A 18 edición da Korrika comezou en Andoain, onde Okar Elizburu, membro do consello reitor de AEK, salientou que, “sen normalización lingüística non pode haber normalización social” e que “o éuscaro é un medio imprescindible para a convivencia”.

Fonte: Diario Vasco

As Xuntas Xerais de Biscaia aprobaron unha proposta de Bildu para que a Deputación garanta o uso do éuscaro por parte das empresas que reciban subvencións forais.

Fonte: El Mundo

A principal novidade que incorpora o portal é a sección Komunitatea, que lles permite aos docentes de Formación Profesional subir á web o material xerado por eles mesmos en éuscaro e compartilo. Ese material, pertencente á totalidade das familias de FP, está a disposición de calquera usuario de forma libre e gratuíta.

Fonte: Euskara

A Fundación do FC Barcelona e a Plataforma per la Llengua impulsaron unha guía lingüística para fomentar o uso do catalán entre os máis pequenos no mundo do deporte como vía de “inclusión e cohesión social”, con testemuñas de ex deportistas azulgrás e recoñecidos xornalistas.

Fonte: La Vanguardia

A Xunta de Andalucía vai formar por primeira vez a policías locais en lingua de signos co obxectivo de mellorar a súa capacitación e a súa atención ás persoas xordas nos seus labores de seguridades e protección que realizan nos seus respectivos municipios.

Fonte: Europa Press

O Tribunal Superior de Xustiza de Cataluña estimou parcialmente os recursos de Convivencia Cívica Catalá contra os regulamentos das deputacións de Lleida e Xirona, e anulou os artigos que establecían o uso “preferente” do catalán porque unha administración non pode determinar a priori o uso dun idioma por riba doutro cando ambos son oficiais.

Fonte: 20 minutos

As universidades privadas valencianas tomaron vantaxe na oferta de graos en inglés. Neste curso tanto o CEU-Universidade Cardenal Herrera como a Universidade Europea de Valencia imparten a carreira de Odontoloxía neste idioma, unha oferta de titulacións que o próximo curso ascenderá a seis.

Fonte: Levante-emv

A voceira do PNV na Comisión de Educación do Senado, Ruth Martínez, pediulle ao Goberno central que impulse o ensino das linguas autonómicas cooficiais (éuscaro, catalán, valenciano e galego) “como materias optativas en todos os sistemas educativos do Estado”.

Fonte: La Información

A Confederación Estatal de Persoas Xordas (CNSE) reclamoulle ao Goberno realizar unha proba piloto para aplicar o servizo de videointerpretación SVIsual ao servizo telefónico de información e asesoramento xurídico en materia de violencia de xénero (016), xa que o teléfono existente para persoas xordas non é totalmente accesible para este colectivo.

Fonte: Diario Siglo XXI

O Servizo de Éuscaro do Concello de Galdakao impartirá sesións sobre lingua vasca aos alumnos de ensino secundario e bacharelato. Pode parecer que xa teñen materias para isto e que xa dominan perfectamente o idioma, pero, lonxe das formalidades, as clases terán un contido máis aplicable á vida real que o idioma normativo.

Fonte: El Correo