O 25 de xullo, Nós Diario publicou o caderno 100 ideas para expandir a lingua galega con propostas para promover o uso do galego, elaborado por 10 persoas expertas de distintos sectores. Cada unha delas achega 10 accións específicas para avanzar na normalización da lingua nas súas áreas de traballo, que suman un total de cen ideas que buscan fortalecer a presenza do galego na sociedade.

Fonte: Consello da Cultura Galega

PuntoGal e Raiola Networks presentan omeu.gal, o primeiro servizo de correo electrónico gratuíto con dominio .gal, creado en software libre e integramente en galego. Este proxecto busca reforzar a presenza desta lingua no ámbito dixital e prevé futuras versións melloradas e novas colaboracións no eido das TIC.

Fonte: Dominio PuntoGal

Common Voice incorpora unha ferramenta que permite recoller fala espontánea en galego, co obxectivo de representar a diversidade dialectal e oral da lingua no ámbito dixital. O ILG, mediante o Proxecto Nós, colaborou na elaboración das primeiras preguntas, aínda que calquera persoa pode contribuír. Esta innovación facilita datos abertos para impulsar tecnoloxías inclusivas e investigacións baseadas na realidade lingüística galega.

Fonte: Universidade de Santiago de Compostela

A 35ª edición dos Cursos 'Galego sen fronteiras' reuniu en Santiago a sesenta persoas de vinte países para aprenderen lingua e cultura galegas ao longo do mes de xullo. Organizados polo ILG e a RAG, esta iniciativa internacional contribúe á proxección global do galego e á súa revitalización.

Fonte: Universidade de Santiago de Compostela

A Xunta de Galicia remitiu ao Ministerio de Cultura a actualización do plan de necesidades da futura Biblioteca Pública do Estado de Vigo, adaptando ao momento actual o informe enviado no 2020. No documento, o Goberno galego volve facer fincapé nas dimensións do edificio, incidindo nos 8.000 m2 que xa propuxo entón e que finalmente foi aceptado polo executivo central, desbotando a primeira opción acordada co Concello de Vigo, que contemplaba un inmoble de menor tamaño.

Fonte: O Portal da Lingua Galega

A Xunta abre á cidadanía o proceso de actualización do Plan xeral de normalización da Lingua galega, habilitando unha caixa virtual para recoller as achegas de todas aquelas persoas que desexen participar. Así o anunciou o conselleiro de Cultura, Lingua e Xuventude, José López Campos nunha reunión mantida cos responsables das 11 comisións formadas para levar a cabo o proceso de renovación.

Fonte: O Portal da Lingua Galega

O director xeral de Cultura, Anxo M. Lorenzo, participou na presentación da segunda edición de Pontedeume Vila do Libro, que se celebrará na vila coruñesa entre o 22 e o 24 de agosto cun programa centrado na memoria e identidade galega.

Fonte: O Portal da Lingua Galega

Na XX edición do Premio Castelao de Banda Deseñada da Deputación da Coruña, as obras Maré, de Manuel Barreiro Rozados e Elías Oliver Taño, e Narices!, de Giovanna Lopalco, foron galardoadas nas categorías xeral e infantil-xuvenil, respectivamente.

Fonte: Deputación da Coruña

A Facultade de Filoloxía da Universidade de Vigo acolleu a defensa da tese de doutoramento de María Luz Esteban Saiz, sociolingüista e persoa xorda, quen realizou toda a exposición en lingua de signos española, converténdose así na primeira en facelo en Galicia. O seu traballo, cun marcado impacto social, analiza a evolución da política lingüística da lingua de signos española desde 1980 até hoxe, visibilizando as desigualdades que afectan á comunidade xorda e reivindicando os seus dereitos lingüísticos.

Fonte: Duvi

A Universidade de Santiago de Compostela, xunto coas 22 universidades que integran a Xarxa Vives, a Universidade Pública de Navarra (UPNA), a Universidade do País Vasco (EHU), a Universidade de Deusto, Mondragon Unibertsitatea e a Universidade de Vitoria-Gasteiz EUNEIZ, subscribiron un manifesto conxunto no que reclaman ao Consello da Unión Europea o recoñecemento oficial do galego, o catalán e o éuscaro como linguas da UE. As institucións asinantes defenden que esta oficialidade representaría un paso fundamental no recoñecemento da diversidade lingüística da Unión, así como na protección dos dereitos lingüísticos, da liberdade académica e da creación científica no ámbito universitario.

Fonte: USC