En setembro reabren as actividades do Espazo Apego, un punto de encontro para compartir emocións e experiencias en galego. O programa inclúe dous espazos para elaborar receitas de froitas e verduras, así como dúas sesións de contacontos e música.

Fonte: Concello de Santiago de Compostela

O secretario xeral da Lingua, Valentín García, fixo un chamamento para impulsar e prestixiar o uso da lingua en todos os contextos da sociedade e nomeadamente no ámbito familiar e litúrxico. Fíxoo no cemiterio de San Vicente de Cerponzóns, en Pontevedra, onde participou nunha xornada de restauración da memoria lingüística.

Fonte: O Portal da Lingua Galega

Nos últimos anos, o galego logrou medrar de forma notable nas redes sociais. Plataformas como TikTok, Instagram e YouTube convertéronse en escaparates para novas xeracións de creadoras e creadores que empregan esta lingua e moitos destes perfís logran chegar a audiencias internacionais, fomentan a aprendizaxe e animan outras persoas a crear contido en galego. A valoración da lingua e a boa acollida do público confirman que internet se constitúe nun espazo clave para a súa visibilidade e normalización.

Fonte: Faro de Vigo

Languages dedica un número especial aos novos estudos da lingüística galega, nun volume editado por Elisa Fernández Rei e Xosé Luís Regueira que leva por título “New Developments in Galician Linguistics”.

Fonte: Consello da Cultura Galega

A Xunta impulsa a primeira edición das xornadas Compostela Histórica coas que, os días 26 e 27 de setembro en Santiago, se divulgarán os aspectos menos coñecidos da historia de Galicia, a través de conferencias impartidas por unha ducia de escritores, músicos, arqueólogos, historiadores e investigadores, entre os que se atopan Pedro Feijóo, Bieito Romero, Lidia Merenciano ou Cristian Gálvez.

Fonte: Xunta de Galicia

Na comarca do Salnés destacan varios apelidos, reflexo da familia, a tradición e o territorio, que definen a identidade local. Otero é o apelido máis repetido, especialmente no Grove; seguido de Castro, que predomina en Meaño e Ribadumia; e Piñeiro, dominante en Cambados. Mentres, outros apelidos, como Rey e Padín, tamén son moi comúns en varias localidades. Na Illa de Arousa é frecuente o apelido Dios, mentres que en Vilanova e Meis abundan os Oubiña e Abal, respectivamente. Moitos destes apelidos tamén teñen unha representación significativa noutras zonas de Galicia.

Fonte: Faro de Vigo

Google acaba de incorporar unha nova funcionalidade de resumos de vídeo en NotebookLM dispoñible en 80 linguas, incluído o galego, o que supón un recoñecemento á diversidade lingüística e unha oportunidade para empregar o galego en contornos tecnolóxicos e educativos avanzados.

Fonte: Código Cero

O Consello Local da Lingua Galega é un órgano consultivo e de participación cidadá previsto na Ordenanza de 2021, que ten como obxectivo implicar a sociedade na avaliación e impulso das políticas lingüísticas municipais mediante asesoramento, debate e traballo colaborativo.

Fonte: Consello da Cultura Galega

A finais do mes de agosto celébranse dúas citas culturais de referencia no rural galego: o Festival dos Eidos, no Courel, que combina poesía, natureza e música; e o Festiletras, no Couto (Ponteceso), cunha ampla programación lúdica e artística que homenaxea a cultura galega. Ambos os eventos reafirman o vínculo entre territorio, lingua e creación.

Fonte: Culturagalega

O poeta palestino Mohamad Bitari está a traducir ao árabe Os Eidos, de Uxío Novoneyra, nunha estadía en Parada do Courel dentro do programa «Escrita no remoto». É o primeiro en levar ao árabe este poemario co busca conectar a cultura árabe coa lingua galega.

Fonte: El Progreso