A AGAL puxo en marcha a campaña «Falo galego, fala-me português» para dar a coñecer entre a comunidade lusófona a realidade lingüística de Galicia e favorecer unha comunicación sen cambios de idioma. A iniciativa procura que as persoas portuguesas comprendan o galego como unha lingua próxima e que quen visite Galicia poida expresarse en portugués con naturalidade.

Fonte: Galicia Xa

O secretario xeral da Lingua, Valentín García, participou en Fisterra na presentación da obra Lope Sánchez de Moscoso, un vizconde no tempo de Enrique IV de Castela. Estudo histórico, análise e colección de documentos, da autoría de Manuel Canosa Trillo e editado co apoio da Xunta de Galicia.

Fonte: O Portal da Lingua Galega

A primeira enquisa sobre a presenza do galego na Administración estatal en Galicia constata un elevado nivel de competencia lingüística entre o persoal público, xa que case o 72 % acredita un Celga 4 ou superior. Ademais, o 43 % utilízao habitualmente no traballo, unha proporción maior nos postos de atención directa. A Delegación do Goberno comprométese a reforzar a formación, os recursos e as medidas organizativas para garantir que a cidadanía poida relacionarse coa Administración na lingua propia do país.

Fonte: Galicia Confidencial

A AGAL renovou Topogal, unha ferramenta dixital que permite consultar e xeolocalizar os topónimos de Galicia e Portugal, así como das áreas galegofalantes limítrofes. O recurso, aínda en fase de probas, incorpora información gráfica, histórica e etimolóxica, ademais de datos sobre o uso do artigo ou a advocación de cada lugar.

Fonte: Nós Diario

A Deputación de Pontevedra destinará 150 000 euros a 42 concellos de menos de 50 000 habitantes para reforzaren a presenza social do galego. As achegas, que van desde os 262 ata os 7687 euros, financiarán propostas culturais, educativas e comerciais, entre elas certames, obradoiros, publicacións, ciclos audiovisuais etc. A convocatoria abrangue municipios de todas as comarcas da provincia e procura ampliar o uso da lingua entre públicos e ámbitos diversos.

Fonte: Deputación de Pontevedra

A Xunta colaborará con 79 concellos no desenvolvemento de accións vencelladas á promoción da lingua a través da liña de subvencións, dotada con 350 000 €, destinada a fomentar servizos lingüísticos nas entidades locais e nas agrupacións de municipios.

Fonte: O Portal da Lingua Galega

O secretario xeral da Lingua, Valentín García, participou na clausura da XXXVI edición dos Cursos de lingua e cultura galegas Galego sen fronteiras, organizados pola Real Academia Galega e a Universidade de Santiago de Compostela coa colaboración da Xunta de Galicia, que se desenvolveron na capital de Galicia do 3 ao 24 de xullo, coa participación de 62 estudantes de 18 países de Europa, Asia e América.

Fonte: O Portal da Lingua Galega

A Coruña acollerá o 28 de agosto a Festa do Apego 2026, unha xornada gratuíta que ofrecerá ás familias con crianzas de ata seis anos espazos de lecer e socialización en galego. Ademais, durante o outono, as familias participantes no programa Apego poderán asistir a novas propostas de música, teatro, monicreques, narración oral, maxia e obradoiros.

Fonte: Consello da Cultura Galega

Narón acollerá en setembro un curso gratuíto de iniciación á lingua e á cultura galegas, dirixido a persoas maiores de 16 anos que se acheguen por primeira vez ao idioma. A formación, de 20 horas e cun máximo de 20 prazas, impartirase de maneira presencial os martes e xoves, entre o 3 e o 24 de setembro. A iniciativa busca favorecer a integración sociocultural das persoas participantes e ampliar a comunidade de falantes de galego.

Fonte: Concello de Narón

A Universidade de Santiago de Compostela elaborou un glosario con preto dun cento de termos relacionados coas eclipses, ante a expectación pola que está prevista para o 12 de agosto. O recurso, dirixido a entidades científicas, medios de comunicación e persoas divulgadoras, inclúe definicións, formas galegas e equivalencias en castelán e inglés, co fin de facilitar a creación de contidos rigorosos sobre este fenómeno astronómico.

Fonte: Consello da Cultura Galega