O secretario xeral de Política Lingüística, Valentín García, participou na presentación da obra Un Camiño de cine Xacobeo, na que a xornalista galega Pilar Falcón recompila máis de medio cento de pezas audiovisuais que xiran arredor do Camiño de Santiago e do Ano Santo compostelán, desde 1950 ata a actualidade.

Fonte: O Portal da Lingua Galega

Os Premios Rosalía de Castro, que convoca a Deputación da Coruña, foron na edición deste ano para Xaquín Marín, Agrupación Astronómica Ío e Twitter en Galego, dos que se destacou o seu compromiso coa lingua galega.

Fonte: Deputación da Coruña

O curso Ferramentas da educación social ao servizo da normalización lingüística, organizado pola Coordinadora de Traballadores/as de Normalización da Lingua, desenvolverase en Santiago de Compostela os días 27 de setembro e 4 de outubro e será impartido por Ana González Quinteiro.

Fonte: CTNL

A Real Academia Galega acolleu unha escola de verán de tradución de alumnos e alumnas da Universidade de Kiel centrada na obra de Emilia Pardo Bazán. O programa, organizado polo profesor da institución alemá Javier Gómez Montero, permitiulles afondar na obra da autora e coñecer a súa casa-museo e o conxunto do patrimonio cultural que custodia a RAG.

Fonte: Real Academia Galega

A USC e a Xunta colaborarán nun proxecto sobre o neofalantismo. A proposta inicial inclúe a elaboración dun portal e o aproveitamento de aplicacións sociais para implicar a colectivos que optaron por incorporar a lingua galega nas súas interaccións cotiás.

Fonte: USC

Ser de Andrea Castaño Rodríguez recibiu o Premio de Relato Curto outorgado pola Asociación de Antigos Alumnos e Amigos da USC (Alumni). O galardón está dotado con 500 euros grazas ao patrocinio do hospital HM Rosaleda.

Fonte: USC

Unha tese de doutoramento presentada pola xa doutora Marta Díaz na Universidade de Vigo defende os beneficios da escolarización en galego e conclúe que a educación infantil é primordial para o futuro do idioma.

Fonte: DUVI

Fonte: Cultura galega

O académico correspondente Gonzalo Navaza recolleu a orixe e o significado dos nomes dos 93 concellos da provincia da Coruña nunha nova publicación da Real Academia Galega xa dispoñible en versión dixital na sección de publicacións desta páxina web.

Fonte: RAG

A Mesa pola Normalización Lingüística denunciou o uso exclusivo do castelán nas redes sociais de Turismo Rías Baixas, servizo que depende da Deputación de Pontevedra.

Fonte: Galicia Confidencial