España
O Goberno navarro impulsa unha campaña para promover a escolarización en éuscaro
Esta campaña ten como obxectivo informar e fomentar a escolarización en éuscaro de cara á prematrícula de Educación Infantil e Primaria para o curso 2017-2018.
Fonte: Pamplona Actual
O Goberno vasco sinala como obxectivo que en 2020 o 75 % da mocidade vasca fale éuscaro
O Goberno vasco presentou as súas principais liñas de actuación en materia de política lingüística para os vindeiros anos, entre as que destacan o fomento do uso do éuscaro nos ámbitos non formais e no tempo de lecer. Así mesmo, pretende que en 2020 o 75% da xente nova de menos de 25 anos fale éuscaro.
Fonte: El Correo
O número de peticións para realizar actividades escolares en catalán e aragonés supera as previsións do Goberno de Aragón
A falta de orzamento impide financiar máis de 150 iniciativas de centros de ensino de Aragón para levar a cabo actividades en catalán e aragonés, o que supón que case dous terzos queden sen asignación económica.
Fonte: Público
Os centros educativos da Comunidade Valenciana elixirán o nivel de competencia lingüística de partida para o seu alumnado
O decreto de plurilingüismo aprobado polo Goberno da Comunidade Valenciana establece que os centros educativos serán os que escollan o nivel de competencia lingüística de partida para o seu alumnado, unha decisión que terá que recibir o aval do Consello Escolar e a validación da Administración.
Fonte: La Vanguardia
A Real Academia da Lingua Vasca e o Parlamento de Navarra reforzan a súa colaboración
Representantes de ambas as entidades mantiveron unha reunión para darlle continuidade a unha colaboración que ten entre os seus obxectivos visibilizar o éuscaro a través de proxectos educativos, culturais e etnográficos.
Fonte: Noticias de Navarra
Unha nova edición do Diccionario General Vasco suma novos termos de textos legais e administrativos
A quinta edición do Diccionario General Vasco engadiu 1169 novas entradas e modificou outras 4446. As últimas incorporacións proceden, principalmente, de textos legais e administrativos.
Fonte: Deia
Un decreto foral do Goberno de Navarra garantirá a atención en éuscaro na Administración segundo a zonificación
O proxecto de decreto foral pretende garantirlle á cidadanía a atención en éuscaro na Administración segundo a zonificación marcada pola lei.
Fonte: Pamplona Actual
Publícanse as bases dos premios de creación literaria e artística en aragonés e catalán
O Boletín Oficial de Aragón publicou as bases para a concesión destes premios que recoñecerán a creación literaria (narrativa, poesía, teatro ou ensaio) en lingua aragonesa ou catalá, a tradución ao aragonés ou outra forma de expresión artística relacionada con estas linguas.
Fonte: Aragón Liberal
A Fundación PuntuEUS impulsará a presenza do éuscaro no contorno dixital
O Plan estratéxico 2020 da Fundación PuntuEUS propón impulsar a utilidade, presenza e visibilidade do éuscaro na rede a través do dominio .eus, para o cal se marca como obxectivo que este dominio se converta no terceiro en importancia no País Vasco.
Fonte: EcoDiario
Ponse en marcha unha nova campaña para impulsar o emprego de termos de empresa en catalán
“Per comunicar, clar i català” é unha campaña de divulgación da terminoloxía en catalán relacionada co ámbito empresarial que ten como finalidade dar a coñecer estes termos e concienciar sobre a importancia de non adoptar anglicismos innecesarios.
Fonte: Generalitat de Cataluña
Boletín
Subscríbase ao boletín
