O Concello de Valga, en colaboración coa Secretaría Xeral da Lingua, organiza unha andaina por distintos lugares do municipio para promover o uso do galego nas actividades cotiás. A iniciativa emprega así a actividade ao aire libre e a participación veciñal como espazos para favorecer a presenza e o uso habitual da lingua.

Fonte: O Portal da Lingua Galega

O colectivo Galeguizar Galicia presentou en Vigo a Guía básica de galeguización empresarial, un documento de trinta páxinas editado polo Foro Enrique Peinador co patrocinio da Deputación de Pontevedra. A publicación propón medidas para incorporar o galego á actividade empresarial, como ofrecer contratos e facturas nesta lingua, facilitar a atención bilingüe, utilizar rotulación en galego e formar o persoal.

Fonte: La Voz de Galicia

A Xunta de Galicia convoca por segunda vez os exames Celga en liña, tras a primeira experiencia realizada o ano pasado e incrementando as prazas nesta edición de 100 a 200. Así o publica o Diario Oficial de Galicia que establece a data de realización das probas que certifican o dominio da lingua galega para o nivel 4 o 27 novembro.

Fonte: O Portal da Lingua Galega

Proxector, a iniciativa de divulgación científica en galego do Consello da Cultura Galega e a Universidade de Santiago, dedica a súa nova entrega ao mundo das aves e ás súas migracións. A escolma reúne doce vídeos que permiten coñecer especies, hábitats e comportamentos, con especial atención aos ecosistemas costeiros e aos espazos galegos de importancia para a conservación.

Fonte: Consello da Cultura Galega

O Consello da Cultura Galega e Alingua asinaron un protocolo para desenvolver accións conxuntas de promoción e normalización do galego, desde actividades culturais ata investigación e elaboración de materiais divulgativos. Entre as primeiras actuacións figura un estudo sobre a oferta e a demanda de produtos, servizos e contidos en galego para a crianza. O proxecto partirá dun encontro con familias do programa Apego, que permitirá identificar necesidades e conectalas co tecido produtor e empresarial.

Fonte: Consello da Cultura Galega

O secretario xeral da Lingua, Valentín García, acompañou o alumnado do colexio Canosa-Rus, en Coristanco, que participou no obradoiro de xogos de mesa en galego, unha iniciativa apoiada pola Xunta “na súa aposta, xunto con outras actividades, polos centros educativos como espazos de socialización, máis alá das aulas e das horas lectivas, onde prestixiar o uso da lingua galega”, tal e como apuntou.

Fonte: O Portal da Lingua Galega

O secretario xeral da Lingua, Valentín García, participou no acto de entrega do XLIII Premio Xerais de Novela a Alberto Lema, pola obra A boca do río; do XLI Premio Merlín de Literatura Infantil a Ivana Gómez, pola obra A Banda da Albóndega e o segredo afundido de Areleira, e do XVIII Jules Verne de Literatura Xuvenil a Santiago Lopo pola obra A lingua dos grifóns, nun acto que se celebrou no Museo do Mar de Galicia.

Fonte: O Portal da Lingua Galega

A Asociación de Medios en Galego (AMEGA) organiza tres encontros nas universidades da Coruña, Santiago de Compostela e Vigo para analizar o presente e o futuro dos medios de comunicación en galego. As xornadas desenvolveranse os días 14, 15 e 19 de outubro e abordarán a historia do xornalismo galego, a súa contribución á normalización lingüística, o papel das mulleres nos medios e os desafíos da intelixencia artificial.

Fonte: Xornal de Lugo

Radiotelevisión Española comprometeuse a incorporar programación infantil dobrada ao galego na canle Clan antes de que remate 2026. Segundo informou A Mesa pola Normalización Lingüística, entre os primeiros contidos previstos figura a serie Momonster. As emisións realizaranse mediante un sistema dual que permitirá escoller a lingua.

Fonte: La Voz de Galicia

Pontevedra abriu a convocatoria da quinta edición de «Bótalle un conto», un certame que busca promover a narración oral en galego e poñer en valor tanto as persoas galegofalantes como a diversidade dialectal. A iniciativa pretende ademais favorecer o intercambio interxeracional e achegarse especialmente aos institutos e ás universidades. As persoas participantes deberán presentar historias de catro minutos, das que dez pasarán a unha final aberta ao público o 12 de decembro.

Fonte: Concello de Pontevedra