Durante unha visita ao dolmen de Dombate (Cabana de Bergantiños), unha guía turística foi obxecto de insultos e actitudes hostís por parte dun grupo de turistas que rexeitaban que a explicación fose en galego. A situación xerou momentos de tensión e foi necesaria a intervención do persoal para restaurar a calma. O suceso reabriu o debate sobre o uso das linguas oficiais en espazos públicos e culturais.

Fonte: La Voz de Galicia

Un total de doce concellos galegos modificarán a súa denominación oficial se o Consello da Xunta aproba a proposta de actualización do Nomenclátor presentada pola Real Academia Galega (RAG) e recentemente avalada pola Comisión de Toponimia do Goberno galego.

Fonte: Praza Pública

O conselleiro de Cultura, Lingua e Xuventude, José López Campos, destacou a relevancia de “achegar Castelao, emblema da nosa identidade e cultura, ás xeracións novas”. Fíxoo na presentación do libro Castelao, entre nós. 75 anos despois, que se celebrou en San Domingos de Bonaval e na que estivo acompañado polo secretario xeral da Lingua, Valentín García.

Fonte: O Portal da Lingua Galega

O conselleiro de Cultura, Lingua e Xuventude, José López Campos, celebrou que Vigo estea “un paso máis preto de ter a biblioteca que merece“. Fíxoo tras visitar xunto co Ministro de Cultura, Ernest Urtasun, a parcela na que o Goberno central ten previsto construír esta infraestrutura.

Fonte: O Portal da Língua Galega

O secretario xeral da Lingua, Valentín García, participou no acto de entrega da Rosa de Galicia, no día no que a Casa de Rosalía celebra o 140º aniversario do pasamento de Rosalía de Castro. A Rosa de Galicia, recibida pola familia de Juan Naya, recoñeceu a título póstumo o labor exercido por quen foi herdeiro universal de Gala Murguía e mais secretario e bibliotecario da Real Academia Galega para a conservación, protección e divulgación do legado da familia Murguía Castro.

Fonte: O Portal da Lingua Galega

O presidente da Real Academia Galega reuniuse na sede provisional da institución coas deputadas de Cultura e de Normalización Lingüística da Deputación da Coruña. Henrique Monteagudo, Natividad González e Soledad Agra participaron nun encontro no que analizaron as liñas de colaboración vixentes entre ambas entidades para promover a lingua e a cultura galegas.

Fonte: RAG

Comezou no Fórum Carballo o curso de dinamización lingüística “Traballando en lingua con inmigrantes”, organizado pola Universidade da Coruña. Dirixido a profesionais dos ámbitos da integración e da dinamización lingüística, o programa ofrece relatorios, mesas redondas e obradoiros co obxectivo de promover o uso do galego como ferramenta de cohesión e inclusión social.

Fonte: Universidade da Coruña

O secretario xeral da Lingua, Valentín García, participou no Fórum Carballo na inauguración do XVIII Curso de Verán sobre Dinamización Lingüística Traballando en lingua con Inmigrantes, onde sinalou “a importancia de achegar o galego a todas as persoas e promover o seu uso entre os colectivos migrantes asentados en Galicia”.

Fonte: O Portal da Lingua Galega 

María López Quiroga, formada entre Edimburgo e Madrid, foi galardoada co Premio Illa Nova de Narrativa pola súa novela Perder o norte. O xurado salientou o estilo contemporáneo da novela que emprega recursos do teatro para abordar temas actuais como a saúde mental e o sufrimento.

Fonte: Cultura galega

A editorial Luscofusco recupera corenta textos inéditos de Celso Emilio Ferreiro, recollidos polo seu fillo Xabier Ferreiro baixo o título Pido unha patria ao mundo. Os textos ofrecen unha nova ollada sobre o compromiso político e poético do autor.

Fonte: Cultura galega