Galicia
A 13.ª edición de Explícoche Matemáticas 2.0, o certame para promover o uso do galego nas matemáticas, xa ten gañadora
Antía Fernández Paulos, alumna do IES Castro Alobre, gañou a XIII edición do concurso Explícoche Matemáticas 2.0 co vídeo «Xogando a aproximar Pi», titorizado por Beatriz Alfonsín. Ao certame, que promove o uso do galego na divulgación matemática mediante medios audiovisuais, presentáronse 18 traballos.
Unha campaña da Deputación da Coruña busca desmontar os prexuízos sobre o galego
A Deputación da Coruña lanza a campaña #NaLinguaConOrgullo para combater prexuízos que dificultan o uso do galego na vida cotiá e promover unha actitude orgullosa e activa cara á lingua. A iniciativa inclúe materiais didácticos arredor do libro Galaicofobia e busca fomentar a reflexión crítica no ámbito educativo e social sobre os estigmas históricos que afastaron o galego da súa comunidade.
Fonte: Deputación da Coruña
A Xunta apoia unha nova edición do festival ‘Abride a fiestra’, que homenaxeará as cantareiras cunha vintena de actividades na Casa Museo de Rosalía
A Xunta volve apoiar a celebración do festival Abride a fiestra que se celebrará, o vindeiro 13 de xullo, na Casa Museo de Rosalía de Castro, en Padrón, nunha edición que se suma á homenaxe das Letras Galegas deste ano ás cantareiras e á cultura popular galega, “fonte e inspiración indiscutible na creación da nosa escritora máis universal”. Así o salientou o secretario xeral da Lingua, Valentín García, na presentación da programación do certame.
Fonte: O Portal da Lingua Galega
A Xunta apoia unha nova edición do certame de teatro Festivalle, que se suma á celebración do Ano Castelao
A Xunta volve apoiar unha nova edición do certame de teatro Festivalle, que se dedica en exclusiva a obra, figura e legado de Ramón María del Valle-Inclán e que, neste 2025, se suma á celebración do Ano Castelao “para difundir e dar a coñecer a estreita relación persoal e artística entre ambos”. Así o explicou o secretario xeral da Lingua, Valentín García, na presentación da programación, que se desenvolverá, do 8 ao 11 de xullo, na localidade pontevedresa de Vilanova de Arousa.
Fonte: O Portal da Lingua Galega
Anxo Lorenzo resalta a editorial Galaxia como “piar fundamental na transmisión e difusión da nosa lingua e cultura”
O director xeral de Cultura, Anxo M. Lorenzo, e o delegado territorial da Xunta en Ourense, Manuel Pardo, asistiron á entrega do Premio Trasalba, que este ano rendeu homenaxe á editorial Galaxia. No acto presentouse o libro Crear porvir. 75 anos de Editorial Galaxia, a cargo de Xesús Alonso Montero.
Fonte: O Portal da Lingua Galega
Os concertos do Xacobeo ábrense aos sons urbanos máis actuais co nacemento do Festival Lingua Urbana
Os Concertos do Xacobeo da Xunta de Galicia apostan polos sons máis atractivos e actuais coa presentación dunha nova cita en Santiago de Compostela: o Festival Lingua Urbana, que celebrará a súa primeira edición na Cidade da Cultura a finais deste verán. Así o presentou en rolda de prensa o director de Turismo de Galicia, Xosé Merelles, nun acto no que estivo acompañado pola directora xeral de Xuventude, Lara Meneses.
Fonte: Xunta de Galicia
A Xunta lanza axudas de ata 150.000€ para a produción de audiolibros e de libros en lectura fácil
O Diario Oficial de Galicia publicou recentemente a nova convocatoria de subvencións para a produción de audiolibros e de libros en lectura fácil, dúas liñas de axudas ás que se destinan 150.000 euros con carácter plurianual para 2025 e 2026 e que inclúe 70.000€ para este exercicio e 80.000€ para o vindeiro ano 2026.
Con esta liña de axudas, a Consellería de Cultura, Lingua e Xuventude busca impulsar a produción editorial en novos formatos, para favorecer así o acceso universal á lectura e á creación literaria galega por parte de toda a poboación. As persoas interesadas, que deben acreditar a condición de editoras, poderán solicitar estas axudas ata o 28 de xullo. Tanto as subvencións para a produción e comercialización de audiolibros en galego como para a produción e comercialización de libros en lectura fácil contarán, cada unha, con 75.000 euros, 35.000 correspondentes a esta anualidade e 40.000 á de 2026.
Fonte: O Portal da Lingua Galega
Nace o proceso Lingua Vital co obxectivo de avanzar na normalización do galego
Unhas sesenta entidades galegas puxeron en marcha o proceso social Lingua Vital, co obxectivo de impulsar a normalización plena do galego. No último trimestre de 2025, constituirán grupos de traballo para avaliar o Plan xeral de normalización e definir medidas concretas, tanto normativas como executivas, que permitan reforzar o uso do idioma en todos os ámbitos.
Fonte: Consello da Cultura Galega
Valentín García participa na lectura pública de «Como dicía Castelao»
O secretario xeral da Lingua, Valentín García, participou no acto «Como dicía Castelao. Lectura pública da súa obra», celebrado no Panteón de Galegas e Galegos Ilustres no marco da XIII edición do Festival Atlántica de Narración Oral e da celebración do Ano Castelao.
Fonte: O Portal da Lingua Galega
Arrinca a V Residencia literaria da Cidade da Cultura para impulsar dez proxectos inéditos de poesía, teatro e narrativa en galego
O director xeral de Cultura, Anxo M. Lorenzo, acompañado pola directora-xerente da Fundación Cidade da Cultura, Ana Isabel Vázquez, deulles a benvida ás persoas participantes na V Residencia literaria da Cidade da Cultura. Ata o 12 de xullo, un total de dez escritoras e escritores emerxentes en lingua galega compartirán un espazo de traballo no Gaiás no que poñer en común inquedanzas e coñecementos para mellorar os seus proxectos inéditos de poesía, teatro, novela e contos.
Fonte: O Portal da Lingua Galega
Boletín
Subscríbase ao boletín
