O Servizo de Normalización Lingüística convocou tres cursos en liña de lingua galega dirixidos ao persoal docente e investigador da institución. A formación desenvolverase a través do Campus Virtual entre o 21 de setembro e o 23 de novembro de 2026. A oferta estrutúrase en tres niveis, desde unha aproximación básica á lingua estándar ata unha modalidade superior de competencias lingüísticas.

Fonte: Consello da Cultura Galega

Exposalnés acolleu a presentación dunha iniciativa comarcal coa que os Equipos de Dinamización da Lingua Galega do Salnés procuran reforzar o uso do idioma entre a xente máis nova. O proxecto xurdiu hai dous anos, ao constataren nos centros educativos un retroceso do galego e a consolidación de espazos escolares cada vez máis castelanizados. Tras outras accións conxuntas, a comarca contará agora con Salnesiña, unha mascota creada por Yoli Martínez e concibida como símbolo común da promoción lingüística. A figura percorrerá escolas e institucións locais co obxectivo de impulsar iniciativas compartidas e favorecer un bilingüismo máis equilibrado.

Fonte: Faro de Vigo

O secretario xeral da Lingua, Valentín García, presentou o obradoiro «De vacas: humor, retranca e nova oralidade», impartido por este grupo musical coa que a Xunta procura “dinamizar o galego no repertorio das corais galegas  e a transmisión interxeracional do idioma desde o ámbito musical”.

Fonte: O Portal da Lingua Galega

A Xunta de Galicia publicou no DOG a resolución pola que se conceden as axudas para o curso escolar 2025-2026 aos proxectos de fomento do uso do galego dos centros de titularidade pública de Galicia que imparten ensinanzas regradas de niveis non universitarios.

Fonte: Consello da Cultura Galega

A Xunta Xeral Extraordinaria do RC Deportivo aprobou a modificación da súa denominación social para incorporar a forma oficial do topónimo A Coruña. A decisión chega tras unha consulta vinculante ás persoas abonadas, na que máis do 79% apoiou o cambio de nome do club. O acordo supón un novo avance no recoñecemento público da toponimia galega no ámbito deportivo.

Fonte: Consello da Cultura Galega

O secretario xeral da Lingua, Valentín García, participou na entrega de premios do IX Certame Microrrelatos de Feiraco, onde agradeceu a implicación desta entidade na promoción e divulgación da lingua galega, “pola contribución deste tipo de iniciativa a un maior emprego e prestixio do noso idioma”.

Fonte: O Portal da Lingua Galega

A Xunta de Galicia acaba de publicar no Diario Oficial de Galicia a convocatoria de 11 novas bolsas de formación no Centro Ramón Piñeiro para a Investigación en Humanidades no eido da lingua e literatura galegas. Esta iniciativa, que conta cun investimento de preto de 300.000 euros enmárcase no compromiso do Goberno autonómico coa investigación lingüística, literaria, histórica e antropolóxica sobre o idioma propio de Galicia, co fin de promover o seu uso en todos os eidos profesionais e sociais.

Fonte: O Portal da Lingua Galega

O Teatro das Cortes acolle os días 27 e 28 de xuño o Festival da Lingua Moza, unha proposta cultural dirixida á infancia, á mocidade e ás familias. A programación combinará música, teatro, regueifa, cómic, encontros con creadoras e creadores e espazos de debate para achegar o galego ás novas xeracións desde a participación e o lecer. A iniciativa procura que a mocidade viva a lingua con naturalidade e reforza o papel do medio rural como espazo de creación, convivencia e dinamización cultural.

Fonte: A Mariña Xa

Un estudo de Cesuga e da Asociación Pro-Fundación Manuel Vello conclúe que o comercio urbano galego mantén unha situación de diglosia, malia que a clientela apenas rexeita ser atendida en galego. O informe, baseado en 250 enquisas realizadas en seis cidades, atribúe o predominio do castelán a prexuízos interiorizados e á percepción empresarial de que é unha opción máis segura. Os datos amosan que o galego ten unha presenza reducida na atención ao público, na planificación lingüística interna e nos procesos de selección de persoal.

Fonte: Nós Diario

O alumnado de 4º da ESO do CPI O Cruce de Cerceda entregoulle á Barbería de Rebe o Premio ao uso do galego nas empresas, que recoñece os negocios locais que incorporan a lingua propia na súa actividade pública. A elección chegou tras a análise duns 50 establecementos, nos que se avaliou a presenza do galego na rotulación, na información escrita, na atención á clientela, na publicidade e nas redes sociais.

Fonte: Diario de Bergantiños