O ciclo de coloquios virtuais Redes Galegas terá lugar os días 29 de outubro e 5 e 12 de novembro. Consta de tres xornadas nas que profesionais relacionados coas redes sociais e a comunicación dixital afondarán en temas como a presenza da cultura galega en internet ou no uso das redes sociais como un xeito de achegar o galego ás novas xeracións.

Fonte: Universidade de Vigo

Logo da interrupción en marzo por mor da crise sanitaria, a Coordinadora de Traballadores/as de Normalización da Lingua retoma a convocatoria dos II Premios Mil Primaveras destinados a proxectos de posta en valor e fomento do galego.

Fonte: CTNL

Grazas aos traballos de recollida da tradición oral realizados nas súas sete parroquias, o Concello de Nigrán pon a disposición da cidadanía algo máis de 7000 nomes de lugares como campos, cultivos, pazos, montes, lavadoiros, presas, regatos, hórreos... que quedarán gardados nos arquivos municipais e xeolocalizados nunha páxina web.

Fonte: Faro de Vigo

Segundo explicou a Xunta, a súa plataforma de préstamo dixital das bibliotecas GaliciaLe duplicou o número de lectores en lingua galega desde que comezou a crise da covid-19.

Fonte: Galicia Confidencial

O secretario xeral de Política Lingüística, Valentín García, e o delegado territorial da Xunta en Lugo, Javier Arias, fixeron a presentación pública do libro Carvalho Calero en Lugo. Don Ricardo de Fingoi.

Fonte: O Portal da Lingua Galega

O Consello da Xunta aprobou a convocatoria pública de oito bolsas de formación nos lectorados de lingua, literatura e cultura galegas en distintas universidades de España e de países como Portugal, Italia e Brasil cun investimento global de máis de 300 000 euros.

Fonte: Xunta de Galicia

As fundacións Losada Diéguez, Vicente Risco, Castelao e Otero Pedrayo son as gañadoras da edición dos Premios Otero Pedrayo 2020, que recoñecen o seu papel de difusión do legado dos principais persoeiros da Xeración Nós.

Fonte: O Portal da Lingua Galega

O secretario xeral de Política Lingüística, Valentín García, participou na presentación de dúas iniciativas enmarcadas no Fondo de Proxectos Culturais Xacobeo 2021 posto en marcha pola Consellería de Cultura, Educación e Universidade no marco do Plan de reactivación cultural.

Fonte: O Portal da Lingua Galega

Miracle Tunes, unha exitosa serie da produtora galega Portocabo, xa se pode ver en galego na aplicación móbil do Xabarín e na segunda canle da TVG. Conta con 51 capítulos que mesturan música, baile, estética futurista e apoderamento feminino.

Fonte: Código Cero

O conselleiro de Cultura, Educación e Universidade, Román Rodríguez, destacou a posibilidade de “seguir gozando da música, da nosa identidade e da tradición popular galega dun xeito seguro”, malia o actual contexto de pandemia. Fíxoo no acto de presentación da xira do 40 aniversario do grupo Milladoiro, celebrado na sala Eisenman da Cidade da Cultura de Galicia, no que tamén participou o secretario xeral de Política lingüística, Valentín García.

Fonte: O Portal da Lingua Galega