A iniciativa de comunicación Sermos Galiza, que busca recursos de todo tipo para o lanzamento dun semanario en papel e dun diario dixital en galego, presentouse xa en Santiago, no Festigal e na Coruña. Agora estanse a preparar xa novas sesións en Vigo (o 29 de setembro) e en Santiago (o 4 de outubro).

Fonte: Código Cero

O responsable de Política Lingüística, Anxo Lorenzo, presentou en rolda de prensa o congreso As Linguas e Culturas do Camiño de Santiago de Compostela, que terá lugar na capital de Galicia entre os días 21 e 22 do próximo mes de outubro. O secretario xeral aproveitou a conmemoración do Día Europeo das Linguas, que se celebra desde hai 10 anos cada 26 de setembro, para dar a coñecer o programa e os obxectivos desta iniciativa.

Fonte: Xunta de Galicia

A finais deste curso a Universidade de Vigo porá en marcha un Servizo de Tradución e Interpretación, pioneiro nas universidades galegas. Deste xeito dáse resposta a unha demanda da comunidade universitaria para poder traducir textos e traballos de investigación, documentos oficiais e contar con intérpretes nunha Universidade cada vez máis internacionalizada.

Fonte: Universidade de Vigo

O Servizo Municipal de Educación do Concello da Coruña organiza Palabras contadas, unha actividade dirixida ao alumnado de 5º e 6º de primaria que ten entre os seus obxectivos potenciar a comprensión e a expresión oral en lingua galega ou aprender a falar en público.

Fonte: Concello da Coruña

A Oficina de Software Libre da Universidade de Santiago de Compostela organizou unha actividade formativa destinada a amosar a metodoloxía básica da tradución de aplicativos ao galego, ao tempo que se facía fincapé nas vantaxes mesmas do software libre e dos programas potencialmente traducibles.

Fonte: Código Cero

O Concello de Cotobade adherirase á Rede de Dinamización Lingüística para cooperar coa Xunta na promoción da lingua galega. Así llo expresou o alcalde da localidade pontevedresa, Jorge Cubela, ao responsable de Política Lingüística, Anxo Lorenzo, no encontro institucional que ambos mantiveron na casa do concello.

Fonte: Xunta de Galicia

O número de expedientes por queixas presentadas por particulares e asociacións contra administracións e grandes empresas por conculcar os dereitos do idioma galego elévase a 31, sen contar as preguntas que sobre estes casos realizan os deputados, que se resolven pola propia vía parlamentaria.

Fonte: El Correo Gallego

O III Certame de Cinema OUFF Escola desenvólvese no marco do XVI Festival de Cine Internacional de Ourense. A Secretaría Xeral de Política Lingüística colabora con esta iniciativa, que persegue fomentar entre os máis novos a creatividade audiovisual, ao tempo que promove o uso da lingua galega a través do ámbito educativo.

Fonte: Xunta de Galicia

Para que os nenos e as nenas aprendan inglés, para mellorar a educación, o PSdeG pide nunha moción presentada no Parlamento, entre outras cousas, que a Televisión de Galicia emita todas as películas estranxeiras en versión orixinal.

Fonte: La Voz de Galicia

A Asociación de Escritores en Lingua Galega (AELG) acaba de crear a Escola de Escritoras e Escritores, unha iniciativa que ten como obxectivo transmitir aos seus membros a paixón da creación literaria nun momento en que Galicia "necesita máis que nunca o compromiso coa súa lingua", dixo o presidente da asociación, Cesáreo Sánchez.

Fonte: Faro de Vigo