscaro.

Fonte: Xornal de Galicia