España
O Goberno vasco recupera as axudas á aprendizaxe de éuscaro para adultos
O viceconselleiro de Política Lingüística do Goberno vasco, Patxi Baztarrika, anunciou que o executivo autónomo recuperou no seu Proxecto de Orzamentos da Comunidade Autónoma Vasca para 2013 a convocatoria de axudas individuais para a euscaldunización adultos, eliminada polo Goberno anterior, e que a dotou de 700 000 euros.
Fonte: Deia
Crean Correcte, un innovador sistema de corrección lingüística en liña
A empresa Aadimatiq creou o sistema de corrección en liña dirixido principalmente ás redes sociais e aos blogs, que permite corrixir textos en catalán con calidade profesional en poucos minutos. O proxecto, que ten a comodidade dos sistemas automáticos e a garantía do traballo directo de profesionais, obtivo o apoio da Dirección Xeral de Política Lingüística do Departamento de Cultura.
Fonte: Generalitat de Catalunya
Nace unha plataforma para financiar proxectos que traballen pola lingua e a cultura catalás
A Xarxa Dixital Catalá (Xadica) creou unha plataforma de financiamento, ao estilo da popular Verkami, que recadará fondos para proxectos que potencian a lingua e a cultura catalás, entre outros obxectivos.
Fonte: Generalitat de Catalunya
Ondarroa lidera o uso do éuscaro no País Vasco
En Ondarroa reina o éuscaro. Os datos extraídos do último estudo realizado por Soziolinguistika Klusterra e o Instituto Vasco de Estatística (Eustat) confirman que se utiliza en nove de cada dez conversas da vida cotiá ao situarse nun 93,6 %. «Case a totalidade dos seus 8856 habitantes comunícase coa lingua vasca», tal e como sinala o informe. Unicamente un 4,7 % utiliza o castelán, mentres que o 1,7 % restante se decanta por outros idiomas.
Fonte: El Correo
A empresa Tecopy desenvolve unha aplicación para promover o castelán
A empresa Tecopy desenvolveu un «xeoportal» en internet para a promoción integral do Camiño da Lingua Castelá, cuxo obxectivo é o fomento do ensino do castelán e os recursos patrimoniais, literarios e turísticos.
Fonte: La Opinión de Zamora
Os estranxeiros que pidan a nacionalidade pasarán un test de español e "integración"
O Goberno planea crear un exame oficial de lingua española e "integración na sociedade española" para os estranxeiros que soliciten a nacionalidade (fano uns 100 000 cada ano).
Fonte: El País
Propoñen introducir na Lei de educación de Cataluña o bilingüismo nas escolas
O PP de Cataluña rexistrou unha proposición de lei no Parlamento para modificar a Lei de educación de Cataluña e que se garanta que o castelán e o catalán sexan vehiculares nas escolas catalás, apelando ás últimas sentenzas do Tribunal Constitucional, do Supremo e do Superior de Xustiza de Cataluña.
Fonte: El Mundo
O Goberno vasco ensina a deseñar páxinas web en éuscaro
O Instituto Vasco de Administración Pública editou un libro dixital dirixido a orientar na creación de páxinas web integramente en éuscaro. Komunikazio elektronikoa. IVAPe gomendioak web-orriak idazteko é o primeiro libro en liña pensado para o usuario interesado en crear páxinas e contidos web cuxa única lingua sexa o éuscaro.
Fonte: Deia
Baixan a 17 as peticións en Cataluña para escolarizar alumnos en castelán
A Generalitat recibiu un total de 17 solicitudes de familias catalás para pedir a escolarización dos seus fillos en castelán durante este curso nos centros públicos (ata o 30 de xaneiro de 2013), mentres que durante todo o curso 2011-12 as peticións ascenderon a 106.
Fonte: Granada Digital
Segundo un estudo, o éuscaro vén do dogón
A investigación do filólogo Xaime Martín Martín, á que dedicou doce anos, baséase nunha comparación entre o éuscaro e o dogón, que é falado en Malí por arredor de 250 000 persoas. A comparación estrutural do éuscaro con tres dos catorce dialectos mogón "mostrou exactamente a mesma orde de palabras na frase", asegura Ruiz.
Fonte: Cadena Ser
Boletín
Subscríbase ao boletín
