Artistas, empresas e compañías poden inscribir os seus espectáculos na nova edición da Rede Cultural da Deputación da Coruña, á que a institución provincial destinará 1 900 000 euros. O catálogo desta iniciativa está formado por catro programas, un dos cales, o denominado "Lingua a Escena!" se dirixe a espectáculos con contidos orientados á dinamización social do galego.

Fonte: Deputación da Coruña

A serie galego-portuguesa Motel Valkirias iniciou a súa rodaxe cunha primeira xornada de filmación no set instalado no Hotel Congreso de Teo, onde o equipo recibiu a visita do director da Axencia Galega das Industrias Culturais (Agadic), Jacobo Sutil. A Xunta de Galicia cofinancia o proxecto cunha achega de máis de 250 000 euros á compañía compostelá CTV, que coproduce esta ‘dramedia’ transfronteiriza xunto á lusa SPi.

Fonte: O Portal da Lingua Galega

Grazas á colaboración entre o CSIC e a Universidade da Coruña, publícase unha nova edición do Calendario Científico Escolar en galego, con 365 efemérides do ámbito científico e tecnolóxico, acompañadas dunha guía didáctica para os centros de primaria e secundaria.

Fonte: Consello da Cultura Galega

O tradicional calendario da Universidade Vigo está dedicado este ano a poñer en valor o labor dos diferentes servizos e unidades administrativas da institución a prol do fomento do galego.

Fonte: Universidade de Vigo

A Secretaría Xeral de Política Lingüística e a Secretaría Xeral de Educación e Formación Profesional da Consellería de Cultura, Educación e Universidade convocan os premios a curtas de animación en galego elaboradas no marco do programa «Nós tamén creamos!» para o curso académico 2021/2022.

Fonte: O Portal da Lingua Galega

A Consellería de Educación concedeu o primeiro Premio Boas de Educación Inclusiva ao IES de Melide por un glosario dixital, adaptado á lingua de signos, con terminoloxía da familia profesional da carpintería e o moble. O catálogo inclúe 200 termos en galego e castelán.

Fonte: La Voz de Galicia

A académica correspondente e membro do Seminario de Onomástica Luz Méndez explica, nunha nova entrega da serie «O Seminario de Onomástica responde», a orixe e o significado do topónimo Melide.  

Fonte: La Voz de Galicia

Reclama que o novo Estatuto de Autonomía de Asturias declare a oficialidade do galego no Principado, nas mesmas condicións que o asturiano. Por este motivo, elaborou un informe no que se analiza a consideración da lingua galega nesta comunidade e a proposta de novo marco estatutario que limita a consideración de oficial para o galego ao seu ámbito territorial.

Fonte: Real Academia Galega

A filóloga Xulia Marqués Valea é a autora do número 7 da colección Terra Nomeada, un volume que recolle a orixe e o posible significado dos nomes das once parroquias e 102 entidades de poboación do concello lugués da Pontenova.

Fonte: Real Academia Galega

Xa está dispoñible en galego Wordle, un novo xogo en liña que consiste en adiviñar unha palabra de cinco letras ao día e despois compartir as xogadas a través das redes sociais. Inicialmente só se podía xogar en inglés, pero foron xurdido versións noutras linguas, entre elas, o galego, o catalán ou o español.

Fonte: Código Cero