Canarias xa tiña a súa propia lingua de signos e, agora, conta tamén co primeiro dicionario de lingua de signos que reúne termos moi utilizados no arquipélago. Trátase dunha publicación moi novidosa que servirá para incluír a fala canaria na aprendizaxe desta lingua.

Fonte: RTVC

Un estudo do Goberno Vasco propón revisar algúns aspectos do sistema de perfís lingüísticos ao constatar que existe unha “disfunción” entre o coñecemento acreditado polos empregados públicos e o uso que estes fan do éuscaro. E conclúe que un dos problemas radica en que a formación vai máis dirixida a superar a proba que a ensinar a lingua para o seu uso real.

Fonte: Diario Vasco

As persoas que o pasado ano se sumaron á aprendizaxe do éuscaro en Barakaldo non recibirán ningunha axuda económica. O Concello anunciou a través dun pequeno comunicado na súa páxina web que este ano non haberá subvencións para facer máis accesible o estudo da lingua vasca.

Fonte: Deia

O texto insta o Goberno de Aragón a retirar a lei de linguas que elimina o nome de catalán e o substitúe por “lingua aragonesa propia da área oriental” (LAPAO), denominación que se cualifica de “ridícula”.

Fonte: Generalitat de Catalunya

Todos os aspirantes a ocupar algunha praza pública no Concello de Alcúdia deberán acreditar o coñecemento da lingua catalá como requisito para optar ao posto de traballo. Desta forma, o dominio da lingua propia de Mallorca non será considerado un simple mérito no concurso, tal e como recolle a última modificación da Lei de función pública.

Fonte: Diario de Mallorca

Tras a denuncia de Iniciativa polo Asturiano dun caso de discriminación no rexistro do Concello de Oviedo, o pleno municipal aprobou por unanimidade redactar unhas ordenanzas de uso do asturiano, que eviten máis casos coma este.

Fonte: Infoasturies

O Goberno de Navarra impartiu formación de éuscaro a un total de 770 empregados públicos da Comunidade Foral entre setembro de 2012 e maio de 2013. Supón un incremento do 33,2 % con respecto ao mesmo período do ano anterior, cando 578 empregados participaron nos cursos extensivos, intensivos, de autoaprendizaxe e de conversa ofertados polo Instituto Navarro do Vascuence, conxuntamente co INAP.

Fonte: Noticias Press

Dous institutos malagueños, o IES Valle del Azahar de Cártama e o Christine Picasso da capital, incorporaranse o próximo curso ao programa Saramago para o ensino do portugués como segunda lingua estranxeira.

Fonte: Diario Sur

A Plataforma de Afectados pola Hipoteca (PAH) e Euskaltzaindia, a Real Academia da Lingua Vasca, foron galardoados co Premio Cidadán Europeo 2013, que concede o Parlamento Europeo (PE) anualmente “a persoas ou organizacións excepcionais que loiten polos valores europeos”.

Fonte: Noticias de Navarra

O Pleno ordinario do Concello de Aínsa aprobou a moción presentada por Esquerda Unida na que amosan o seu rexeitamento á Lei de uso, protección e promoción das linguas e modalidades lingüísticas propias de Aragón. O Consistorio solicítalle ao Departamento de Educación do Goberno de Aragón que manteña as actividades e programas de ensino do aragonés e o catalán nos centros educativos.

Fonte: Radio Huesca