O incremento anual do uso do catalán en internet ao longo de 2013 foi do 1,14 % respecto ao ano 2012, segundo os datos do Barómetro de uso do catalán en internet da agrupación de Webmasters Independentes en Catalán, de Cultura e de Ámbitos Cívicos (WICCAC).

Fonte: Generalitat de Cataluña

O Concello de Errenteria organizou varios cursos intensivos gratuítos de éuscaro para as persoas en paro empadroadas na localidade.

Fonte: Diario Vasco

Co fin de fomentar a conversa en éuscaro xurdiu Mintzakide, un grupo de encontro e contacto entre persoas ás que lles interesa manter e practicar conversa en éuscaro. Hai máis dun mes, a organización iniciou unha campaña de crowdfunding co fin de recadar fondos para manter este proxecto e pór en marcha unha páxina web que estabeleza unha axenda coa actividade de todos os grupos de conversa de Pamplona e a comarca e que, ademais, sirva de punto de encontro para falantes de éuscaro.

Fonte: Noticias de Navarra

O Plan de éuscaro 2013-2017 do Concello de Lemoa saíuse do habitual. O documento inclúe medidas que, ademais de facilitar o uso da lingua vasca, fomentan a implicación dos veciños do municipio. A ritmo de rock, o grupo local Larregi asina unha canción que, entoada por residentes na urbe, aspira a converterse en máis que un himno.

Fonte: El Correo

A Asociación de Directores de Centros de Secundaria das Pitiusas (Adespi) denuncia que tras a posta en marcha do decreto de tratamento integrado de linguas(TIL) «non se detectou ningunha mellora na materia de inglés».

Fonte: Diario de Ibiza

O novo Currículo Vasco empeza a tomar forma. Daralles máis autonomía aos centros, impulsará o plurilingüismo co éuscaro como eixe e as tecnoloxías da información, tratará a dimensión específica da lingua e cultura vascas no contexto mundial, ao tempo que desenvolverá ao máximo a educación por competencias.

Fonte: Deia

O Diari de l’Educació (Diario da Educación) é un medio de comunicación dixital que nace coa vontade de informar sobre educación en todos os seus niveis, desde as escolas de infantil ata a universidade e a investigación, cun marco de referencia catalán pero cunha perspectiva internacional.

Fonte: Generalitat de Cataluña

A Consellería de Educación, Cultura e Deporte da Comunidade Valenciana ofrece este ano 7000 prazas en cursos de inglés en liña dirixidos a docentes de ensino non universitario no marco do Programa de Formación en Linguas Estranxeiras, co obxectivo de que estes profesionais poidan mellorar o seu coñecemento nesta lingua e impartir nela as súas clases.

Fonte: El Mundo

O Servizo Municipal de Éuscaro publica unha convocatoria de bolsas que se rexerá por fomentar a aprendizaxe e o uso do éuscaro entre a poboación de Orkoien mediante a concesión de bolsas para estudar aqueles cursos de éuscaro que se impartan entre o 1 de xullo de 2013 e o 30 de xuño de 2014, tanto en réxime extensivo (presencial e a distancia ou de autoaprendizaxe), como intensivo (mesmo internados).

Fonte: Pamplona actual

A Generalitat aprobou o decreto polo que se outorga ao Instituto de Estudos Araneses (Institut d’Estudis Aranesi) o carácter de academia e de autoridade lingüística do occitano, denominado aranés no Val de Aran. Con este decreto, convértese na autoridade para o asesoramento en lingua occitana nos organismos do Val de Aran, así como nos centros de ensino públicos e privados e os medios de comunicación de titularidade pública.

Fonte: Terra