Esta iniciativa nace para aproveitar sinerxías neste ámbito empresarial e para promover a normalización lingüística nun sector en auxe
Arredor de 40 empresas integran esta nova organización, que presentará os seus produtos e servizos os vindeiros 25 e 26 de outubro nunha mostra
A Secretaría Xeral de Política Lingüística financia o proxecto con 40.000 euros

A Secretaría Xeral de Política Lingüística impulsa a galeguización das empresas de servizos nupciais a través do proxecto DeVodas, unha iniciativa promovida por 40 empresas do sector que asumen un compromiso co uso do galego no desenvolvemento cotiá da súa actividade empresarial. A subdirectora xeral de Política Lingüística, Cristina Rubal, participou na presentación desta iniciativa, da que forman parte florerías, xoierías, salóns de peiteado, tendas de traxes de noivos, negocios de restauración, de música, de fotografía e audiovisual, e de agasallos, entre outras.

Co lema Casa co galego, DeVodas comprométese a que todas as comunicacións verbais e escritas, incluíndo o material promocional que as empresas porán á disposición do público, serán en galego. Trátase dunha acción pioneira neste ámbito, para contribuír á promoción da lingua propia tanto entre as empresas do sector como nos usuarios e clientes. A Secretaría financia este proceso de normalización lingüística cun investimento de 40.000 euros.

A Secretaría Xeral de Política Lingüística apoiou desde o primeiro momento esta iniciativa, que dá resposta a un dos obxectivos do Plan xeral de normalización da lingua galega: aproveitar que a maioría da sociedade utiliza o galego en gran parte das súas relacións cotiás. Neste sentido, a subdirectora xeral de Política Lingüística referiuse aos contactos que está a manter o departamento con distintos ámbitos da empresa en Galicia e que xa están a dar os seus froitos. Empresas de tecnoloxías da información e da comunicación, de telefonía móbil, de construción naval ou adegas galegas xa asumiron este compromiso que, segundo demostran os resultados, vén supor unha vantaxe competitiva no mercado.

O proxecto DeVodas disporá dunha páxina web informativa e presentará os seus produtos e servizos os vindeiros días 25 e 26 de outubro en Santiago.

Fonte: Xunta de Galicia

A lingua volve ao centro do debate político a pesar do esforzo do Partido Popular por centrar a discusión nas consecuencias da crise. Será no pleno do Parlamento que se inicia o próximo martes 21 de outubro, apenas dúas semanas despois da polémica votación na que o PP se sumou a PSdeG e BNG no apoio á política de normalización lingüística da Xunta de Galicia para, a continuación, anunciar a súa intención de derrogar o decreto que regula o galego no ensino.

Fonte: El País

O presidente da Mesa pola Normalización Lingüística, Carlos Callón, esixiulle á Xunta que retome as axudas directas ás empresas para o uso do galego. Callón, que presentou un informe sobre a situación do galego no mundo da empresa, cualificou de "distracción fraudulenta de diñeiro público" o "macroconvenio" asinado entre a Secretaría Xeral de Política Lingüística e a Confederación de Empresarios de Galicia (CEG) en materia de normalización lingüística, co que se substituíron estas axudas.

Fonte: Galicia Hoxe

Os encontros, con música e xogos infantís, desenvolveranse durante os meses de outubro e novembro e continuarán no primeiro trimestre do 2009.
Estas montaxes realizaranse por toda Galicia, cunha capacidade máxima de 60 asistentes para favorecer a interacción do público asistente.
Na web de Política Lingüística están xa dispoñibles algunhas cancións do espectáculo, para seguir cantando na casa.

Carballo acollerá o vindeiro 24 de outubro a primeira cita do programa Encontros dos Axóuxeres, iniciativa promovida pola Secretaría Xeral de Política Lingüística co obxectivo de favorecer o uso do galego como lingua habitual nas comunicacións no seo da familia. Na capital de Bergantiños, esta actividade levarase a cabo no Pazo da Cultura a partir das sete da tarde. Xunto con Carballo, outras 24 vilas galegas acollerán estes espectáculos nos que bebés e cativos son os protagonistas.

A primeira xeira dos Encontros dos Axóuxeres desenvólvese entre finais de outubro e o vindeiro mes de novembro, e continuará no primeiro trimestre do 2009. Melide, o día 26 de outubro, e Mondoñedo, o 31, serán as seguintes citas desta festa, que se desprazará en novembro a Ribadeo, Burela, Ortigueira, Ribadavia, Celanova e Oroso. A partir de xaneiro, retomaranse as funcións noutros 16 concellos galegos.

Características
As montaxes van dirixidas a bebés e cativos de 1 a 5 anos de idade, e aos seus pais e nais. Este espectáculo está deseñado para ter unha hora de duración e para realizarse en espazos pechados e cunha capacidade máxima para 60 espectadores (20 bebés cos seus acompañantes).

As familias que desexen participar nesta iniciativa deberán inscribirse previamente chamando ao número de teléfono 686 160 879, dadas as limitacións de capacidade requiridas polas características do espectáculo.

Os Encontros dos Axóuxeres danlles continuidade ás Festas dos Axóuxeres, que se desenvolveron durante o mes de setembro en cinco cidades galegas. Nelas participaron máis de 1200 persoas, unha participación que superou amplamente a do ano anterior, cando se lanzou por vez primeira este programa.
Un dos denominadores comúns dos Encontros reside en que contan cun fío condutor tecido, por un lado, polo tema dos sentidos (oído, vista, tacto, gusto e cheiro) e, por outro, por cinco cancións compostas expresamente para este proxecto. Cada peza musical dá pé a unha dinámica interactiva ou xogo para que o compartan os pais e as nais cos seus bebés e cativos.

A produción do espectáculo corre a cargo da empresa Galitoon. A cantante e artista Elena Paz é a encargada de conducir cada un dos Encontros dos Axóuxeres, nos que tamén intervirán outros músicos e actores. Do mesmo xeito que xa sucedera coas Festas, o boneco Totó, inmerso na aprendizaxe das súas primeiras palabras, constituirá un dos eixes fundamentais do corpo creativo destas funcións.

Axóuxeres na rede
Co fin de favorecer que os pais e nais poidan continuar xogando e cantando na casa, ademais dos materiais entregados nas funcións, a web da Secretaría Xeral de Política Lingüística permite a descarga das letras e a escoita das cancións do espectáculo dos Axóuxeres. Están accesibles en
http://www.xunta.es/linguagalega/encontros_dos_axouxeres_2008

Toda a información relativa a esta iniciativa posta en marcha polo departamento que dirixe Marisol López, así como as datas nas que se levarán a cabo os Encontros, poderán consultarse no mesmo enderezo.

A Secretaría Xeral de Política Lingüística aposta por promover accións como os Encontros dos Axóuxeres como un paso máis en favor do proceso de normalización lingüística, tendo en conta a importancia que ten o contorno familiar na transmisión da lingua propia de Galicia.

Fonte: Xunta de Galicia

“Cada persoa é dona de como se quere chamar, pero sen coñecemento non hai liberdade”. Deste xeito explicaba o director da Área de Normalización Lingüística da Universidade de Vigo a filosofía da campaña Chámate con xeito, coa que a Universidade de Vigo pretende suscitar, entre a comunidade universitaria, unha reflexión sobre a identidade onomástica.

Fonte: Diario da Universidade de Vigo

Algúns dos centros cívicos da cidade da Coruña contarán, a partir do primeiro trimestre do ano que vén, cunha rede de dispositivos que terá como obxectivo normalizar a comunicación coas persoas xordas ou con deficiencias auditivas, sen necesidade de que exista un intérprete de lingua de signos.

Fonte: La Opinión

Unha semana despois de que PSdeG e Bloque, o presidente, Emilio Pérez Touriño, e o seu número dous, Anxo Quintana, escenificasen no hemiciclo o seu total entendemento durante o debate sobre o estado da autonomía, os partidos que integran a coalición que manda na Xunta de Galicia volveron chocar, esta vez a causa dunha proposición non de lei presentada polo deputado nacionalista Bieito Lobeira. A iniciativa busca "revalidar o compromiso adquirido coa aprobación do Plan xeral de normalización da lingua galega", aprobado por unanimidade en 2004.

Fonte: El País

A exposición da Secretaría Xeral de Política Lingüística permanecerá na Estación Marítima do 24 de outubro ao 7 de novembro
No marco da mostra, celebrarase a xornada “A idade dixital do galego”, na que representantes de Google e Microsoft analizarán a importancia da incorporación de estratexias plurilingües como oportunidade de negocio no ámbito tecnolóxico
A exposición continúa a súa itinerancia, tras recibir en Bruxelas un amplo apoio institucional encabezado polo comisario europeo de Multilingüismo, Leonard Orban

Tras a súa estadía en Bruxelas, a exposición da Secretaría Xeral de Política Lingüística “As nosas palabras, os nosos mundos” chega á Estación Marítima de Vigo, onde permanecerá do 24 de outubro ao 7 de novembro. Na cidade olívica, a mostra incidirá no plurilingüismo como unha oportunidade de negocio, xa que cada vez son máis os consumidores que reclaman ser atendidos na súa lingua. Neste sentido, a mostra pon de manifesto o uso do galego como un valor engadido para mellorar a competitividade das empresas.

As demandas dos usuarios levan ás empresas a cambiar as súas estratexias para abrirse paso nos mercados locais coa súa vocación global. Neste cometido, as novas tecnoloxías constitúen unha oportunidade. O galego conta xa con ferramentas como tradutores automáticos, dicionarios electrónicos ou contornos de traballo informáticos. Este é o eixo temático da xornada “A idade dixital do galego”, que se realizará no marco da exposición o vindeiro 28 de novembro. Nela participarán representantes das empresas Google e Microsoft en España, moderados polo director da Escola Universidade de Vigo. No evento, analizarase a importancia do plurilingüismo no ámbito tecnolóxico como elemento xerador de novas oportunidades de negocio.
A exposición conta cun sitio web paralelo, www.asnosaspalabras.org, a primeira web galega sobre diversidade lingüística, que permite unha visita virtual á mostra e achegarse a información de interese sobre o galego e sobre as linguas do mundo. A web pódese visitar en sete idiomas.

Amplo apoio institucional en Bruxelas
“As nosas palabras, os nosos mundos” pasou por xa por Santiago de Compostela, por Vilagarcía de Arousa, por Bilbao e por Bruxelas. Na capital europea estivo instalada nas dependencias da Dirección Xeral de Educación e Cultura da Comisión Europea, no Edificio Madou, onde traballan máis de 2.000 funcionarios. Alí, a mostra contou con amplo apoio das institucións europeas, encabezadas pola directora xeral de Educación da Comisión Europea, Odile Quintin, e polo comisario europeo de Multilingüismo, Leonard Orban.

Desde as orixes ata hoxe
“As nosas palabras, os nosos mundos”, celebrada no marco do Ano Internacional das Linguas e do Ano Europeo do Diálogo Intercultural, permítelles aos visitantes achegarse ao galego e á diversidade lingüística a través de diferentes elementos visuais, gráficos e sonoros. A visita pódese realizar en sete idiomas –galego, éuscaro, catalán, castelán, inglés, francés e neerlandés-flamengo-, aos que se suman outras 25 linguas con presenza na exposición.
O punto de partida da mostra é “As orixes”, que introduce o visitante no misterio do nacemento da linguaxe. A visita desemboca na “árbore das linguas”, que axuda a entender a evolución histórica e a diversidade dos idiomas. No módulo denominado “Isto é galego” o visitante pode descubrir a historia da lingua galega desde a Idade Media ata os nosos días.

Os contidos do terceiro bloque, que lle dá nome á exposición, apostan pola sustentabilidade lingüística e poñen en valor o plurilingüismo.
O último tramo da mostra, “A nosa lingua na nosa vida” é o que reflicte a importancia do galego nas novas tecnoloxías e no ámbito empresarial. Nel tamén se achegan exemplos da lingua galega noutros ámbitos da sociedade como a música, a literatura ou o cine.

De Vigo a Madrid
Despois de Vigo, Madrid será o seguinte destino desta mostra itinerante. “As nosas palabras, os nosos mundos” poderá visitarse no Círculo de Belas Artes en novembro. Tamén poderá verse noutras cidades como A Coruña, Barcelona, Sevilla, Pontevedra, Lugo, Bos Aires e Ourense.

Fonte: Xunta de Galicia

Máis de 3.000 persoas, segundo a Mesa por la Libertad Lingüística (MLL), e unhas 450, segundo a Policía local, manifestáronse o domingo 19 de outubro polas rúas da Coruña para reclamar o dereito a aprender só en castelán.

Fonte: Galicia Hoxe

A Consellería de Educación editou unhas guías en dez linguas para facilitar a comunicación entre os docentes e as familias dos 13.165 nenos inmigrantes que cursan os seus estudos en Galicia. Os manuais recollen preguntas e afirmacións habituais, circulares e información básica traducidas ao árabe, chinés, romanés, ruso, francés, alemán, inglés, portugués, galego e castelán.

Fonte: El País