O proxecto “Aquí Tamén se Fala”, impulsado polo IES Rafael Dieste da Coruña, foi seleccionado como finalista dos premios estatais Docentes Referentes, entre preto de 500 candidaturas. A iniciativa, creada para promover o galego entre a mocidade, conseguiu mobilizar milleiros de estudantes, centros educativos, referentes culturais e clubs deportivos arredor da defensa da lingua.

Fonte: Nós Diario

O secretario xeral da Lingua, Valentín García, visitou o XXIII Festival de Cans, onde participou na inauguración da rúa Efémera Celso Bugallo, no Torreiro, acompañado de Alfonso Pato, director do festival, e do actor Eduardo Rodríguez Cunha "Tatán". O responsable da Lingua mantivo un encontro co profesorado e o alumnado gañadores do Concurso Escolar Rec.Curta 2026 dos colexios Franciscanos de Lugo e Santa María de Tui, das Escolas Católicas de Galicia.

Fonte: O Portal da Lingua Galega

O presidente da Xunta, Alfonso Rueda, situou a defensa e promoción do galego como un asunto de país e apelou á necesidade de avanzar nun Pacto pola Lingua “realista e consensuado” que permita blindar a pervivencia e o crecemento do idioma. No acto institucional do Día das Letras Galegas, dedicado este ano á escritora e xornalista Begoña Caamaño, Rueda reivindicou o galego como principal elemento identitario de Galicia e defendeu a importancia de fomentar o seu uso entre a mocidade, especialmente nos ámbitos cotiáns e dixitais. 

Fonte: O Portal da Lingua Galega

Un ano máis, o alumnado que estuda galego no IE Vicente Cañada Blanch de Londres visita Galicia no marco da súa Viaxe da Lingua 2026, que os achega de primeira man á lingua, literatura e cultura galegas durante unha semana. O secretario xeral da Lingua, Valentín García; o secretario xeral da Emigración, Antonio Rodríguez Miranda, e a directora-xerenta da Cidade da Cultura, Ana Isabel Vázquez, recibiron no Gaiás aos 22 alumnos e alumnas e o seu profesor, Román Landín, no remate do seu periplo cultural deste curso.

Fonte: O Portal da Lingua Galega

O secretario xeral da Lingua, Valentín García, participou na XII Festa da Lingua, organizada polos nove centros de ensino que integran a Coordinadora Comarcal Terras do Umia, coa colaboración da Consellería de Cultura, Lingua e Xuventude. No encontro, que se celebrou na Tafona, participaron case 1200 escolares de primaria, secundaria e bacharelato, e preto de 120 profesores. Na XII Festa da Lingua actuou un dos grupos máis populares do panorama musical galego: The Rapants.

Fonte: O Portal da Lingua Galega

O conselleiro de Educación, Ciencia, Universidades e FP, Román Rodríguez, reuniuse en Lisboa coa presidenta do Instituto Camões, Florbela Paraíba, para afondar na colaboración entre Galicia e Portugal e reforzar así os vínculos educativos no marco da lusofonía. Entre outras cuestións, no encontro abordouse a posibilidade de avanzar no desenvolvemento de iniciativas como as Escolas de Fronteiras, ademais de facer balance do programa polo que a Xunta facilita que o alumnado que cursa portugués en Galicia acredite as súas competencias de balde.

Fonte.- Xunta de Galicia

Un estudo da investigadora Elisa Suárez Caramés analiza os nomes comerciais de Vigo, A Coruña, Lugo e Ourense como parte da paisaxe lingüística urbana e como reflexo da realidade social, económica e cultural das cidades. A investigación conclúe que o castelán é a lingua maioritaria nestes rótulos, mentres que o galego ocupa un espazo menor, aínda que gaña presenza en sectores como a hostalería e a alimentación, asociado a valores de proximidade e tradición.

Fonte: Faro de Vigo

Melide é, en termos porcentuais, o concello coruñés con máis inscricións funerarias en galego, cun 5,6 % dos panteóns censados, segundo o proxecto Palabra e Memoria. O estudo, realizado por Socorro Cea en trinta cemiterios do municipio, mostra unha maior presenza da lingua no camposanto municipal do Castelo e porcentaxes máis baixas nos parroquiais. Os datos sitúan Melide como exemplo dunha tendencia emerxente en Galicia, onde o uso do galego na epigrafía funeraria medrou nos últimos anos grazas ao relevo xeracional e á mellora da atención das empresas do sector.

Fonte: La Voz de Galicia

O alumnado do CIFP Portovello de Ourense coñeceu de primeira man a estratexia comunicativa do Celta nun encontro centrado en empresas que empregan o galego como lingua principal. Andrés Montenegro e André Taboada explicaron como o club integra a lingua en campañas, redes sociais, contidos audiovisuais e accións coa afección, non como recurso puntual, senón como parte da súa identidade e da súa estratexia empresarial. A sesión abriu tamén un diálogo sobre o papel do deporte como altofalante da cultura galega e como espazo de conexión co territorio.

Fonte: RC Celta

A Consellería de Cultura, Lingua e Xuventude, por medio da Secretaría Xeral da Lingua, e Renfe Viajeros colaboran un ano máis para homenaxear a figura homenaxeada pola Real Academia Galega este 17 de maio, Begoña Caamaño. Ao longo de todo este mes, a imaxe institucional do Día das Letras Galegas da campaña da Xunta de Galicia viaxará nos repousacabezas dos trens de alta velocidade dos traxectos de Media Distancia e Avant.

Fonte: O Portal da Lingua Galega