O delegado territorial da Xunta en Lugo, Javier Arias, e o secretario xeral da Lingua, Valentín García, participaron na capital lucense na presentación da primeira edición dos Premios Dalle Like, unha iniciativa que conta coa colaboración da Xunta e que busca recoñecer o talento galego no ámbito dixital e das redes sociais.

Fonte: O Portal da Lingua Galega

A Mesa pola Normalización Lingüística esixe a RTVE que cumpra coa obriga legal de emitir contidos dobrados e subtitulados en galego e que abandone o recurso á intelixencia artificial para suplir esa carencia. A entidade denuncia que a corporación pública non alcanza as cotas fixadas pola lei e que a utilización destas ferramentas ofrece resultados de baixa calidade, ademais de precarizar o labor de profesionais da dobraxe e da tradución.

Fonte: Galicia Press

A Deputación de Pontevedra activa unha convocatoria de 150.000 euros destinada a apoiar entidades culturais sen ánimo de lucro que impulsen a dinamización do galego. As axudas, que poderán acadar ata 4000 euros por proxecto sen superar o 75% do orzamento, diríxense a iniciativas que promovan o uso e o prestixio da lingua en ámbitos como a creación literaria e audiovisual, a toponimia ou o tecido comercial.

Fonte: Deputación de Pontevedra

O BNG presentou en Vigo a campaña Pronúnciate, coa que anima a recuperar as formas galegas de nomes e apelidos como resposta á castelanización histórica, especialmente durante o franquismo. Durante o acto, cargos públicos acompañaron unha persoa que formalizou o cambio, co obxectivo de exemplificar un trámite que cualifican de sinxelo.

Fonte: Vigo al Minuto

O conselleiro de Cultura, Lingua e Xuventude, José López Campos, anunciou que se reunirá o mércores, 25 de febreiro, coas principais institucións culturais galegas co fin de “contar con todas elas para avanzar xuntos no deseño de actividades do Ano Oteriano”. Así o adiantou durante a súa visita á Fundación Otero Pedrayo, na que estivo acompañado polo secretario xeral da Lingua, Valentín García, e o director xeral de Cultura, Anxo M. Lorenzo.

Fonte: O Portal da Lingua Galega

O conselleiro de Cultura, Lingua e Xuventude, José López Campos, celebrou por adiantado o Día da Lingua Materna (que ten lugar o 21 de febreiro) coa cativada da escola infantil pública Virxe de Covadonga, en Ourense, onde os nenos e nenas gozaron de Latexos, unha actividade de dinamización lingüística na que colabora a Xunta de Galicia.

Fonte: Xunta de Galicia

O Concello de Pontevedra acolleu a presentación de «M8 por ler», unha plataforma virtual da Fundación Xistral para promover a lectura en galego e xerar un diálogo arredor dos libros nesta lingua. O portal, que xa está dispoñible, inclúe un catálogo de libros rexistrados e ofrece funcionalidades sociais como valoracións e recomendacións personalizadas.

Fonte: Cultura Galega

O delegado do Goberno en Galicia, Pedro Blanco, reuniuse coa directiva da Irmandade Xurídica Galega para deseñar estratexias que favorezan o uso do galego na Policía Nacional. A reunión, na que participaron tamén representantes da Administración e a Universidade de Santiago, resaltou a importancia da colaboración pública para a normalización lingüística.

Fonte: Galicia Confidencial

A Xunta de Galicia deu a coñecer os centros educativos gañadores do concurso do Día das Letras Galegas 2026, dedicado a Begoña Caamaño, que recaeron no colexio ourensán de Ribadavia e no instituto Castelao, de Vigo, polas súas exposicións nas que poñen en valor as achegas da homenaxeada á cultura e lingua galega a través do seu labor xornalístico e literario.

O certame, convocado polas consellería de Cultura, Lingua e Xuventude e a de Educación, Ciencia, Universidades e FP, ten como obxecto implicar a comunidade educativa nesta efeméride e que lles permite coñecer máis profundamente a figura da homenaxeada e tamén a época na que viviu. De igual xeito, estes traballos amplían a oferta de materiais didácticos e divulgativos en galego ao redor desta efeméride nos centros educativos galegos.

Fonte: O Portal da Lingua Galega

A Xunta reforza os lazos coa lusofonía co apoio, un ano máis, do Festival Converxencias que programa, ata o 15 de marzo, un total de 16 actividades entre Galicia e Portugal que abranguen concertos, teatro, cinema e poesía, entre outras actividades. Así o deu a coñecer hoxe o secretario xeral da Lingua, Valentín García, na presentación da duodécima edición deste certame.

Tal e como precisou o representante da Consellería de Cultura, Lingua e Xuventude, as actividades, que xa se levan desenvolvendo desde o pasado 10 de febreiro, celebraranse durante case un mes entre a localidades lusa de Braga e as galegas de Padrón, Ponteareas, A Estrada e Santiago de Compostela.

Fonte: O Portal da Lingua Galega