España
A Generalitat de Cataluña apoia a edición de novos xogos de mesa en catalán
O Departamento de Política Lingüística apoiou con 228 880 euros a edición de 40 proxectos de 25 empresas para impulsar os xogos de mesa en catalán e traducir obras non literarias en 2023. A iniciativa permitiu a creación de 31 xogos orixinais e a tradución doutros 9. Ademais, foron traducidos xogos de estratexia e dedución con grande éxito internacional.
Fonte: Generalitat de Catalunya
O Concello de Burriana pon en marcha unha campaña para fomentar o valenciano a través da gastronomía
A campaña ‘En valencià és més dolç’, promovida polo Concello de Burriana e outros municipios valencianos, distribuirá sobres de azucre con versos de Vicent Andrés Estellés en locais de hostalería durante novembro e decembro. Esta iniciativa busca fomentar o uso do valenciano na vida diaria e achegar a poesía á cidadanía de forma próxima e orixinal, coa integración da cultura na rutina cotiá a través da gastronomía.
Fonte: El Periòdic
Eibar organiza actividades de sensibilización sobre a importancia do uso do éuscaro no deporte
Akebai organizou sesións de sensibilización sobre a importancia do éuscaro no deporte, nas que participaron máis de 50 adestradoras e adestradores, así como alumnado de Ensinanza e Animación Social e Deportiva da Uni Eibar-Ermua. Nas formacións abordáronse exemplos e recomendacións para normalizar o uso do idioma nas actividades deportivas.
Fonte: Eibarko Udala
O Goberno vasco e o Instituto da Cinematografía e das Arte Audiovisuais asinan un convenio para impulsar as producións en éuscaro
O Goberno vasco e o ICAA asinaron un convenio para impulsar a produción, distribución e exhibición do audiovisual en éuscaro, con transferencia de máis dun millón de euros. Este fondo vincúlase á convocatoria de axudas do Departamento de Cultura, que aumentou significativamente a súa dotación para apoiar obras innovadoras e internacionais, incluíndo series en éuscaro. O acordo culmina as negociacións iniciadas en 2019 para reforzar o sector audiovisual na lingua propia.
Fonte: Gobierno Vasco
As avaliacións ao alumnado de secundaria de Menorca mostran un empeoramento nas competencias lingüísticas en catalán
As probas de diagnóstico realizadas pola Consellería de Educación en maio revelan un preocupante descenso nas competencias lingüísticas do alumnado de segundo da ESO en Menorca, especialmente en catalán, xa que só o 66 % alcanzou os coñecementos mínimos, fronte ao 81 % en 2016-2017. A baixada tamén afecta o castelán, cunha redución de 7 puntos, atribuída a factores como a pandemia, o uso de pantallas e a nova lei educativa.
Fonte: Menorca
O Goberno catalán e o Conselh de Arán colaboran para reforzar a promoción do aranés
A Generalitat de Cataluña e o Conselh Generau d’Aran acordaron reforzar a colaboración para protexer e promover o aranés e exploraron o traspaso de competencias lingüísticas á comarca. Trataron a creación de equipos especializados e o impulso de políticas adaptadas, así como medidas para aumentar a presenza do aranés nos medios e mellorar a formación de docentes.
Fonte: Generalitat de Catalunya
A Universidade de Barcelona acolle unha xornada sobre a xestión lingüística na formación do profesorado de secundaria
Os conselleiros de Educación e Política Lingüística subliñaron a importancia do profesorado como modelo lingüístico para o alumnado de secundaria durante a xornada sobre a xestión lingüística na formación docente. Ambos destacaron a necesidade de proporcionarlles aos docentes as ferramentas e formación necesarias para xestionar aulas diversas e fomentar o uso das linguas. A xornada serviu tamén para analizar as competencias lingüísticas requiridas, identificar melloras na formación e avaliar a implementación das estratexias lingüísticas no sistema educativo.
Fonte: Generalitat de Catalunya
A Universidade de Barcelona realiza un estudo sobre o uso das linguas e as necesidades lingüísticas en centros de traballo de Cataluña
Un estudo da Universidade de Barcelona, en colaboración coa UGT de Cataluña, analizou as dinámicas lingüísticas nos centros de traballo da comunidade. Entre as conclusións, destaca que o 85 % dos delegados sindicais usa o catalán ou que existen variacións significativas por territorios e sectores, xa que o castelán é máis frecuente en zonas de alta inmigración. O informe subliña a necesidade de formación en catalán para reducir desigualdades e fomentar a integración lingüística.
Fonte: Universitat de Barcelona
O Parlamento de Cataluña reclama máis intérpretes e recursos para a lingua de signos catalá
O Parlamento de Cataluña aprobou instar o Goberno a incrementar a dotación de intérpretes de lingua de signos catalá (LSC) para estudantes e crear un programa orzamentario para aplicar a lei da LSC. Ademais, acordouse reforzar as axudas ás entidades de apoio á comunidade xorda e establecer unha bolsa de mediadores comunicativos.
Fonte: El Diario
Os premios Crea OCCAT recoñecen o papel da mocidade na promoción do catalán e do occitano no ámbito dixital
O conselleiro de Política Lingüística participou na entrega dos premios Crea OCCAT no Palau de Pedralbes, onde destacou a importancia do uso do catalán e o occitano no ámbito dixital e o papel da mocidade.
Fonte: Generalitat de Catalunya
Boletín
Subscríbase ao boletín
