O director xeral de Cultura, Anxo M. Lorenzo, inaugurou a Feira do Libro de Foz, a penúltima parada do circuíto que a Xunta de Galicia impulsa en colaboración coa Federación de Librarías de Galicia, onde convidou a desfrutar “a maiores e pequenos de catro días ateigados de presentacións, lectura e moita cultura con máis dunha trintena de actividades”.

Fonte: Cultura de Galicia

A música en galego vive un período de auxe, con millóns de reproducións nas plataformas dixitais, concertos multitudinarios e unha crecente presenza entre o público novo. Artistas como Tanxugueiras, Fillas de Cassandra, Mondra, The Rapants, Hard GZ, 9Louro ou Lg1do están a impulsar unha escena que chega a novos públicos e que pode contribuír a reforzar o uso social do galego entre as novas xeracións. Este éxito prodúcese, paradoxalmente, nun contexto de retroceso do uso habitual da lingua segundo as estatísticas oficiais.

Fonte: Cadena SER

A Illa de Arousa acolleu os actos do Día das Galegas nas Letras, organizado pola plataforma de crítica feminista A Sega e dedicado este ano á escritora Begoña Caamaño, tamén recoñecida pola Real Academia Galega no Día das Letras Galegas. O programa inclúe un roteiro pola súa vida e obra, unha mesa redonda con especialistas, un micro aberto e actividades lúdicas.

Fonte: Cultura galega

A Xunta de Galicia anunciou que recorrerá pola vía administrativa e xudicial a sanción de 3,5 millóns de euros imposta polo Ministerio de Traballo pola situación laboral dos auxiliares de conversa. O Goberno galego traballa nun programa alternativo para manter este apoio ao ensino de linguas con maior seguridade xurídica.

Fonte: El Correo Gallego

A Xunta de Galicia colaborará con 39 concellos para impulsar a modernización e renovación de equipamentos culturais como centros socioculturais, auditorios ou bibliotecas. Así se recolle na resolución de axudas publicada no Diario Oficial de Galicia desta liña de subvencións dotada con 500 000€.

Fonte: Cultura de Galicia

O sistema educativo galego contará con 536 centros plurilingües o próximo curso 2026/27 nas etapas de Infantil, Primaria, ESO ou Bacharelato e FP. Seis centros decidiron incorporarse a esta iniciativa e outros dous ampliar a súa participación na mesma a outras etapas, o que confirma o incremento progresivo deste modelo, voluntario para os centros, desde a súa posta en marcha.

Fonte: Xunta de Galicia

A desaparición do galego como lingua habitual da documentación escrita a partir do século XVI provocou a tradución e modificación de numerosos apelidos galegos. Segundo explica a filóloga Ana Boullón, este proceso afectou de maneira desigual á onomástica e deu lugar á presenza actual de formas castelanizadas e híbridas. A investigadora sitúa esta transformación no marco do chamado "colonialismo onomástico", unha política lingüística de facto orientada á asimilación.

Fonte: Nós Diario

A Xunta de Galicia vén de conseguir o compromiso do Ministerio de Educación do Goberno de España de manter o ensino do galego no Instituto Vicente Cañada Blanch de Londres. O subsecretario de Educación, Formación Profesional e Deportes, Santiago Roura, remitiu unha carta ao conselleiro de Educación, Ciencia, Universidades e FP, Román Rodríguez, na que indica que, de cara ao curso 2027/28, se sacará a concurso a praza dun docente “para a súa cobertura estable e definitiva”.

Fonte: O Portal da Lingua Galega

Arrincou a Feira do Libro de Viveiro con preto de medio cento de actividades nos xardíns de Noriega Varela deste municipio da mariña lucense. Trátase da undécima das citas do circuíto que a Xunta de Galicia impulsa en colaboración coa Federación de Librarías de Galicia, e que está a percorrer 13 municipios galegos este verán dando lugar a máis de 80 días de actividade cultural.

Fonte: Cultura de Galicia

O conselleiro de Emprego, Comercio e Emigración, José González, salientou o valor de iniciativas como os Premios Alecrín na difusión da cultura e tradicións galegas e no reforzo dos lazos coa colectividade galega en Cataluña.

Así o sinalou no acto de entrega destes recoñecementos, impulsados pola Federación de Entidades Galegas de Cataluña (Fegalcat) e que poñen en valor a traxectoria de persoas e entidades de diferentes ámbitos a prol da idiosincrasia galega.

Fonte: Xunta de Galicia