A editorial Hércules publica en galego Tortura branca, obra da Premio Nobel da Paz Narges Mohammadi, quen volve afrontar condenas e cárcere en Irán pola súa defensa dos dereitos humanos. No libro, a activista recolle a experiencia de trece mulleres sometidas a illamento extremo, unha práctica de violencia psicolóxica que procura quebrar a identidade das persoas presas.

Fonte: Faro de Vigo

O Concello de Narón impulsa unha nova edición de Guizo, iniciativa que procura que as familias compartan tempo de lecer en galego e en vínculo coa natureza. Durante o primeiro semestre de 2026 desenvolveranse cinco propostas no Couto, destinadas a nenas e nenos de 6 a 12 anos acompañados por unha persoa adulta, nas que se abordarán cuestións como a biodiversidade, a xestión de residuos, a reforestación ou a enerxía solar. Ademais de seren gratuítas, as actividades requiren inscrición previa por haber prazas limitadas.

Fonte: Concello de Narón

O Servizo de Normalización Lingüística publicou as bases da convocatoria destas axudas que están destinadas a estudantes de Programas de Doutoramento da USC que redacten e defendan en galego a tese de doutoramento no curso académico 2025/2026.

Fonte: Consello da Cultura Galega

Unha empresa do Porriño desenvolveu o primeiro axente de voz con intelixencia artificial que funciona integramente en galego. A ferramenta permite interactuar oralmente e recoñecer as variantes fonéticas propias das distintas zonas do país. O proxecto oriéntase a empresas e entidades que desexan ofrecer atención personalizada a persoas galegofalantes e contribúe a reforzar a presenza do galego nos servizos dixitais cotiáns.

Fonte: G24

Esta celebración contou cun completo programa dedicado a Valentín Lamas Carbajal, coincidindo con datas senlleiras vencelladas á súa figura e á prensa en galego. As actividades combinaron reflexión profesional sobre xornalismo, redes sociais e intelixencia artificial con actos culturais e festivos. A xornada puxo en valor o papel dos medios en galego nun contexto dixital cambiante e serviu para reivindicar a vixencia do galego en condicións de igualdade con outras linguas.

Fonte: Asociación de Medios en Galego

Os Premios Youtubeiras+ celebraron en Ferrol a súa novena edición nunha gala na que recoñeceron o labor de creadoras e creadores que impulsan o uso do galego no ámbito dixital. O certame salientou tanto a calidade lingüística como a diversidade de formatos e temáticas presentes nas plataformas en liña. A edición bateu récord de participación e ampliou o seu alcance a calquera espazo dixital.

Fonte: Galicia Confidencial

Os XXVII Encontros para a Normalización Lingüística propuxeron un conxunto de medidas para mellorar a función dos Servizos de Normalización Lingüística (SNL) e os Equipos de Dinamización da Lingua Galega (EDLG). As principais propostas inclúen a creación dunha normativa supramunicipal que regule os SNL, un aumento orzamentario, a mellora na formación e a creación de espazos de innovación. O documento de conclusións tamén destaca a necesidade dun maior compromiso das administracións públicas, así como a colaboración entre os equipos de dinamización lingüística.

Fonte: Consello da Cultura Galega

O secretario xeral da Lingua, Valentín García, e o director xeral de Centros e Recursos Humanos, Jesús Álvarez, participaron no peche de ‘21 Días co galego e +’, no colexio teense dos Tilos, onde se puxo fin á oitava edición do programa impulsado pola Xunta na que participaron 10 centros educativos de maneira voluntaria.

Fonte: O Portal da Lingua Galega

O secretario xeral da Lingua, Valentín García, participou no Vello Cárcere no acto de presentación da obra Para que non estiñe a memoria das avoas, coa que a que a catedrática e doutora en Filoloxía Galega, especialista en toponimia, investigadora e escritora Xulia Marqués Valea homenaxea a memoria da pontenovesa Perfecta Ogaza Fontagordo.

Fonte: O Portal da Lingua Galega

O secretario xeral da Lingua, Valentín García, participou na presentación da V edición do Premio de Literatura Infantil Simbad para o Recordo e o Alzhéimer. Trátase dunha iniciativa impulsada pola Asociación Galega de Axuda aos Enfermos con Demencia Tipo Alzhéimer que conta co apoio da Xunta de Galicia, co obxectivo de sensibilizar sobre esta doenza entre a cativada e establecer vínculos a través da literatura entre as distintas xeracións.

Fonte: O Portal da Lingua Galega