Galicia
O programa Iniciativa Xove subvencionará proxectos de dinamización do galego entre a mocidade
A Consellería de Cultura, Lingua e Xuventude destinará case 400 000 euros ao programa Iniciativa Xove, que apoiará 79 proxectos impulsados por mozos e mozas de 18 a 30 anos, tanto de asociacións xuvenís como de grupos informais. As iniciativas, desenvolvidas en Galicia, abranguen áreas como a promoción de hábitos saudables, a igualdade, a inclusión social e laboral, o emprendemento, a sustentabilidade ou a dinamización do galego. Este ano valoraranse especialmente os proxectos con vocación de permanencia e recoñeceranse os tres mellor puntuados.
Fonte: Código Cero
A Universidade de Santiago participa na versión 5.0 de ParlaMint, o corpus de textos multilingüe de sesións parlamentarias europeas
A versión 5.0 do corpus ParlaMint publicouse coa participación do Instituto da Lingua Galega e do Proxecto Nós na compilación e anotación dos datos do Parlamento galego. Esta actualización incorpora etiquetas automáticas de tema e sentimento, que facilitan análises lingüísticas e de discurso político, así como estudos sobre polarización e evolución temática. O recurso, integrado na infraestrutura europea CLARIN, ofrece tamén versións multilingües con tradución automática ao inglés.
Denuncian unha empresa de prevención de riscos laborais por cobrar nove céntimos a palabra pola emisión de documentos en galego
A Mesa pola Normalización Lingüística denuncia que a empresa Taprega pretenda cobrar nove céntimos por palabra pola emisión de documentación en galego, ao consideralo un servizo extra. A entidade esixe que se ofreza sen custo adicional e lembra que as compañías que operan en Galicia deben respectar os dereitos lingüísticos da cidadanía. Taprega afirma cumprir coa lei ao entregar a documentación en castelán e nega estar obrigada a realizar traducións integrais.
Fonte: Galicia Confidencial
Rafa Vilar faise co Premio Realia coa tradución ao galego dunha novela catalá
O escritor Rafa Vilar obtivo o Vº Premio Realia de Tradición Literaria pola súa tradución ao galego de A tolemia, novela de Narcís Oller considerada fundacional da narrativa catalá moderna. O xurado destacou a escolla da obra, a fluidez do texto e o respecto polo ton orixinal, así como a relevancia de incorporar esta tradución ao corpus galego.
Fonte: Culturagalega.org
O Concello de Vigo organiza módulos de poesía para fomentar o coñecemento e a creación poética en galego
O Centro de Interpretación da Oralidade de Vigo ofrece módulos de poesía impartidos por Silvia Penas do 9 de setembro ao 13 de novembro de 2025. A programación ten como obxectivo espertar no alumnado o gusto pola poesía e potenciar as súas capacidades expresivas. Busca tamén afondar nos valores da poesía galega, tanto tradicional coma contemporánea, ao tempo que favorece a memoria, a imaxinación e a oralidade.
Fonte: Concello de Vigo
Valentín García salienta a internacionalización da lingua galega a través da música
O secretario xeral da Lingua, Valentín García, participou no Castelo de San Antón da Coruña na presentación da xira de Uxía Senlle, «Será por flores», unha cita organizada co apoio da Xunta de Galicia para impulsar a música de creación feminina e poñer en valor e recoñecer o talento galego e a música na nosa lingua que este verán pasará por sete concellos galegos ao abeiro da campaña estival «Para gustos, cultura» do executivo autonómico.
Fonte: O Portal da Lingua Galega
O Tribunal Supremo admite a trámite o recurso da Xunta sobre a denominación oficial da ría de Ribadeo
O Tribunal Supremo admite a trámite o recurso da Xunta contra a oficialización do topónimo Ría del Eo, validado polo Instituto Xeográfico Nacional a proposta de Asturias. A Xunta defende que só debe usarse Ría de Ribadeo, por ser a forma tradicional, compartida por ambas as comunidades. O Supremo deberá decidir se coexistir dúas denominacións vulnera a lei de protección do patrimonio cultural inmaterial, ao carecer de base multilingüística e poder xerar confusión.
Fonte: La Voz de Galicia
O Proxecto Nós sitúa a Galicia no mapa da intelixencia artificial europea da man de Microsoft
O Proxecto Nós, a iniciativa impulsada inicialmente pola Xunta de Galicia e a Universidade de Santiago de Compostela para incorporar o galego ás novas linguaxes dixitais, entra nunha nova fase tras o anuncio feito pola compañía tecnolóxica Microsoft de colaborar con tres centros de investigación de referencia en España para o desenvolvemento de modelos de intelixencia artificial multilingüe. Así, un dos seleccionados é o Centro Singular de Investigación en Tecnoloxías Intelixentes da Universidade de Santiago de Compostela que, xunto ao Instituto da Lingua Galega, impulsou o desenvolvemento do Proxecto Nós.
Fonte: O Portal da Lingua Galega
A Universidade de Santiago convoca unha nova edición do concurso Vémolo Nós que promove a creación audiovisual en galego
A USC convoca unha nova edición do certame audiovisual Vémolo Nós, dirixido á súa comunidade universitaria, co propósito de fomentar o uso do galego na divulgación científica. Tamén se busca visibilizar a historia da universidade e destacar a utilidade do galego no eido profesional. O concurso inclúe tres categorías e entrega premios de ata 1500 euros.
A Xunta colabora con 15 proxectos didácticos en galego cun investimento de 200 000 €
O Diario Oficial de Galicia acaba de publicar a resolución das axudas para a edición en lingua galega de recursos didácticos curriculares para niveis non universitarios mediante a cal a Xunta de Galicia destina 200 000 € a colaborar con 15 proxectos. O obxectivo desta convocatoria, dirixida ás empresas do sector editorial, é fomentar a elaboración e publicación de recursos didácticos curriculares en galego no ensino regrado, así como favorecer o tecido da industria editorial galega.
Fonte: O Portal da Lingua Galega
Boletín
Subscríbase ao boletín
