O goberno local de Ferrol abriu o prazo de inscrición para o curso Comunicación en lingua galega de nivel 2, dirixido a persoas en situación de desemprego e sen a ESO ou equivalente. Este curso, de 138 horas e de balde, forma parte da oferta de competencias clave financiada pola Xunta.

Fonte: Diario de Ferrol

Isadora Moon, a protagonista dunha popular serie de libros infantís, chega agora ao galego coa publicación dos volumes Isadora Moon vai á escola e Isadora Moon quere axudar pola editorial Bululú. A serie, escrita por Harriet Muncaster, está dirixida a nenos e nenas de 5 a 8 anos.

Fonte: Praza

O noveno volume da serie Toponimia do Val de Fragoso aborda máis de 150 topónimos da parroquia de Teis. A obra, elaborada por Vera Álvarez Suárez, recolle nomes relacionados coa auga, como regatos, ríos, fontes e praias, e describe a súa orixe histórica e etimolóxica. O traballo destaca a importancia de conservar e difundir a toponimia como parte da nosa memoria oral.

Fonte: Universidade de Vigo

Os Premios Mil Primaveras, creados pola CTNL en 2019, recoñecen e difunden proxectos que fomentan o uso e prestixio do galego. A sexta edición péchase o 7 de xuño coa entrega de galardóns a catro proxectos destacados: Brazolinda, «Galego para peques», «Modo galego, actívao!» e «Vitamina G» nun evento no Pazo de Cultura de Pontevedra.

Fonte: Premios Mil Primaveras

O Correlingua celebrou o seu 25 aniversario cunha participación de máis de 14 000 estudantes de once concellos, que se sumaron ás actividades en prol da lingua galega baixo o lema «A mocidade activa por unha lingua viva».

Fonte: Nós Diario

O XVI Premio Rosalía de Castro recoñeceu este ano o labor de Xosé Ramón Freixeiro Mato, a asociación Ponte... nas ondas! e os proxectos CeibaRimas e Galego para peques. As iniciativas galardoadas destacan pola súa contribución á promoción do galego na investigación, na cultura e na creación de contidos para a infancia e a mocidade, o que reforza a vitalidade da lingua en espazos emerxentes e na sociedade actual.

Fonte: Deputación da Coruña

O conselleiro de Cultura, Lingua e Xuventude, José López Campos, avanzou hoxe no Museo Centro Gaiás as liñas de traballo da exposición inmersiva Castelao. Mirar por Galicia. Realizada coa colaboración da Fundación Castelao, a mostra representa a experiencia tecnolóxico-cultural máis avanzada ata o momento ao redor de Alfonso Daniel Rodríguez Castelao, un percorrido para atravesar o devir persoal, literario, artístico e político dunha das figuras máis senlleiras de Galicia. 

Fonte: O Portal da Lingua Galega

O secretario xeral da Lingua, Valentín García, participou na entrega de premios da 16ª edición do Concurso Coca-Cola Novos Talentos de Relato Curto de Galicia, cuxa gañadora da fase autonómica foi Gabriela Villada, do colexio Manuela Rial Mouzo de Cee, na provincia da Coruña.

Fonte: O Portal da Lingua Galega

O secretario xeral da Lingua, Valentín García, presentou en Santiago de Compostela a edición comentada de Filosofía da Saudade, de Ramón Piñeiro, a obra editada pola Xunta de Galicia para conmemorar a celebración do 110º aniversario do nacemento do escritor, político e filósofo que foi unha das figuras históricas do galeguismo durante o século XX e homenaxeado no Día das Letras Galegas no ano 2009.

Fonte: O Portal da Lingua Galega

A Consellería de Cultura, Lingua e Xuventude entregou os premios do escape room sobre a figura de Castelao organizado polo Departamento Territorial de Lugo na Biblioteca Pública Provincial, no que participaron uns 725 escolares de sexto de Primaria procedentes de quince centros da cidade.

Fonte: O Portal da Lingua Galega