O secretario xeral de Política Lingüística, Valentín García, participou no acto organizado pola Sociedade Interuniversitaria de Filosofía (SIFA) para dar a coñecer o segundo volume da obra Anatomía do pensar. O discurso filosófico e a súa interpretación, do profesor, escritor e filósofo Marcelino Agís.

Fonte: O Portal da Lingua Galega

A comunidade virtual Orgullo Galego pon a disposición das persoas interesadas, de xeito temporal, unha colección de infografías cunha selección do léxico galego relacionado coa fauna e a flora autóctonas. A finalidade é que se usen como material didáctico pensando, sobre todo, na súa difusión entre os máis pequenos.  

Fonte: Consello da Cultura Galega

A Biblioteca Municipal de Allariz convoca a primeira edición do Certame de Relato Curto para Afeccionados, co obxectivo de promocionar a creación literaria en lingua galega. Haberá tres categorías segundo a idade das persoas participantes: ata os 11 anos, de 12 a 17 anos e de 18 anos en adiante.

Fonte: Galicia Confidencial

O secretario xeral de Política Lingüística, Valentín García, inaugurou no Centro Autonómico de Formación e Innovación (CAFI) a Xornada das Letras Galegas. Xela Arias, dirixida a achegar a figura, vida e obra da autora anfitrioa deste 17 de maio ao profesorado encargado de divulgalas entre o resto da comunidade educativa, nomeadamente, o da materia de lingua galega e literatura.

Fonte: O Portal da Lingua Galega

A plataforma Queremos Galego convocou unha concentración na praza do Obradoiro con motivo da celebración do Día das Letras Galegas para reclamar o dereito a vivir con normalidade en galego no día a día.

Fonte: Galicia Confidencial

O secretario xeral de Política Lingüística, Valentín García, presentou Vinte poemas de amor e unha canción desesperada, unha das obras máis célebres de Pablo Neruda, que xa se pode ler en idioma galego grazas á colaboración entre a Xunta de Galicia e Medulia Editorial.

Fonte: O Portal da Lingua Galega

A Real Academia Galega participou nun encontro en liña de lexicografía no que interviñeron academias de linguas de orixe latina organizado pola Academia Brasileira de Letras. Ademais, foi a única institución representante dunha lingua minorizada presente no encontro.

Fonte: Real Academia Galega

Lingua de namorar, o certame de declaracións de amor en galego na rede dirixido á mocidade que promove a Xunta de Galicia por medio das consellerías de Cultura, Educación e Universidade e de Política Social, fai pública a relación de participantes premiados na décima edición do certame, que viu ampliadas as súas categorías habituais de premios cunha nova exclusiva do Instagram (IG) na que se deu unha importante participación, sobre todo na fase das votacións, baixo o cancelo #NamorarEnPandemia.

Fonte: O Portal da Lingua Galega

O Concello do Rosal anima a veciñanza a gozar da lectura a través da organización de diferentes actividades, como un espectáculo de maxia que ten como vehículo condutor a dinamización do galego.

Fonte: Faro de Vigo

A Universidade de Vigo contará o vindeiro curso cun novo grao, único no sistema universitario español, que ofertará 50 prazas. Filoloxía Aplicada Galega e Española busca que o alumnado adquira as competencias filolóxicas precisas para aplicalas de xeito práctico na procura de solucións aos problemas actuais coa axuda das novas ferramentas tecnolóxicas.

Fonte: Universidade de Vigo