A desaparición do galego como lingua habitual da documentación escrita a partir do século XVI provocou a tradución e modificación de numerosos apelidos galegos. Segundo explica a filóloga Ana Boullón, este proceso afectou de maneira desigual á onomástica e deu lugar á presenza actual de formas castelanizadas e híbridas. A investigadora sitúa esta transformación no marco do chamado "colonialismo onomástico", unha política lingüística de facto orientada á asimilación.

Fonte: Nós Diario

A Xunta de Galicia vén de conseguir o compromiso do Ministerio de Educación do Goberno de España de manter o ensino do galego no Instituto Vicente Cañada Blanch de Londres. O subsecretario de Educación, Formación Profesional e Deportes, Santiago Roura, remitiu unha carta ao conselleiro de Educación, Ciencia, Universidades e FP, Román Rodríguez, na que indica que, de cara ao curso 2027/28, se sacará a concurso a praza dun docente “para a súa cobertura estable e definitiva”.

Fonte: O Portal da Lingua Galega

Arrincou a Feira do Libro de Viveiro con preto de medio cento de actividades nos xardíns de Noriega Varela deste municipio da mariña lucense. Trátase da undécima das citas do circuíto que a Xunta de Galicia impulsa en colaboración coa Federación de Librarías de Galicia, e que está a percorrer 13 municipios galegos este verán dando lugar a máis de 80 días de actividade cultural.

Fonte: Cultura de Galicia

O conselleiro de Emprego, Comercio e Emigración, José González, salientou o valor de iniciativas como os Premios Alecrín na difusión da cultura e tradicións galegas e no reforzo dos lazos coa colectividade galega en Cataluña.

Así o sinalou no acto de entrega destes recoñecementos, impulsados pola Federación de Entidades Galegas de Cataluña (Fegalcat) e que poñen en valor a traxectoria de persoas e entidades de diferentes ámbitos a prol da idiosincrasia galega.

Fonte: Xunta de Galicia

Fina Paulos e Óscar Rey, docentes do IES Maximino Romero de Lema de Baio, impulsan xunto ao alumnado proxectos educativos que combinan novas tecnoloxías, intelixencia artificial e lingua galega. Entre eles destaca Miño en xogo, un xogo de mesa sobre o río Miño que aborda cuestións de patrimonio, historia, xeografía e diversidade e que foi recoñecido cun primeiro premio estatal na categoría de ESO. As iniciativas buscan tamén reforzar as competencias lingüísticas en galego e recuperar a historia, a cultura e as tradicións.

Fonte: Nós Diario

O poemario Infelices aves, de Xosé Luís Mosquera Camba, foi escollido como gañador da primeira edición do Certame de Poesía Batallón Literario da Costa da Morte, convocado polo Concello de Cee en colaboración co propio colectivo literario. O premio, dotado con 3000 euros e a publicación da obra, recibiu 60 propostas. 

Fonte: Cultura galega

A Mesa pola Normalización Lingüística denunciou un caso de discriminación lingüística ocorrido nun establecemento comercial de Vigo. Segundo a entidade, unha clienta galegofalante viu impedido o seu dereito a utilizar o galego e tamén tivo dificultades para presentar unha reclamación. A Mesa considera que estes feitos vulneran os dereitos lingüísticos e reclama medidas que garantan que as persoas poidan ser atendidas sen discriminación pola lingua que empregan.

Fonte: Nós Diario

O sitio web As Chaves da Lingua dedica un recurso ao léxico relacionado coa eclipse total de sol do 12 de agosto. A proposta aproveita o interese xerado polo fenómeno astronómico para divulgar en galego os principais termos relacionados coas eclipses e facilitar o coñecemento do vocabulario específico deste acontecemento.

Fonte: As Chaves da Lingua

A primeira edición de V Nove desenvolverase entre agosto e outubro en nove concellos da comarca de Valdeorras, cun itinerario que combina música, humor, cinema, narración oral e natureza. As actividades celebraranse en espazos ao aire libre relacionados co patrimonio e coa paisaxe da comarca, desde castelos e adegas ata praias fluviais e montañas. O proxecto pretende contribuír á dinamización cultural e turística do territorio.

Fonte: Galicia Confidencial